A su Teatru Massimo de Casteddu, si est artziada sa tenda supra sa secunda edissione de su Premiu a sa Carriera 2024, unu abbenimentu chi at tzelebradu estremadìas de medas campos comente cultura, tzinema,giornalismu,musica e ispettaculu.

Supra su cataffale sunt bistadas giammadas ses pessonas importantes po retzire su riconnoschimentu de grandesa, riservadu a cussos chi ant dassadu unu sinnu chi non si podet iscantzellare in sas carrieras insoro. S’initziativa, ordiminzada dae s’assotziu Event’s Partners, at tentu s’amparu de sa Regione Sardigna e de s’Assessoradu a s’Istrutzione Pubbrica.

Sa tzerimonia est bistada incomintzada cun sos saludos uffitziales de su Presidente Lucio Caredda e de su direttore artisticu Marco Tullio Cocco, sighidos dae una affriscionosa mustrada de sa violinista Anna Tifu, chi at ammaliadu su pubbricu. Luca Telese e Giuliano Guida Bardi ant pustis incumintzadu cun sas premiassiones cun galania meda.

Su primu premiadu est bistadu su tenore casteddaggiu Francesco Medda. S’isula e sa tzittade printzipale de sa Sardigna ant tentu unu rolu tzentrale in custa edissione. A segare s’astrau est bistadu Francesco Medda, cantadore liricu famadu in tottu su mundu, chi at tentu s’onore de abberrere sa serana, chi at bidu fintzas su triunfu de su mastru Piero Marras, figura de signifficu de sa musica popolare sarda. Retzidu cun d’unu tzacculimanu forte meda, Marras at ammentadu sos tempos de s’incumintzu de sa carriera sua, donande a su pubbricu duas interpretassiones ispetziales: una trauda a sos minadores sardos cun “Sixteen Tons” e unu donu a Gigi Riva cun sa cantone “Quando Gigi Riva tornerà”.

In mesu de sos premiados bi est bistadu puru Francesco Merlo, gasetteri cun d’una carriera longa meda, chi at tribagliadu po giornales commente “Corriere della Sera” e “Repubblica”, contande s’istoria politica italiana, peri deghinas de annos de cambiamentos. A distantzia, ma semper festada, Barbara Albeeti at partetzipadu cun d’unu collegamentu video, pro itte non podiat essere presente po motivos de salude.

Su comicu Massimo Boldi, unu de sos pius conicos de su tzinema italianu, at retzidu su Premiu a sa Carriera, ammentande sos incumintzos suos commente batterista e s’iscoperta de su talentu comicu suo. A serrare sa serana est bistadu su mastru Pupi Avati, regista e autore de sutzessu.

Attività realizzata col contributo della Regione Sardegna — IMPRENTAS 2023-2024. LR 22/2018, art. 22

Mario Pes: sa Sardigna contada po mesu de sa mirada de s’arte fottograffica.

Merculis 18 de frearzu su SEARCH de Casteddu at avviadu una mustra dedicada a Mario Pes, frigura tzentrale de sa fottograffia sarda de su Noighentos, capatze de fundere dilighesa artistica e asserva sotziale. Sa mustra sinzat su cuccurale de su disignu incumintzadu in Nugoro in S’Ispatziu Ilisso e isfroscadu in sos urtimos meses cun abbenimentos editoriales e cun films, chi ant ghiradu s’attentzione de sa critiga e pubbrica supra unu mastru de sa cultura bisiva isulana.

Intitulada “Mario Pes. Sa Sardigna intre connottu e modernidade”, sa mustra apparat una bista de mandu supra sa tzittade de Casteddu e s’iscrocca sua,repessados po mesu de s’obbiettivu de un’artista chi revertiat donzi iscena de sa die in cumposissione bisiva.

Prus de 200 friguras, medas in mesura manna, ghirant logos de sa tzittade e de sas lacanas, caras, architetturas e logos de tribagliu cun d’una fortza poetica chi andat prus a daenantis de sa simple documentassione. Donzi fottograffia est unu resumene de geometria, lughe e aera, un’echhilibriu intre castiada reale e bisione de bellesa. Sa fottograffia de Pes mi movet donzi mamentu supra s’affrontadura intre arte e cronaga.

Sa mirada sua abbizosa a sas tesones sotziales de sa tzittade, divenit limbazu bisivu, capatze de ghirare s’umanidade e operosidade chi animant sa Sardigna de s’incumintzu de su Noighentos. Importantzia particulare tenet su contu de sos logos de tribagliu, incluidinde s’esperientzia de sas feminas, ghirada cun delicadesa e rispettu, chentza discursos ma chin seru artisticu fungudu.

S’allestimentu, curadu dae s’architetto Antonello Cuccu,amplariat sa fortza poetica de sas friguras e cumbidat su bisitadore a s’affundare in su logu fottografficu, a si firmare e attibbire sa mesura de sa bellesa de sos logos fottograffados dae Pes. Sa mustra prevedit bisitas ghiadas, buttegas didatticas e devuccamentos po accumpanzare su pubbricu in d’unu caminu chi faghet attibbire e chi est prenu de cultura fintzas a su 4 de aprile 2026.

Po accabbare s’esperientzia, su docufilm iscrittu e setadu dae Enrico Pinna, torrat in daesegus sa coerentzia artistiga e s’indipendentzia de su pensamentu de su fottograffu intrintzinde sa muda pessonale e s’istoria cumone.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22