Una disgrassia chi at corpadu in manera tosta s’ispidale Santu Jacopo de Pistoia in sas urtimas oras, cando Laura Porta,un’infermiera de 37 annos naschida in Bolotana, at tentu cumplicassiones chi tott’in dunu l’ant fatta morrere, cando fit raida de 8 meses.

Bellecchì sos isfortzos de su personale meigu de s’ispidale toscanu,Laura est morta a pagu tempus dae essere bistada cuberrada in cundiziones critigas.Bell’e gai, gratzias a sa lestesa e cumpetentzia de sos duttores, su naschiduru est bistadu fattu naschere e commo est cuberradu in cunditziones graves in s’ispidale Mayer de Firenze.

Sa disgrassia si est consumada in su merie de dominiga, cando Laura Porta, chi tribagliaiat commente infermiera in sa presone de sa Dogaia, ma fit in dommo po sa madernidade, si est intesa male in domo sua. Sos famigliares ant dimandadu s’interventu de su serviziu de emergenzia 118, chi che at leadu sa femina a s’ispidale de Pistoia. Bellechì sos isfortzos chi sunt durados parizzu tempus, da parte de tottu su personale meigu, sas cunditziones de Laura, sunt adduradas graves meda, e sa femina atperdidu sa vida su sero de sa mattessi die, in s’unidade de cura intensiva de s’ispidale.

Cando sos meigos, ant bidu sa situazione grave meda, ant dezisu de faghere un’interventu de urgentzia abberinde sa entre de sa femina, po tentare de sarbare sa vida de su naschiduru chi fit intro. Cun dolu mannu, bell’e chi tottu sos isforzos dispensados, sa vida de sa femina non est bistada salvada. Su coro si est frimmadu a sas 22.00. Laura Porta, naschida in Bolotana, dassat una famiglia e una comunidade, istrassiadas dae su dolore. Su sindigu de Bolotana, Frantziscu Manconi, at espressadu sas pesames prus francas a sa famiglia e at evidentziadu s’affettu artu chi sa comunidade Bolotanesa teniat pro Laura.

S’Asl at assiguradu de aere fattu tottu cussu chi est bistadu possibile po tentare de sarbare sa vida de sa femina de 37 annos, ma a dolu mannu sos isforzos non sunt serbidos a nudda. Tottu custu at iscutzinadu parizzu tottu sos chi connoschiant Laura e sa famiglia sua, lassande unu boidu artu meda in sa comunidade.

Attività realizzata col contributo della Regione Sardegna — IMPRENTAS 2023-2024. LR 22/2018, art. 22

Elettrocavu Luvula-Garteddi, sighint sos tribaglios de Terna: imbestimentu de 50 miliones po mezorare sa retza elettrica.

Sighint sos tribaglios de Terna po fraigare su Elettrocavu novu cun cavu sutta de terra longu 19 kilometros chi at a collegare sas cabinas primarzas de Luvula e Garteddi. S’opera faghet parte de sos interventos po affortigare sa retza elettrica locale e at a permittere de la faghet divennere prus balente e sigura. Pro faghere sos tribaglios, sa sotziedade at imbestidu casi 50 miliones de euros. Su collegamentu novu at a dare sustentamentu elettricu in prus a sa cabina primarza de Garteddi chi oe est collegada a sa retza elettrica natzionale po mesu de unu solu elettrocavu.

Pro cantu pertoccat sos tribaglios, los sunt faghinde in sa carrela provintziale 25 e sos cantieris de su lotto 1 e 2 in su trettu chi andat dae su’iscansada de Luvula fintzas a Garteddi. Sos tribaglios sunt andande a daenantis segundu su programma chi si prevediat. Una prima parte at essere finida intro lampadas 2026 mentres
sa fine de sos tribaglios si prevedit intre sa prima metade de su 2027. In su mentres de sos tribaglios po garantire sa siguresa est bistadu netzessariu istringhere sa carrela faghinde passare sas macchinas cun su traffigu regoladu dae unu semafforu.

A sa congruida de sos tribaglios sa sotziedade at a torrare a faghere s’isfaltu in tottu su trettu de sa carrela interessada dae su cantieri. S’abberu de s’opera est bistada deffinida po mesu de unu caminu de cunfrontu cun sas amministratziones locales. In sos primos mamentos su trassadu de su cavu interradu est bistadu istudiadu imparis cun sos entes interessados cun s’intentu de minimare cantu prus est possibile problemas po s’iscrocca e s’ambiente e rispettare sas esigentzias de sas attividades de sa laurantza. S’elletrocavu novu at a passare mescamente accanta a atteras operas chi giai esistint comente carrelas istatales e provintziales minimande sas intromissiones cun sas zuras de majore balore naduralisticu e de bista de sa zura.

Custu interventu est unu passu importante po affortigare sa retza elettrica de s’iscrocca cun beneffissios isettados po sa continuidade de su servitziu e prus siguresa in su faghere arribare prus energia po sas comunidades locales.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22