S’istoria chi cummovet de su pizzinnu chi at bidu sa lughe de su mundu, supra de unu bolu de sa cumpanzia AeroMexico, at acciappadu s’attentzione de su mundu, e accabbande supra de tottu sos zornales.

Su fattu chi custu accadessimentu ispantosu siat sutzessu a un’artaria chi impressionat meda, casi 9.000 metros, aggiunghet unu elementu de incredulidade e de incantu a tottu custa muda.

S’assistentzia pronta e sigura chi est bistada dada a sa passizzera raida, dae parte de su duttore de s’aereo e dae su personale, at tentu unu rolu fundamentale po assigurare chi tottu anderat po su menzus, cun d’una fine alligra po tottus sos interessados, po su naschidoriu e po sa mama.

Custu accadessimentu at mustratdu sa fortesa e sa prontesa de ispiritu umanu, po affrontare sas situassiones istravanadas. Cun d’unu gestu de solidariedade e po tzelebrare su 90° anniversariu de sa naschida, sa cumpanzia aerea at abbisadu su donu de 90 billettes de s’aereo a su naschiduriu, bennidu a su mundu propriu supra un’aereo de sa linea AeroMexico. Custa detzisione l’ant leada, non solu po apparare a su naschiduriu e a sa famiglia sua s’occasione de viazzare e iscoperrere su mundu, ma puru po creare unu ligonzu ispetziale de su pizzinnu cun AeroMexico.

Sa cumpanzia aerea at a essere parte fundamentale de s’istoria sua, commente lu est bistada dae sos primos momentos de sa vida sua: un’ammentu craru de su cumminzu sou unicu e istravanadu.

Custu gestu de generosidade, est commente unu ponte a banda de unu tempus benidore prenu de iscarmentas de abbenturas, e puru connessuras prenas de signifficu, po custu nou arribadu e sa famiglia sua, chi cunsiderada sa situassione distinta meda, at timidu su peus.

Attività realizzata col contributo della Regione Sardegna — IMPRENTAS 2023-2024. LR 22/2018, art. 22

Portale digitale novu in Nugoro pro mezorare s’impittu de sas meighinas.

Unu sistema digitale novu pro conduire menzus sas meighinas e mezorare sa calidade de sas curas gratzias a un’impittu prus attentu de sos datos. Est custu s’intentu de Duttore Digitale, unu portale creadu pro rendere prus fatzile sa tramuda de informatziones intre dittas sanidarias e duttores e pro minimare sos isperdissios in s’ispesa de sas meighinas.

Sa base permittit de controllare e registrare sas retzettas de sos duttores recoglinde e esaminande sos datos supra de sas meighinas.In custa manera donzi duttore podet biere in manera simple e azzorronada comente faghet sas retzettas e cunfrontare sos datos suos cun cussos de s’Asl. Su disignu est bistadu presentadu in Nugoro in su mentres de unu addobiu ordiminzadu dae s’Asl n.3 imparis a sas zuras sotzio sanidarias. Ant partetzipadu duttores de base, de sos pitzinnos e proffessioneris de sos ambulatorios de s’iscrocca.

Su portale permittit a sos duttores de controllare s’attividade insoro dae su puntu de bista de sos costos e de sas cantidades faghinde sas retzettas cun prus attentzione e bidinde si bi sunt errores o cosas chi no andant bene. Intre sas funtziones printzipales bi sunt bilancios personalizzados e sinnos automaticos chi azzuant a cumprendere si bi sunt differentzias in cunfruntu a sos istandard prevedidos, mezorande su controllu de sas retzettas.

Custu sistema est unu primu passu assa parte de un’impittu prus zustu de sas meighinas cun vantazos siada pro sos malaidos chi podent rezire curas menzus, siada pro su sistema sanidariu chi podet minimare sos affianzos chi si podent evitare e impittare menzus sas disponibilidades. Su portale at azzuare fintzas S’Asl a connoschere in presse meda sos problemas in sas retzettas e intervennere in manera lestra pro garantire un’impittu prus siguru e balidu de sas meighinas.

In afficcu istrumentos comente custos podent dare unu contribbudu a rendere sa sanidade semper prus moderna e accanta a sos bisonzos de sos tzittadinos. S’impittu de sos datos, difattis,permittit de leare detzisiones prus scientes e mezorare s’ordiminzassione de sos servitzios e accottare su tribagliu de sos duttores in su controllu de sos malaidos mescamente in sos casos prus cumplicados. Sa digitalizzassione si cunfirmat gai una leva de fundamentu pro fraigare unu sistema sanidariu prus balidu, agguantabile e capatze de apparare curas de calidade a tottus.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22