Fintzas Maria Juanna Cherchi, sa nodida cantadora de Bolothene, at detzisu de si azzunghere a sa protesta contra s’apposentamentu de sas palas a bentu, sighinde sas paraulas de s’attora Caterina Murino. In d’unu de sos ispettaculos suos de pagu tempus faghede, Cherchi at usadu su cataffale po ghettare unu nuntzu potente meda contra cussu chi cunsiderat unu arriscu mannu meda po s’iscrocca de sa Sardigna.

“Su destinu de s’Isula nostra est una responsabbilidade chi calat supra de donzunu de nois,” at declaradu Cherchi cun passione. Siat supra de chi bi bistat dae semper, siat supra de chie at seperadu de bennere a bivere innoghe. Oe, sa boghe mia est a su servitziu de custa battalla: no a s’ispeculatzione, no a chie cheret distruere s’iscrocca nostra, no a sas palas a bentu.”

Sa cantadora at sighidu evidentziande s’importantzia de s’unione e de s’accordu in custa battalla.”Bos impreigo, addurammos tottu unidos,” at nadu a su pubbricu. “Deo cherzo dare sa disponibilidade mia a tottus sos chi in custa dies, si sunt occupande de custu mutigu contra su bisestru de s’iscrocca nostra. Sa Sardigna nostra depet essere unu faru de bellesa, arte e musica; est custu chi nos arrendit unicos e pretziados.”

Cherchi pustis at faeddadu cun emossione de su patrimoniu sardu, deffinindelu “ una prenda chi tenet unu valore chi non si podet calculare” e chi non depet essere furadu. “Sa terra est pretziosa, sa Sardigna est pretziosa, e nois ammos ischire commente la diffendere,” at congruidu, retzinde tzoccamanos calentes dae su pubbricu.

Cun custa operassione, Maria Juanna Cherchi at cherfidu non solu presentare su reffudu suo personale contra sos disignos chi cherent ponnere palas a bentu, ma puru muttire s’attentzione de unu pubbricu semper pius mannu, supra s’importantzia de preservare sa bista e sa cultura de sa Sardigna. Custu attu de Cherchi, s’insertat in d’unu movimentu de protesta pius mannu meda, chi est faghinde impignare semper pius zente, appensammentada po su tempus benidore de s’isula insoro. Su contribbudu suo, impare cun cussu de atteras figuras nodidas, commente Caterina Murino, est affortigande sa boghe de tottus contra sas palas a bentu, chircande de influentzare sas detzisiones de sa politica e de s’industria, in manera de diffendere s’ambiente e su patrimoniu culturale de sa Sardigna.

Attività realizzata col contributo della Regione Sardegna — IMPRENTAS 2023-2024. LR 22/2018, art. 22

Pinnettos sardos, furriadorzos antigos chi contant sa vida de sos pastores.

Sos pinnettos, sunt intre sas testimonias prus beras de sa Sardigna de campagna e contant una manera de bivere ligada in manera funguda a sa pastoria e s’iscrocca. Ispartos mescamente in sas zuras de intro de s’isula, in manera particulare comente s’Ozzastra, beniant fraigados dae sos pastores comente furriadorzos in su mentres chi passaiant tempus meda in campagna imparis cun sos masones. S’istruttura insoro est simple ma zeniosa:tenent una forma tunda cun d’una base fatta cun pedras e una copertura fatta de rampos e frastamazas intritzadas, a s’ispissu de ghiniperu, impittande solu materiales naturales chi si agattaiant in cussu logu.

Intro, su logu est essentziale ma funtzionale, chi bastaiat pro si amparare dae su frittu,dae su bentu e s’abba,coghinare e costoire sos istrumentos de tribagliu,chena mai essere pensados comente domos abbarrantes ma comente puntos de accottu ligados a sa vida pastorale.

Custos fraigos naschent dae una connoschentzia funguda de s’ambiente e de sos medios suos, inube nudda capitat pro casu: su seperu de sos materiales,sa forma,s’orientamentu, tottu rispondet a esigentzias pratigas e a sa netzessidade de si adattare a cundissiones a s’ispissu diffitziles.Sos pinnettos sunt duncas non solu unu furriadorzu fisicu,ma fintzas unu esempru beru de ecchilibriu intre omine e natura, fraigados chena trastoccare sa bista ma intregandesi intre issa in manera perfetta.

Ancora oe sunt presentes in medas zuras de sa Sardigna, calicunu cusservadu bene, atteros sinzados dae su tempus, e sighint a contare un’istoria fatta de tribagliu, sacriffissiu e vida de donzi die attesu dae sas biddas.In sos urtimos annos est creschida s’attentzione a banda de sa tutela e balorizzassione insoro, cun interventos de recuberu e insertu in caminos naturalisticos e culturales, signu de unu rennoadu attuamentu de su balore insoro istoricu e de s’identidade.

Sos pinnettos non sunt solu fraigos de su passadu, ma conas de una cultura chi at ischidu resistire e si adattare in sos seculos.Costoire custa istrutturas cheret narrere de mantennere biva sa memoria de unu mundu chi at formadu s’identidade de sa Sardigna e chi fintzas oe podet indittare meda.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22