Unu sequestru chi non tenet innantis bi est bistadu in s’Aeroportu “Mario Mameli” de Casteddu-Elmas, inue sos funtzionarios de s’Uffitziu de sas Duganas ant frimmadu unu passizzeri chi fit carrande 89 corra de rebedustu, po casi 12 Kilos. A su tzittadinu sardu, chi fit arrivande dae Tunisi, li ant controlladu sos badalcios commente si faghet semper, e tando est bistadu iscopertu su carrigu chi non si biet a s’ispissu e chi fit suspettu.

Su controllu partit dae sas attividades chi si faghent semper, po prevennere e ismurriare sos trafficos illetzidos, e at fattu iscoperrere corra de rebedustu, chi funt destinadas, secundu cantu si pensat, a sa produssione de manigos po lesorzas, unu tribagliu de sos maistros chi faghent in carchi logu de sa Sardigna. Su passizzeri non est bistadu capatze peroe de presentare sos attos de sos veterinarios balidos po faghere bintrare prodottos de issida animale, cosa chi serbit po assicurare su rispettu de sas lezes de sa sanidade e de s’ambiente.

Po sa mancantzia de custos documentos, sas corra sunt bistdas sequestradas e mandadas a sa destrussione, commente prevedid sa leze. Su sequestro non solu lu prevedint sas lezes internatzionales, ma est puru
unu tasseddu in s’impignu de sas autoridades de sas duganas po tutelare sas zenias animales e de su prantamine.

S’operassione de s’aeroportu de Elmas, evidentziat sa balidìa de sos controllos duganales supra sos passizzeris chi arribant dae logos extra UE, commente sa Tunisia, unu paisu cun su cale s’Italia tenet trattados negossiales e de turismu. Sas autoridades duganales, diffattis, controllant cun attentzione meda non solu sos benes de valore colomicu, ma fintzas cussos chi tiant podere essere unu chimentu po sa salude pubbrica e po sa bardiada de sos benes naturales.

Custu accadessimentu evidentziat s’importantzia de su rispettu de sas lezes chi regulant s’importassione de prodottos de issida animale, netzessarias po garantire chi custos materiales non siant unu chimentu po sa salude. Sas regulas internatzionales imponnent diffatis chi sos prodottos de custu tipu benzant accumpanzados dae documentos chi provent chi sunt berteros e sicuros, cansiande gai de faghere bintrare maladias o parassitas chi tiant podere ponnere in perigulu su patrimoniu de sos animales de s’Isula.

Attività realizzata col contributo della Regione Sardegna — IMPRENTAS 2023-2024. LR 22/2018, art. 22

Sas Salinas de Casteddu intre istoria, connottu in s’iscrocca de Santa Gilla.

Sas Salinas de Casteddu sunt unu de sos logos prus tipicos de su sud de sa Sardigna e si agattant in sa zura de s’istagnu de Santa Gilla, a pagos passos dae sa tzittade. Cust’iscrocca aunit in manera unica su tribagliu de s’omine e sa ricchesa de sa natura, creande una bista particulare, fatta de bartzas de abba, colores e mudores. S’istoria insoro est antiga meda e arribat dae su tempus de sos romanos, cando su sale fuit produidu irfruttande su sole e su bentu. Cun su colare de su tempus s’attividade est creschida e si est ordiminzada semper menzus, divenninde una fortza de fundamentu po s’accolomia locale.

Pro annos meda su sale produitu in Casteddu est bistadu bendidu fintzas in atteras iscroccas, dande unu contribbudu a s’isviluppu de sa zura. S’assentu de sa produssione est simple ma balidu. S’abba de su mare benit fatta bintrare in sas bartzas e dassada ispaporare gratzias a su cardu e su bentu. Cando s’abba si ritirat, su sale addurat in su fundu e benit regortu. Est unu protzessu naturale chi ancora oe sighit ritimos ligados a sas istajones e sas cundissiones de su clima.

Addia de s’aera produttiva, sas salinas sunt fintzas unu logu naturale de balore mannu. S’istagnu de Santa Gilla est difattis una zura importante meda pro sos animales, mescamente sos puzzones. Intre sos prus connoschidos bi sunt sa zente rubia, chi in sos annos sunt divennidos una cona de s’iscrocca. Imparis cun issos bivent medas atteras zenias chi acciappant in custas abbas unu logu ideale pro pappare e si pasare.

In sos urtimos annos sunt divennidas unu puntu de arribu semper prus apprezziada dae chie bisitat Casteddu. Semper prus pessonas si accostant a custu logu pro iscoperrere comente si produet su sale e pro iscrudignare sa natura dae accurtzu. Sos colores de sas bartzas e sa bista abberta faghent divennere sa zura ammaghiante meda, mescamente in sas oras de s’intrichinu.

Sas salinas sunt oe un’ecchilibriu intre passadu e presente. Dae una parte sighint a contare unu connottu antigu ligadu a su tribagliu e sa produssione de su sale, dae s’attera sunt un’ambiente naturale de diffendere e balorizzare. Sas salinas de Casteddu sunt meda prus de unu logu produttivu. Sunt una parte importante de s’istoria e identidade de s’iscrocca, unu esempru de comente s’omine e sa natura potant bivere impare.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22