Un’initziativa naschida in su coro de sas comunidades locales po revertire s’Ozzastra in d’unu modellu de agguantu e balorimentu de s’iscrocca. Su GAL Ozzastra at pubblicadu s’elencu de su disignu chi andat addìa su simple finantziamentu de operas, bettande sas bases po unu sensu rennovadu de appartenentzia e identidade locale.

Sa porfia est cussa de torrare a cualifficare e balorizzare sos logos pubbricos de rilievu istoricu, culturale e de sa bista, torrandelos a sa comunidade.

Sunt 16 sos comunes de s’Ozzastra seperados po tennere beneffissios de unu finantziamentu totale de casi 1,2 miliones de euros. Custos benes ant essere destinados a faghere torrare a naschere sas prattas, cortes, fraicos istoricos, operas de arte e atteras cosas fattas a manu chi ant perdidu su lugore insoro. Non si at a trattare de interventos simples de recuperu, ma de disignos de iffroscamentu chi ant a ponnere impare sas comunidades locales, revertinde logos tzentrales in sas conas vivas de s’iscrocca.

Sos comunes chi partetzipant a custa torrada a bida sunt: Gairo,Ulassai,Osini,Loceri,Arzana,Elini,Baunei,Jerzu,Lanusei,Ilbono,Urzulei ,Talana,Cardedu,Villagrande Strisaili,Ussassai e Perdasdefogu. “Ammos bidu una risposta de galabera dae parte de sos Entes locales,” at declaradu Vitale Pili, presidente de su GAL Ozzastra, “sinnu de cantu siat importante custu accottu po favoressere un’isviluppu armuniosu e chi pottat agguantare. Non si trattat solu de accontzare logos, ma de affortigare su ligonzu intre passadu e tempus benidore, torrande a iscoperrere sas raighinas nostras po nos abberrere a afficcos de creschida novos.”

Gratzias a custos disignos, s’Ozzastra punnat a divennere non solu una destinatzione turistica pius ammaghiante, ma fintzas un’iscrocca in sa cale si pottat pius bivere po sos abitantes suos. S’intentu de su bandu no est solu cussu de fraigare operas mannas, ma torrare a bida logoso chi si usant donzi die e benes pubbricos, chi meritant de essere preservados, creande un’ecchilibriu intra su connottu e s’annoamentu, elementos chi arricchint su pannu sotziale e culturale.

Attività realizzata col contributo della Regione Sardegna — IMPRENTAS 2023-2024. LR 22/2018, art. 22

Benito Urgu, unu de sos comigos prus connoschidos e appretziados de sa Sardigna.

Attore, cabarettista e tzelebridade televisiva, in sos annos est divennidu populare meda gratzias a sos ispettaculos ispassiosos suos e a sas friguras chi contant cun iscrombu sa vida de donzi die in s’isula. Naschidu in Aristanis, Urgu at incuminzadu sa carriera sua in su mundu de s’ispettaculu medas annos faghet. Fintzas dae s’incumintzu at leadu supra de su cataffale una comicidade simple e ispontanea, a s’ispissu ispirada a sa manera de faeddare,costumenes e situassiones tipicas de sa Sardigna.

In sos sketch suos contat cun lepiesa sa vida in sas biddas, su connottu e sas iscenas pitticcas de donzi die, iscenas in sas cales medas pessonas resessint a si reconnoschere in manera fatzile. In su mentres de sa carriera longa sua at partetzipadu a medas ispettaculos teatrales, programmas televisivos e in sa radio.

Cun sa manera sua de faghere nadurale e s’humor derettu est resessidu a conchistare su pubbricu de tottu s’isula. Meda de sas friguras suas sunt divennidas connoschidas pro itte presentant in manera chi divertit su meledu e sos comportamentos de sa zente sarda.

Sa comicidade de Benito urgu si fundat supra trempas simples e istorias chi naschent dae sa vida de donzi die. In sos ispettaculos suos faeddat a s’ispissu de sa vida in sas biddas, de su connottu e de su cambiu de sa sotziedade. In medas occasiones impittat fintzas paraulas e maneras de narrere de sa limba sarda, faghinde divennere sas mustradas suas fintzas prus accurtzas a sa cultura e realidade de s’isula.

Cun su colare de sos anno est divennidu unu puntu de relata po sa comicidade in Sardigna. Sos ispettaculos suos sighint a essere sighidos dae medas pessonas e sunt unu mamentu de divertimentu ma fintzas una manera po contare cun iscrombu sa vida e sos cambios de s’iscrocca. In prus de sa comicidade, Benito Urgu at semper mustradu attentzione meda pro sa cultura e su connottu de sa Sardigna.

Pro mesu de su tribagliu suo ad dadu unu contribbudu pro faghere connoschere e balorizzare mamentos importantes de s’identidade de s’isula, battinde supra de su cataffale istorias e situassiones chi faghent parte de sa vida e de sa memoria de sas comunidades locales.

Cun sa forma simple sua, deretta e ispontanea, Benito Urgu at fraigadu una carriera longa in su mundu de s’ispettaculu. Fintzas oe est cussideradu una de sas caras prus connoschidas de sa comicidade sarda e sighit a essere appretziadu dae pessonas de ingendras divressas.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22