Un’attera borta, dae s’Ozzastra arrivat unu esempru chi commovet meda de azzudu e bonu coro. Un’omine de 83 annos, arrivadu in condissiones critigas a s’ispidale Nostra Sennora de sa Mercede de Lanusei, in sas dies passadas, est divennidu s’interprete de un’attu nobbile a pustis de sa morte sua.

Pustis chi sos duttores ant cunfirmadu sa morte sua chi est capitada a sas 16.00 de sero, sa famiglia at dezisu de autorizare sa donassione de su figadu. Gai, dae una perdida dolorosa meda, est naschida un’isperantzia noa de vida po un’attera pessona.

S’omine che fit bistadu leadu a s’ispidale Nostra Sennora de sa Mercede in cundissiones graves meda. Mancari sos duttores eppant fattu tottu su chi fit possibile, s’omine est peoradu arrivande a sa morte, cunfirmada dae sa cummissione mediga in sa cale bi fint su duttore Luigi Ferrai, direttore de s’ispidale de Lanusei,su duttore Francesco Loddo direttore de Anestesia e Rianimazione e su duttore Gianluca Deiana, direttore de Neurologia de s’ispidale de Othieri.

Pustis de aere accassadu su cunsensu de sos familiares, a manzanu chitto, sos duttores de s’ispidale Brotzu de Casteddu, ghiados dae su duttore Fausto Zamboni de su Tzentru Trapianti de su figadu, est arrivada in Lanusei po faghere s’operassione delicada meda e che leare su figadu. Sos duttores de Castedu ant tribagliadu cun s’azzudu de sos duttores de Lanusei, cun Gian Pietro Gusai e tottu sos cumpanzos insoro.

S’operassione delicada e cumplessa, est finida cun d’unu sutzessu, mustrande sa capacidade e sa balentia de s’ispidale ozzastrinu po su compudu de situassiones critigas. Su figadu che l’ant a leare a Casteddu, inube unu malaidu chi est in isettu de approntu de unu figadu novu, l’at a podere retzire. Cun sa possibilidade de bivere una vida nova. Andrea Marras, capu generale de sa ASL de Ozzastra, at evidentziadu s’importantzia de s’accottu retzidu dae sas ASL de Tattari e de Nugoro, chi ant apparitzadu sos espertos insoro po garantire su sutzessu de s’operassione.

Attività realizzata col contributo della Regione Sardegna — IMPRENTAS 2023-2024. LR 22/2018, art. 22

Nora, sa tzittade supra de su mare chi contat sas issidas de sa Sardigna.

Intre sos logos archeologicos prus ammaghiantes de s’isula,sa zura archeologica de Nora est una de sas testimonias prus importantes de s’istoria antiga de sa Sardigna. Posta in sa costa sud-occidentale , in s’iscrocca de Pula, Nora est unu logu inube su tempus passadu ispuntat a pagos passos dae su mare, intre ruinas chi contant seculos de tzivilidade e barattos in su Mediterraneu.

Fundada cun meda probabilidade dae sos Fenicios intre su IX e s’VIII seculu A.C.,Nora est cussiderada una de sas tzittades prus antigas de s’isula. Pustis est divennida unu tzentru punicu importante meda e, prus a tardu,romanu, leande unu rolu istrategicu dae su puntu de bista de sos negossios chi de s’amministrassione. Sa posissione sua,supra de una penisula accarada supra su mare, l’at fatta divennere unu portu naturale e unu puntu de collegamentu de fundamentu intre sa Sardigna e sos atteros caminos de su Mediterraneu.

Passizzande intre sos restos de sa tzittade si podent biere in manera crara sas fases istoricas divressas chi sunt furriadas in su tempus.Intre sos elementos prus de ammaghiu bi est su teatru romanu, una de sas conas de su situ, chi fintzas oe benit impittadu in su mentres de s’istiu pro abbenimentos culturales e ispettaculos. Accanta a su teatru bi sunt sos istabilimentos termales, cun logos dedicados a su relax e sa vida sotziale, e parizzas domos decoradas cun musaigos chi testimonzant su livellu de isviluppu apperricadu dae sa tzittade in su tempus de sos romanos.

Sos caminos sticcados,sos restos de sas cresias e sas istrutturas de su portu contant de una tzittade biva e ordiminzada, inube si intrintzaiant attividades de barattu,religiosas e de donzi die.Interessante meda est su cuartieri punicu, chi custoid sas andalas de sa fase prus antiga de su logu. Unu de sos trattos pius ammaghiantes de Nora est s’appitzicu suo cun su mare. Parte de sa tzittade antiga s’isterriat in sa costa e oe carchi istruttura si agattat sutta de su livellu de s’abba, e si biet solu in carchi occasione.

Custu elementu dat unu contribbudu a faghere divennere su situ unigu, inube archeologia e bista naturale si fundent in d’unu ecchilibriu ammaghiante.Sos iscavos, chi sunt ancora faghinde, sighint a torrare materiales e informatziones novas, arricchinde sa connoschentzia de unu logu chi no at ancora iscoviadu sos segretos suos.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22