Cun sa motivatzione chi “Dante iscretziat s’Islam”, sos babbos e sas mamas de duos istudiantes de un’iscola media de sa provintzia de Treviso, ant dimandadu e alcansadu chi a sos fizzos insoro non li benzat imparada sa famada Divina Commedia de Dante Alighieri, chi po usantzia faghet parte de su curriculum de s’iscola italiana. Sas famiglias pensant chi s’opera non siat cumpatibile cun sa religione islamica insoro.

Sa cosa est incumintzada cando su mastru de italianu at dimandadu a sos istudiantes chi non sighint sas lessiones de religione cattolica de li battire una nota in su diariu po dimandare unu abbisu de sos babbos e sas mamas supra de s’insinzamentu de s’opera de Dante. Duas famiglias ant espressadu sa contrariedade insoro, chi est bistada accollida siat dae su mastru chi dae sa dirigente de s’iscola.

De cunseguentzia, sos duos istudiantes sunt bistados disgarrigados dae sas lessiones supra sa Divina Commedia e derettados a s’istudiu de un’atteru autore, Boccaccio.

Sa dimanda de su mastru est bistada motivada dae problemas chi si fint giai presentados cun atteras famiglias de religione chi non fit cattolica. Cosas commente custa bi sunt bistadas puru in atteras natziones, commente Olanda e Belgio, inue s’opera est bistada traduida po evitare de atzumbare sa dilichesa de sos islamicos. In carchi natzione islamica, sos versos supra de Maometto sunt bistados iscartados. Casi deghe annos faghet, sa Geruh92, un’organissasione de chircadores e proffessioneris chi funt puru espertos in su Cunsizzu Economicu e Sotziale de sas Natziones Unidas, aiat dimandadu de che bogare sa Divina Commedia dae sos programmas de s’Iscola.

Su professore Alberto Pezzè si est dadu de itte faghere supra de su casu de Treviso in d’unu servitziu de su TG de Antenna 3 NordEst, ispiegande chi sa Divina Commedia poded atzumbare sa sensibilidade de sos islamicos, in manera particulare in su cantu numeru 28 de s’Inferru, inube Dante addobiat Maometto e lu cunsiderat unu semenadore de discordias. Fundandesi supra una paristoria chi cun meda probabilidade est naschida in d’unu ambiente rugadu, Dante presentat Maometto commente unu prideru cristianu chi, non resessinde a faghere carriera, tiat aere fundadu una religione noa.

Pezzè at congruidu evidentziande s’importantzia de atzettare su puntu de bista de sos atteros dae donzi parte lompat.

Attività realizzata col contributo della Regione Sardegna — IMPRENTAS 2023-2024. LR 22/2018, art. 22

Casteddu in difficultade: terza derrotta una fattu de s’attera e sa Cremonese si accurtziat.

Su Casteddu est bivinde unu mamentu complicadu meda.S’isquadra at perdidu po sa terza borta una fattu de s’attera e como sa classifica faghet un’attera borta frea. Sas atteras isquadras chi battagliant pro si salvare sunt recuberande puntos, e su vantazu de sos ruju e blau si est minimande semper de prus.

Su peus nuntzu est arrivadu dae Parma, inube sa Cremonese at binchidu.Cun custu risurtadu est arribada a solu tres puntos dae su Casteddu. Custu cheret narrere chi sa battalla po addurare in sa categoria est abberta de su tottu.

Sos numeros de sas urtimas partidas sunt negativos meda. In sas urtimas sette partidas, su Casteddu at leadu solu duos puntos. At perdidu chimbe bortas e pareggiadu duas. Est unu de sos peus risurtados intre sas isquadras chi chircant de si salvare. Eppuru, pagu tempus faghet, sa situsassione pariat divreassa meda: tres binchidas una fattu de s’attera aiant fattu isperare in d’unu finale de istajione prus tranchillu. Pustis de cussu mamentu positivu,peroe, s’isquadra si est frimmada. Fintzas sa sotziedade aiat leadu detzisiones pensande chi su peus esseret passadu, comente sa bendita de Luperto propriu a sa Cremonese, chi como est una cuncurrente diretta.

Sa classifica est ancora intzerta. Fintzas atteras isquadras si podent accostare o binchere su Casteddu. Sa Fiorentina diat podere andare a daenantis, mentres su Lecce podet tennere sos mattessi puntos. Tottu at a dipendere dae sos risurtados de sas partidas imbenientes prima de sa frimmada. Su mese de Aprile at essere importante meda. Su Casteddu at a deppere accomettare su Sassuolo in domo sua e pustis at a giogare in domo contra sa Cremonese. Sunt duas partidas de fundamentu pro cumprendere comente at andare a si accabbare s’istajone.

S’isquadra at a torrare a si allenare martis in Assemini, ma bi ant  essere medas ausentzias. Carchi giogadore est impignadu cun sa natzionale sua, comente Caprile e Palestra cun s’Italia. Fintzas Kilicsoy e Obert non bi ant a essere, gai comente Sulemana e fortzis Litetas, chi no est a su menzus. Unu nuntzu bonu arribat dae Borrelli, chi est recuberande e diat podere giogare dae s’incumintzu de sa prossima partida. Sa torrada sua est importante, pro itte su Casteddu at sinzadu pagu in sas urtimas partidas.

Como su Casteddu non podet prus isbagliare. Serbit una reatzione lestra pro evitare de finire in mesu de sos aggios. Sas partidas imbenientes ant a essere detzisivas pro si salvare.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22