In Orroli si cuat una prenda de sa coghina chi unit cun sapientzia su connottu e s’annoamentu: Su Coccoi Pintau cun Sou. Custu pane, chi at binchidu sa medaglia de arghentu a sos campionados italianos de panitzada de su 2024, affigurada un’estremadia de sos mastros, fruttu de sa passione de Simona Prasciolu, una giovana panitzadora sarda.

Su segretu de custu pane ispantosu, est in sa cumposissione perfetta sua.

Fattu tottu cun simula de ranu tostu “Senatore Cappelli” biologicu, chi arrivat solu dae sa filera sarda, e cun matriche naturale e cussinnadu dae sa famiglia de Simona dae pius de tres seculos, Su Coccoi Pintau cun Sou
est su risurtadu de una produssione de mastros artigianos fatta cun cura e passione.

Sa partetzipatzione de Simona Prasciolu a sa bogada a campu de sa Federazione FIPGC, at mustradu unu momentu importante meda po sa panitzada sarda. In d’una cumpetissione allutta meda, Simona at brilladu in mesu de atteros 21 mastros de s’arte bianca chi sunt arrivados dae tottu s’Italia, mustrande, non solu sa calidade de su pane sou, ma puru s’abilidade sua in s’annoamentu e in sa cura de sos particulares.

Su chi rendet unicu su Coccoi Pintau cun Sou est s’impittu de su ranu antigu meda “Senatore Cappelli”, e de sa matriche, chi donat a su pane unu sabore e una fortesa chi non si podent cunfundere. Su seberu de usare solu sustantzias biologicas chi arrivant dae una filera sarda est unu elementu fundamentale in sa produssione de custu pane de eccessione.

Kentos si impegnat a mantennere regulas artas de calidade in tottu sa filera de su ranu tostu “Senatore Cappelli”, poninde a pare pius de 35 massajos, tottu sotzios de Coldiretti,in s’approvistamentu de sas sustantzias.

S’accadessidu de Simona Prasciolu e de su “Coccoi Pintau cun Sou” no est solu una binchida personale, ma puru unu riconnoschimentu de s’importantzia de sa filera de su ranu tostu de sa Sardigna a livellu natzionale. Po mesu de s’impignu e de s’abilidade sua,Simona at contribbuidu a promovera sa tradissione manna de sa panitzada isulana,
apparande in su mattessi tempus una foghe fundamentale po sos talentos zovanos de su logu.

Coldiretti Nugoro-Ozzastra, po mesu de sas paraulas de su Presidente Leonardo Salis e de su direttore Alessandro Serra, tzelebrant su sutzessu de Simona Prasciolu e de Kentos, commente unu motivu de arroddu po s’iscrocca de sa Sardigna. Custos risurtados sunt un’ispinta po sighire a imbestire in sas fileras locales,preservande in su mattessi tempus sas tradissione antigas e favorressende s’annoamentu.

Su “Coccoi Pintau cun Sou” est pius de unu simple pane: est unu simbulu de passione,tradissione e calidade, chi mustrat a su menzus s’estremadìa de sa panitzada sarda.

Attività realizzata col contributo della Regione Sardegna — IMPRENTAS 2023-2024. LR 22/2018, art. 22

Miraculu meigu in su Brotzu: mama e fizu salvados dae una rara infetzione chi los podiat faghere morrere.

Un’operassione meiga desamplada, fatta in s’ispidale Brotzu de Casteddu, at permittidu de salvare una femina zovana raida e su pitzinnu suo dae un de sas infetziones pius graves e raras chi siant mai bistadas rescontradas in sa ginecologia. Sa solutzione, cunsideradu unu casu sanidariu de importantzia mondiale, est bistada pubbricada supra sa Rivista de grandesa iscientifica Case Reports in Women’s Health.

Sa femina, una zovana casteddaja raida dae solu doighi chidas, est arrivada a s’ispidale in cunditziones disisperadas: un’infetzione chi la podiat furminare, unu cuadru de animia grave e una cumplicassione rara meda- una granchena ispabina- poniant a arriscu in pagu tempus sa vida sua e de su pizzinnu. S’operassione in sa parte de Ginecologia de su Brotzu at mustradu unu momentu importante po sa meighina de su tempus nostru, no solu po sas difficultades de su casu, ma po sa prontesa e sa pretzisione cun sa cale est bistadu accomettadu.

A sa base de su cuadru sanidariu bi fit sa “Sindrome di Fournier”, una maladia grave meda chi faghet morrere impresse meda sa petta modde, e chi corpat de pius sos omines che i sas feminas. In custu casu, sa cumparfida sua in andantzia fuit una emergentzia bera chi no si connoschiat, acchessada dae un’atteru problema chi teniat dae prima, sa carentzia de globbulos biancos, chi faghiat divennere s’organismu de sa femina meda debile.

Gratzias a unu atzertamentu de sa maladia lestru e coidau, sos duttores ant potidu faghere a sa lestra un’operassione chirugica de livellu artu meda. S’operassione est bistada controllada dae su proffessore Antonio Macciò, gavacciu de Ginecologia e Ostetricia a s’universidade de Casteddu e direttore de sa Ginecologia Oncologica de s’ispidale Businco, su tribagliu de su team , in su cale bi fuint mastros de partu, silugianos, istudiosos de su sambene e ispecializzados in s’istudiu de sa pedde modde, at permittidu de frimmare s’infetzione e affortigare sas cunditziones de sa malaida.

Attività realizzata col contributo della Regione Sardegna — IMPRENTAS 2024-2025. LR 22/2018, art. 22