Sa muda de sa coppia de Spalding, in su Lincolnshire, Regnu Unidu, sighit a faghere tennere attenzione, bogande interessiu e dibattidu in tottu sa comunidade de cussu logu.

Michael Cartlidge, 39 annos, at incumintzadu unu procedimentu legale contra sa s’ex cumpanza sua Charlotte Cox,37 annos, pustis de aere binchidu una summa manna meda de dinari a su Ratta e Binche. S’accusa? Charlotte tiada aere pigadu po issa tottu sa binchida, chena cunsiderare in manera zusta sa parte sua.

Sicundu cantu at iscrittu su nodidu cuotidianu furisteri The Sun, Michael sustennidi cun fortza meda, de essere bistadu su beru ordiminzeri de s’acchistu de su billettu binchidore, bell’e chi siat bistada Charlotte e faghere su pagamentu. Affirmat de aere ghiadu sa detzisione de tentare sa fortuna cun su Ratta e Binche, pensande de essere su printzipale autore de sa binchida, e pretendinde su dirittu de dividire su premiu in pari partes.

A su cumintzu Charlotte pariat essere de accordu supra sa divisione, ma carchi chida pustis de sa inchida at detzisu de interrumpere s’appitzicu cun Michael, chena dare nissuna ispiegatzione. Custu at imbudadu Michael a che leare sa chistione a daenanti de sos tribunales.

Sa situassione, cumplicada meda est puru evidentziada dae sas ideas divressas de sos chi tenet s’istangu in su cale est bistadu comporadu su billette chi at binchidu e dae s’operadore de sa National Lottery inglesu, Allwyn. Mentres sos meres pensant chi s’inari teppat essere divisu in pari partes po ambos duos, Allwyn narat chi solu su mere effettivu de su billette, cussu chi at registradu su nomene sou in daesegus de su billette, tenzat su dirittu de dimandare su premiu.

Sa detzisione finale de custa perrica de dirittu, est commo in sas manos de su zuighe, e tottu dassat pensare chi su protzessu pottat durare tempus meda, mentres si chircat de acciappare una solutzione zusta e chi diat suddisfassione a tottu sos chi sunt discutinde. Isettande sa detzisione finale, sa comunidade abbaidat cun interessiu meda e puru cun arreolu, a custu imboju casu legale, chi sighit a tennere tottu cantos cun s’alidu suspesu. Tottus si dimandant, commente at a finire cust’istoria, chi podiat tennere unu simple e cundivisu accabbu alligru.

Attività realizzata col contributo della Regione Sardegna — IMPRENTAS 2023-2024. LR 22/2018, art. 22

Casteddu in difficultade: terza derrotta una fattu de s’attera e sa Cremonese si accurtziat.

Su Casteddu est bivinde unu mamentu complicadu meda.S’isquadra at perdidu po sa terza borta una fattu de s’attera e como sa classifica faghet un’attera borta frea. Sas atteras isquadras chi battagliant pro si salvare sunt recuberande puntos, e su vantazu de sos ruju e blau si est minimande semper de prus.

Su peus nuntzu est arrivadu dae Parma, inube sa Cremonese at binchidu.Cun custu risurtadu est arribada a solu tres puntos dae su Casteddu. Custu cheret narrere chi sa battalla po addurare in sa categoria est abberta de su tottu.

Sos numeros de sas urtimas partidas sunt negativos meda. In sas urtimas sette partidas, su Casteddu at leadu solu duos puntos. At perdidu chimbe bortas e pareggiadu duas. Est unu de sos peus risurtados intre sas isquadras chi chircant de si salvare. Eppuru, pagu tempus faghet, sa situsassione pariat divreassa meda: tres binchidas una fattu de s’attera aiant fattu isperare in d’unu finale de istajione prus tranchillu. Pustis de cussu mamentu positivu,peroe, s’isquadra si est frimmada. Fintzas sa sotziedade aiat leadu detzisiones pensande chi su peus esseret passadu, comente sa bendita de Luperto propriu a sa Cremonese, chi como est una cuncurrente diretta.

Sa classifica est ancora intzerta. Fintzas atteras isquadras si podent accostare o binchere su Casteddu. Sa Fiorentina diat podere andare a daenantis, mentres su Lecce podet tennere sos mattessi puntos. Tottu at a dipendere dae sos risurtados de sas partidas imbenientes prima de sa frimmada. Su mese de Aprile at essere importante meda. Su Casteddu at a deppere accomettare su Sassuolo in domo sua e pustis at a giogare in domo contra sa Cremonese. Sunt duas partidas de fundamentu pro cumprendere comente at andare a si accabbare s’istajone.

S’isquadra at a torrare a si allenare martis in Assemini, ma bi ant  essere medas ausentzias. Carchi giogadore est impignadu cun sa natzionale sua, comente Caprile e Palestra cun s’Italia. Fintzas Kilicsoy e Obert non bi ant a essere, gai comente Sulemana e fortzis Litetas, chi no est a su menzus. Unu nuntzu bonu arribat dae Borrelli, chi est recuberande e diat podere giogare dae s’incumintzu de sa prossima partida. Sa torrada sua est importante, pro itte su Casteddu at sinzadu pagu in sas urtimas partidas.

Como su Casteddu non podet prus isbagliare. Serbit una reatzione lestra pro evitare de finire in mesu de sos aggios. Sas partidas imbenientes ant a essere detzisivas pro si salvare.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22