Baunei, chi est posta in sa costa orientale de sa Sardigna in provintza de Nugoro, est una de sas cussorias premiadas cun sas importantes Chimbe Velas de Legambiente e de su Touring Clul Italianu. Custa cussoria ammajosa est nomenada po sas abbas cristallinas e sas bistas chi che bogant s’alenu, chi apparant un’esperientzia unica a tottu sos bisitadores.

Baunei, non si annoditat solu po sa bellesa naturale de sas costas suas, ma puru po s’impignu sou po poderare s’ambiente e tutelare sa divressidade biologica.

Sas plajas de Baunei, cun Cala Goloritzè, Cala Mariolu e Cala Sisine, sunt famadas in tottu su mundu po sa rena bianca e fine e sas abbas trasparentes,chi faghent divennere custa zura, unu paradisu po sos chi amant su mare e sas accabussones sutta de s’abba. Cala Goloritzè, in manera particulare est bistada declarada Monumentu Natzionale Italianu e si podet arribare solu a pè, dande unu contribbudu po preservare sa selesta bellesa sua.

In pius de sas istravanadas plajas, Baunei apparat meda occasiones po sos appassionados de passizzadas e abbenturas. Su Supramonte de Baunei est una zura de monte manna meda chi apparitzat caminos de trekking,canyoning a apperricada. Unu de sos pius connoschidos giughet a su gorroppu, unu de sos canyon pius fungudos d’Europa, una camminada chi donat bistas ispantosas e unu cuntattu derettu cun sa natura agreste de sa Sardigna.

Baunei est puru unu esempru de eccellentzia in su controllu po sustentare s’iscrocca. S’amministrassione locale, e sa comunidade sunt meda impignados po tutelare sas campagnas, po mesu de intziativas chi favoressent su turismu responsabbile e sa costoidura de sos benes naturales. Custu impignu si podet biere in su controllu de s’arga, in sas politicas po minimare s’effettu supra de s’ambiente e in sas campagnas po bischidare sos turistas e sos chi bi istant.

Sa reconnoschida de sas Chimbe Velas est unu attestadu de s’impignu de donzi die de Baunei, po preservare e balorizzare su patrimoniu sou naturale.Custu premiu archidosu faghet arribare donzi annu mizas de bisitadores chi disizzant de iscoperrere sos incantos de custa terra, contribbuinde in su mattessi tempus a unu tipu de turismu chi rispettat e diffendet s’ambiente.

Attività realizzata col contributo della Regione Sardegna — IMPRENTAS 2023-2024. LR 22/2018, art. 22

Dae sa presone a su tzinema:s’istoria de Beniamino Zuncheddu divennit unu film.

S’istoria de Beniamino Zuncheddu, unu de sos casos prus graves de faddinu zudissiariu in Italia, at a divennere a sa lestra unu film.Un’istoria longa e prena de dolore chi at sinzadu in manera funguda sa vida de un’omine, adduradu in presone pro prus de trint’annos mancari eppat semper nadu de essere innotzente. Zuncheddu, ex pastore sardu, fuit bistadu arrestadu in su 1991 accusadu de una mattansa in Sinnai, in sa cale fuint bistadas bocchidas tres pessonas e un’attera fuit addurata ferta in manera grae.

In cussu tempus fuit pagu prus che unu piccioccu, ma fuit bistadu cundennadu a sa presone a vida pro mesu de elementos chi in su tempus si sunt iscobiados chena nissuna fidantzia. Pro prus de trint’annos at bividu in daesegus de sas travessas,perdinde sos annos prus importantes de sa vida sua,attesu dae sa famiglia, dae sos affettos e dae cale si siat possibilidade de si fraigare unu tempus benidore. Una vida suspesa, sinzada dae s’isettu e s’isperantzia de podere dimustrare
s’innocentzia sua. Solu in su 2024, pustis de una battalla legale longa, fatta de ricursos e controllos de su protzessu, est arribada s’assolutzione deffinitiva chi at reconnoschidu chi no aiat cummittidu su fattu, torrandeli sa libertade.

Una detzisione chi at atzesu s’attentzione supra s’accadessidu e supra sas responsabbilidades de unu sistema chi, in custu casu, at faddidu in manera grae.Como cust’istoria arribat a su tzinema cun d’unu film chi at a contare non solu su casu personale suo,ma fintzas su pesu umanu e sotziale de una cundenna male
fatta.Sas ripresas si prevedint in Sardigna e su disignu puntat a faghere connoschere a unu pubbricu prus mannu una muda chi at corpadu in manera funguda su pubbricu.

Su film at a contare sa sufferentzia,sa soledade e sa fortza de chie sighit a battallare fintzas cando tottu paret perdidu,poninde a su tzentru sa dignidade de una pessona chi non at mai tzessadu de si decrarare innotzente. A su mattessi tempus,at essere fintzas una manera pro meledare supra cantu siat importante su
tribagliu de sa zustissia e supra cantu siat chidrinu su compidu de atzertare sa veridade.

Cussa de Beniamino Zuncheddu est un’istoria chi andat addia de su casu singulu.Est sa dimustrassione de cantu pottant essere graes sas cusseguentzias de unu errore e de cantu siat diffitzile remediare a su tempus perdidu.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22