Una prantada manna meda de marijuana, cun 1048 piantas de casi tres metros de artaria, est bistada iscoperta e secuestrada in sas campagnas de Talana dae sos carabbineris, in su mentres de un’operassione fatta su manzanu de su 3 de capudanni.

Su provvedimentu l’ant fattu sos carabbineris de Arzana e Lanusei, azzudados in manera detzisa dae cussos de Talana, in d’una operassione letrangosa e organizzada chi at fattu iscoperrere un retza importante meda de campos contivitzados in manera chi no est permittida. Sas piantas, s’artaria de sas cales andaiat dae sos 260 a sos 310 tzentimetros, fint creschinde bene meda, e, si tiant essere postas in su mercadu, bi tiat essere bistadu un’incassu de casi 2,5 miliones de euros, evidentziande su balore de sas piantas e s’importu chi custu tiat aere tentu supra su trafficu locale de sustantzias abberelantes.

S’operassione at giuttu a s’icoperta de unu zassu organizzadu bene meda po su manizzu. Sos carabbineris, difattis, ant acciappidu unu sistema complicadu meda po abbare, cun canneddos chi garantiant chi s’abba arriverat in donzi momentu a sas piantas, addìa duas gisterras in PVC, usadas commente depositos po abbare tottu sa prantada.

Custu tipu de approntu mustrat s’organissasione e sos avios usados dae sos responsabbiles, chi aiant fraigadu un’operassione de laurantza chi no est cunsentida dae sa lezze.

Ma non solu. In sa caminera chi che giughiat a sa prantada, fint bistadas postas trappulas po iscattare fotograffias, mustrande su livellu de attentzione chi teniant sos manizzadores po controllare e diffendere su logu dae s’arrivu de istranzos.

Custos apparitzos, chi si usant po su controllu de zuras inube non bi est nissunu, cunsentint de iscattare fotograffias o registrare video cando passant sas pessones, fruninde a sos criminales una cramida de prevensione si bi passaiat calicunu. Tottu su materiale, accansande fintzas sas piantas, su chi serbiat po las abbare e sos sistemas po sas fotograffias, est bistadu secuestradu dae sa politzia, chi commo est faghinde scruccullas po chircare de cumprendere chie sunt sos responsabbiles de sa contivizzatzione. Sos controllos supra su materiale chi est bistadu secuestradu tiant podere frunire atteros arvios chi podent servire po accattare sos chi bi sunt in daesegus de custa attividade chi no est permittida.

Attività realizzata col contributo della Regione Sardegna — IMPRENTAS 2023-2024. LR 22/2018, art. 22

In Barbagia, su Carrasegare de Gavoi si annoddittat dae semper po una particularidade chi lu rendet unicu in sa bista de s’isula: inoke sa caratza non est uni bisu cuzigadu, ma su sonu. A faghere divennere unica sa festa non sunt costumenes iscenograficos o friguras de linna, ma su ritmu potente de sos tumbarinos e sos cantos de sos istrumentos de su connottu chi rugant sas carrelas de sa bidda. Custa tzelebrassione est sighida meda e attrait in sa biddichedda bisitadores meda.

Sas tzelebrassiones incuminzant in su Giovedì Grasso, connoschidu comente Giovja Lardajola, die chi marcat s’incumintzu uffitziale de sa festa e muttit sa comunidade a inghiriu de sos sapores tipicos de su connottu. Dae cussu mamentu, Gavoi si animat cun sos sonadores, muttidos tumbarinos, chi rugant su tzentru istoricu cun su bistire barbaricinu de su connottu. Sa colada insoro est abbisada dae su battidu detzisu de su tumbarinu, tamburu fattu cun pedde animale, accumpanzadu dae su sonu acuthu de su pipiolu,launedda de canna, e dae su ritmu metallicu de su triangulu.

No esistit una isfilada ordiminzada in su sensu classicu de sa paraula: tottu sa bidda divenit unu cataffale spontaneu. Sa musica s’isparghet intre sas carrelas e sas pratas, bintrat in sas domos e chentinas, inube sos sonadores benint accollidos po sighire sa festa intre ballos e mamentos de sotzialidade. Est una tzelebrassione chi transat tottas sas ingendras e chi rennovat donz’annu su sensu de appartennentzia a sa comunidade.

In su tempus passadu, intre sas friguras chi mustraiant su carrasegare bi fuit fintzas Zizzarrone, unu maimone chi mustraiat s’ispiritu isberrittadu de su tempus de su carrasegare. Oe sa presentzia sua est prus pagu tzentrale, ma addurat parte de s’immaginariu de tottus ligadu a sa festa.

Fintzas in custa dies, su Carrasegare de Gavoi est bistadu tzelebradu cun partecipassione manna, ghirande in sas carrelas de sa bidda s’energia de sos tumbarinos e cunfirmande su ligamene forte intre connottu e identidade locale, in d’unu cuntestu regionale inube atteros logos sunt nodidos  po sas caratzas rituales, Gavoi sighit a si annoddittare revertinde su sonu in s’eroe beru de su Carrasegare, un’elementu capatze de contare s’istoria e s’anima de sa Barbagia.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22

Il video di Maria Grazia Marras

.