Pustis de una partentzia intzerta, sa truppa de Luna Ruja at mustradu tottu su determinu e abilidade sua, binchinde in sa porfia contra American Magic, in sa secunda die de sas porfias de ammainada de s’America’s Cup in Bartzellona. Custa binchida est bistada meda de signifficu, cunsiderande sas difficultades de s’incomintzu e s’importantzia de custas porfias commente una proa po sas cumpetissiones uffitziales chi ant a sighire.

Sa truppa, ghiada dae sos prenos de talentu Frantziscu Bruni e James Spithill, at tentu una partentzia istravanada, resessinde a balanzare un’acchittu de 200 metros e 18 secundos giai in su primu ladu de bolina. Custu istaccu a s’incomintzu est bistadu unu cinnu craru de sa ammaniada e de s’irbirgu zustu postos in campu dae sa truppa italiana. Sas cunditziones de su tempus, cun d’unu bentu de 11,2 nodos, ant sighidu a favoressere una porfia fusida e ammaghiante, chi at permittidu a Luna Ruja de mantennere e amprariare su vantaggiu suo in su mentres de sa cumpetissione.

Commente sa porfia andaiat a daenanti, Luna Ruja at sighidu a affortigare sa positzione sua, accreschinde su distaccu fintzas a 700 metros dae sos ribales de sos Istados Unidos. Custu sutzessu est arrivadu pustis de unu percursu perfettu, fattu chentza errore perunu cun d’una pretzisione de unu silugianu, chi at tzelebradu sa preparatzione de eccellentzia e sa collaboratzione de sos chi faghent parte de s’echipaggiu.

Sa binchida at permittidu a sa truppa de Luna Ruja de si riscattare pustis de sa partentzia incerta de sa die prima, cando unu guastu elettricu at custrintu sa truppa a si ritirare in sa porfia cuntra de New Zealand. Bell’e chi puru in cussa occasione, sa determina de sa truppa italiana est bessida a pizzu in manera crara, cun d’una reatzione pronta chi at fattu binchere sa porfia contra de sos frantzesos de Orient Express. Sas porfias de preparassione, mancari no serbant po sa classifica finale, tenent un’importantzia manna po isperimentare sas prestassiones de sa barca e de s’echipaggiu. Custas porfias sunt de fundamentu po cumprendere inube si podet mezzorare e si preparare menzus a sas
porfias uffitziales.

Attività realizzata col contributo della Regione Sardegna — IMPRENTAS
2023-2024. LR 22/2018, art. 22

Pinnettos sardos, furriadorzos antigos chi contant sa vida de sos pastores.

Sos pinnettos, sunt intre sas testimonias prus beras de sa Sardigna de campagna e contant una manera de bivere ligada in manera funguda a sa pastoria e s’iscrocca. Ispartos mescamente in sas zuras de intro de s’isula, in manera particulare comente s’Ozzastra, beniant fraigados dae sos pastores comente furriadorzos in su mentres chi passaiant tempus meda in campagna imparis cun sos masones. S’istruttura insoro est simple ma zeniosa:tenent una forma tunda cun d’una base fatta cun pedras e una copertura fatta de rampos e frastamazas intritzadas, a s’ispissu de ghiniperu, impittande solu materiales naturales chi si agattaiant in cussu logu.

Intro, su logu est essentziale ma funtzionale, chi bastaiat pro si amparare dae su frittu,dae su bentu e s’abba,coghinare e costoire sos istrumentos de tribagliu,chena mai essere pensados comente domos abbarrantes ma comente puntos de accottu ligados a sa vida pastorale.

Custos fraigos naschent dae una connoschentzia funguda de s’ambiente e de sos medios suos, inube nudda capitat pro casu: su seperu de sos materiales,sa forma,s’orientamentu, tottu rispondet a esigentzias pratigas e a sa netzessidade de si adattare a cundissiones a s’ispissu diffitziles.Sos pinnettos sunt duncas non solu unu furriadorzu fisicu,ma fintzas unu esempru beru de ecchilibriu intre omine e natura, fraigados chena trastoccare sa bista ma intregandesi intre issa in manera perfetta.

Ancora oe sunt presentes in medas zuras de sa Sardigna, calicunu cusservadu bene, atteros sinzados dae su tempus, e sighint a contare un’istoria fatta de tribagliu, sacriffissiu e vida de donzi die attesu dae sas biddas.In sos urtimos annos est creschida s’attentzione a banda de sa tutela e balorizzassione insoro, cun interventos de recuberu e insertu in caminos naturalisticos e culturales, signu de unu rennoadu attuamentu de su balore insoro istoricu e de s’identidade.

Sos pinnettos non sunt solu fraigos de su passadu, ma conas de una cultura chi at ischidu resistire e si adattare in sos seculos.Costoire custa istrutturas cheret narrere de mantennere biva sa memoria de unu mundu chi at formadu s’identidade de sa Sardigna e chi fintzas oe podet indittare meda.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22