Giovia e chenapura sa Sardigna at essere abbuttinada dae unu abbolottu chi arribat dae su mare de su Norti e dae s’Islanda, battinde unu tempus chi de sicuru ammentat s’attonzu. S’abbolottu at a rugare su Mediterraneu tzentrale e at a corpare fintzas s’Isula, battinde isfrittadas e unu pejoru generale de sas cunditziones de su tempus.

Sos spertos de s’uffitziu meteo de s’Aeronautica Militare de Decimomannu,narant chi, giai dae su manzanu de giovia, a ora de mesudie, si ant a podere nodare sas primas abbas accumpanzadas dae temporadas locales e unu creschimentu de sas nues. Custu at a battire una minimada de sas temperaduras de 4-8 grados in cunfruntu a sos 30 de sas dies passadas. Su bentu de maistrali at a sulare forte meda, cun corfos e’ bentu chi ant a podere arrivare puru a buriana, in manera particulare supra de sas costas occidentales, inue non si podent escluire marettadas. In carchi ala, s’abba podet essere forte meda, bettande fintzas 40 mm de abba in solu ses oras.

Sa die de chenapura at essere sa pius fea. Sas temperaduras ant a sighire a minimare, fintzas 8 grados in mancu in cunfrontu a sas dies passadas, e si ant a registrare atteras temporadas e bentu forte meda, cun d’una depressione mumujonica supra su golfu de sa Liguria chi at a inluentzare in manera printzipale su tzentru-norti de s’Isula.

Partinde dae sapadu, bi at essere unu mezoru de su tempus, mancari non si potant escluidire atteras sciusciadas ‘e abba, in manera particulare in sas alas de s’internu e in sas oras pius cardas de sa die. Dominiga, su tempus tiat teppere mezorare cun su chelu pius serenu e temperaduras in artziada, chi ant a torrare a passare dae sos 25 a sos 30 grados.

Custu primu abbolottu de s’attonzu mustrat unu cambiu de iscena in cunfrontu a su cardu istadiale de sas urtimas dies, cun d’unu tempus pius friscu e traccujosu. Intames, su mezoru lestru chi si aspettat po su fine chida, dassat biere chi s’istiu non est finidu de su tottu, e sa Sardigna at a podere godire de temperaduras caldumas po carchi atteru tempus.

Attività realizzata col contributo della Regione Sardegna — IMPRENTAS 2023-2024. LR 22/2018, art. 22

Regorta differentziada,Sardigna intre sas primas ma serbit unu passu in prus.

Sa Sardigna si cuffirmat intre sas regiones prus attentas a sa conduida de s’arga. In su 2024 sa regorta differentziada est arrivada a su 76,5% e balet su terzu postu in Italia, in daesegus de Emilia Romagna e Veneto.

S’elementu,presentadu dae Legambiente in su mentres de s’Ecoforum de Casteddu, mustrat una situassione positiva.Intames si registrat una minimada pitticca de sos comunes prus virtudosos e de cussos chi resessint a arrivare a prezenias artas meda de regorta. In d’una parte manna de s’isula sunt oramai diffundidas abitudines bonas in s’isseperu de s’arga, signu chi in sos annos est bistadu fattu unu tribagliu importante dae sas amministratziones e sos tzittadinos. Sa regorta gianna pro gianna e un’attentzione prus manna a sos cumportamentos de donzi die ant dadu unu contribbudu pro mezorare sos risurtados.

A su mattessi tempus addurant ancora trempas de mezoramentu. Carchi tzentru no arribat a sos livellos prevedidos e sighint a faghere prus fatiga,comente Tattari, mancari siant arribande cambiamentos chi diant podere battire menzus resurtados giai in sos annos imbenientes. Intre sas tzittades printzipales si annoditant Aristanis e Nugoro, chi cuffirmant prezenias artas e organizassione bona de su servitziu, divenninde puntu de relata fintzas po sas atteras iscroccas.

Su cuadru chi bessit a pizu est cussu de una regione chi at fattu passos in daenantis importantes, ma chi non si podet permittere de si frimmare. Una parte de s’arga sighit difattis a no essere differentziada e custu pesat siat supra de s’ambiente chi supra sos costos pro sas comunidades. Sa bera porfia como no est solu mantennere sos risurtados segudados, ma los rendere prus pariviles in totta sa Sardigna. Bi sunt iscroccas chi andant bene meda e atteras chi addurant in daesegus: minimare custa differentzias at essere de fundamentu pro mezorare deabberu su sistema.

In giogu non bi est solu una prezenia, ma sa manera cun sa cale si abbidat a su tempus benidore. Mezorare sa derettura de s’arga cheret narrere de minimare su corpu supra de s’ambiente, ma fintzas fraigare comunidades prus scientes e responsabbiles. Est unu caminu chi dimandat continuidade e impignu e seperos craros, pro itte sos resurtados alcansados fintzas a como mustrant chi furriare est possibile, ma solu si si andat a daenantis chena si frimmare.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22