Sos sindacados autonomos, chi aiant giai pesadu su chessosu insoro po no essere bistados cumbidados a sa mesa regionale supra sa sanidade, sunu prontos a torrare in pratta po mustrare su chessosu insoro in manera detzisa e chi si pottat biere. Cust’appellu nou si che ponet in d’unu cuntestu de pensamentu chi est creschinde po sas cundissiones de su sistema sanidariu sardu e po su riconnoschimentu de sos dirittos de sos chi tribagliant in custa setzione.

Su Nursing Up Sardigna, chi diffendet sos proffessioneris sanidarios de s’isula, at ordiminzadu una cunvocatzione manna in tottu sas Asl regionales. S’intentu printzipale de custa cunvocatzione est cussu de garantire su dirittu a sa salude de sos tzittadinos sardos e dimandare su zustu riconnoschimentu e balorizzatzione de sos operadores sanidarios. Chenapura 6 de capidanni, incumintzande dae sas 9.30, bi at essere un’incontru in Tattari, in su viale Italia, daenanti a su Prontu Succursu de s’Ispidale Santissima Annunziata. Custa bogada a campu est solu s’incumintzu de paritzos accadessimentos programmados in medas tzittades de sa Sardigna, chi ant a serbire po dimandare unu recuperu de sas proffessiones de sa sanidade, unu creschimentu de sos tribagliadores e unu mezoru de su cumpensu po su personale.

In su mentres, Diego Murracino, segretariu regionale de su Nursing Up, at postu presse a s’Assessora regionale a su Tribagliu, Desiree Manca, po mantennere s’impignu de s’istantziamentu de sos fundos chi bi cherent po assuntare 800 novos tribagliadores commente operadores de sa sanidade e atteros OSS. Sa mancantzia de custos proffessioneris in sos ispidales de sa Sardigna est unu problema apprettosu meda e fintzas cronigu, e sa prima parte de assuntziones est unu passu importante meda, mancari non bastet po eliminare su problema in manera deffinitiva.

At puru espressadu critigas meda po sa proposta chi est bistada fatta in d’unu incontru de pagus tempu faghet de sos assessores a su Tribagliu e a sa Sanidade. In su mentres de s’incontru, sos segretarios de CGIL,CISL e UIL ant indittadu de girare una parte de su inari destinadu a s’assuntzione de operadores de sa sanidade po leare personale po s’amministratzione de sas ASL.

Attività realizzata col contributo della Regione Sardegna — IMPRENTAS 2023-2024. LR 22/2018, art. 22

Pinnettos sardos, furriadorzos antigos chi contant sa vida de sos pastores.

Sos pinnettos, sunt intre sas testimonias prus beras de sa Sardigna de campagna e contant una manera de bivere ligada in manera funguda a sa pastoria e s’iscrocca. Ispartos mescamente in sas zuras de intro de s’isula, in manera particulare comente s’Ozzastra, beniant fraigados dae sos pastores comente furriadorzos in su mentres chi passaiant tempus meda in campagna imparis cun sos masones. S’istruttura insoro est simple ma zeniosa:tenent una forma tunda cun d’una base fatta cun pedras e una copertura fatta de rampos e frastamazas intritzadas, a s’ispissu de ghiniperu, impittande solu materiales naturales chi si agattaiant in cussu logu.

Intro, su logu est essentziale ma funtzionale, chi bastaiat pro si amparare dae su frittu,dae su bentu e s’abba,coghinare e costoire sos istrumentos de tribagliu,chena mai essere pensados comente domos abbarrantes ma comente puntos de accottu ligados a sa vida pastorale.

Custos fraigos naschent dae una connoschentzia funguda de s’ambiente e de sos medios suos, inube nudda capitat pro casu: su seperu de sos materiales,sa forma,s’orientamentu, tottu rispondet a esigentzias pratigas e a sa netzessidade de si adattare a cundissiones a s’ispissu diffitziles.Sos pinnettos sunt duncas non solu unu furriadorzu fisicu,ma fintzas unu esempru beru de ecchilibriu intre omine e natura, fraigados chena trastoccare sa bista ma intregandesi intre issa in manera perfetta.

Ancora oe sunt presentes in medas zuras de sa Sardigna, calicunu cusservadu bene, atteros sinzados dae su tempus, e sighint a contare un’istoria fatta de tribagliu, sacriffissiu e vida de donzi die attesu dae sas biddas.In sos urtimos annos est creschida s’attentzione a banda de sa tutela e balorizzassione insoro, cun interventos de recuberu e insertu in caminos naturalisticos e culturales, signu de unu rennoadu attuamentu de su balore insoro istoricu e de s’identidade.

Sos pinnettos non sunt solu fraigos de su passadu, ma conas de una cultura chi at ischidu resistire e si adattare in sos seculos.Costoire custa istrutturas cheret narrere de mantennere biva sa memoria de unu mundu chi at formadu s’identidade de sa Sardigna e chi fintzas oe podet indittare meda.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22