In Casteddu, un’operassione de apprettu delicada est bistdada fatta po sarbare sa vida de una naschidura in cundissiones criticas. Sa pitticca,cuberrada in su Policlinico de Monserrau, teniat bisonzu de curas importantes meda chi li podiat dare solu s’Ispidale Bambin Gesù de Roma.

Po custu motivu, martis passadu, a sero tardu, est bistadu ordiminzadu unu tramudu de urgentzia po Roma.
Bida sa gravidade de sa situassione e sa netzessidade de si movere in presse, est bistadu attivadu unu Falcon de s’Aeronautica Militare, partidu dae s’aeroportu de Roma Ciampino.

Su bolu militare, chi tenet tottu sos ammanios chi serbint po garantire unu controllu de sas cundissiones de sa naschidura, est arrivadu a Elmas in pagu tempus. Una borta arrivadu a Casteddu, su duttore ispecializzadu at leadu in carrigu sa naschidura. In su mentres de su bolu po Roma, sos duttores ant tentu sutta controllu sa naschidura, dandeli tottu sas curas chi serbiant po frimmare sas cunditzione suas in su mentres de su bolu. Gratzias a sa balentia e preparassione de su personale, su bolu est finidu chentza cumplicassiones.

S’aereo est atterradu in Roma a sas 22.00, e inie un’ambulantzia fit giai pronta po che leare sa pizzinnedda in presse meda a s’ispidale Bambin Gesù. Incuddei, sa naschidura est bistada cuberrada e affidada e una cropa de duttores cumpetentes, chi li ant dadu sa curas chi serbint po accomettare sa delicada situassione.

Custa operassione de salvamentu at postu in lughe s’importantzia de s’azzudu de divressas istitutziones, commente su personale de sa sanidade e s’Aeronautica Militare, chi ant tribagliadu imparis po dare a sa naschidura una possibilidade de bivere. Sa lestresa de s’interventu e sa proffessionalidade de sos chi ant partetzipadu sunt bistadas importantes meda po garantire chi sa naschidura poderat retzire sas curas de sas cales teniat bisonzu, evidentziande un’attera borta sa balidia de unu sistema chi funtzionat bene in situassiones de apprettu.

Attività realizzata col contributo della Regione Sardegna — IMPRENTAS 2023-2024. LR 22/2018, art. 22

Passizeris italianos inciassados in Dubai: si chircant bolos po los faghere torrare.

Sunt 563 sos italianos chi si acciappant ancora supra de sa Msc Crociere frimma in su portu de Dubai. Intre issos bi est una truma pitticca de deghe pessonas chi arribant dae Casteddu. Sa cumpanzia est chircande de ordiminzare sa torrada in Italia su prima possibbile, tribagliande po agattare bolos disponibbiles chi pottant faghere torrare a domo tottus sos passizeris.

Po custu motivu sunt bistadas cuntattadas medas cumpanzias aereas internatzionales. S’intentu est de agattare postos supra bolos de linea po permittere a sos passezeris de dassare Dubai e torrare in sos paisos insoro. Intamen sa situassione no est simple e dimandat tempus, pro itte sos collegamentos aereos in cussa zura sunt torrande a incuminzare e sos postos non sunt meda.

Secundu cantu comunicadu dae sa cumpanzia, supra sa nave sa situassione est tranchilla.Sos passezeris istant bene e sighint a rezzire novidades supra su chi est sutzedinde e s’iscumbattu  de ordiminzare sa torrada. In su mentres podent impittare tottu sos servitzios chi bi sunt in sa nave. S’assistentzia a sos passezeris sighit a essere garantida. Sas difficultades printzipales sunt propriu so s’ordimizzasione de sos bolos.

Carchi cumpanzia aerea at pigadu sos collegamentos in sa zura, ma est favoressende sos passezeris chi aiant giai prenotadu sos bolos prima de sos atteros. Custu cheret narrere chi chie teniat prenotassiones fattas dae pagu deppet isettare prus tempus po agattare unu postu disponibbile. Pro custu motivu sa torrada de tottus sos crocieristas dimandat prus dies de su chi si prenettaiat.

Po chircare de essere prus fusidos, sa cumpanzia est baludande fintzas attera solutziones possibbiles. Intre custas bi est s’idea de ordiminzare bolos ispeciales dedicados a sos passezeris de sa nave. Custos bolos diant podere partire non solu dae Dubai, ma fintzas dae atteros aereoportos accanta. In su mentres si sighit a tribagliare imparis cun sas autoridades. S’intentu est de garantire una torrada limpia e sigura po tottu sos passezeris.

In sas dies imbenientes si at a cumprendere menzus cando ant a podere partire sos primos bolos e cando sos biazzadores ant a resessire a torrare a domo.

 Attività realizzata col contributo della Regione Sardegna — IMPRENTAS 2025-2026. LR 22/2018, art. 22