Torrana supra de su cataffale de sa musica italiana, po contare su presente, cun sa oghe insoro affilada e s’armudiu chi istrasinada. Sos Istentales, sa truppa etno-pop de sos massajos e pastores pius accramados de sa Sardigna, torrana cun “Zustissia Mala”- Libertade negada” una cantone de Gigi Sanna, su grande capu de sa truppa, chi contat sa dolorosa muda zuditziaria de Beniamino Zuncheddu, chi at passadu 33 annos in presone, po s’istragu de Sinnai de s’8 de bennarzu 1991, in sa cale tres vidas sunt bistadas segadas, e una sola fit iscampada po meraculu, diventande testimonzu crae, de cussa disgrassia, cunfidande de essere bistadu cunbinchidu dae unu de sas fortzas de s’ordine a
reconnoschere issu commente s’assassinu.

Po mesu de sa boghe intrante de Gigi Sanna e sas notas chi abbortigana de Davide Guiso,”Zustissia Mala- Libertade negada” si pesat commente unu affissu appassionadu e unu donu a un’omine chi at pagadu su prezziu pius artu: perdere sa libertade. Sos Istentales, dae sempere accommettana sos temas pius buddidos de sa Sardigna: secuestros de pessones ,emigrassione, vindittas, ingendrande cun arrenegu e cun attuamentu sos dannos mannos chi cajonant a s’immagine de s’isula.

Su nomene Istentales, no est una tradussione a sa littera, ma ammentat sa figura de un’istedda de sa costellazione de sos bastones de sos tres Res, chi unu tempus fit usada dae sos pastores e dae sos massajos, commente ghia po sa semenadura. Est sa prima istedda chi bessidi a su inchinadorzu e s’urtima chi si che andada a s’arbeschida, simbulu de isperantzia e orientamentu.

In 25 annos de attividade, sa truppa nugoresa, at fittadu medas cantones e at giuttu sa musica sua in giru in sas presones in Sardigna e puru in su restu de s’Italia, arribande in logos commente Spoleto ,Casteddu, Milano,
Padova, Volterra, Tattari e Nugoro. Ant puru pubblicadu unu libbru chi chistionat de s’esperienzia de sa presone,trasformande sa musica insoro in d’unu mediu de fughida e de isperantzia.

In sos annos, sos Istentales ant tribagliadu puru cun artistas famados meda,commente Nomadi, Vecchioni, Finardi, Bertoli, Tullio De Piscopo, Modena City Ramblers, Elio delle Storie Tese e Cristiano De Andrè. Sa truppa, cumposta dae Gigi Sanna, Luca Floris a sa batteria, Sandro Canova a sa chiterra basso e Frantzisca Lai a sos cussertos, si est annodittada po sos nuntzos insoro, meda beros chi rifrettene sa vida de onzi die e sas tradissiones de sa Sardigna, chin d’una franchesa e una derettura chi corpant derettu a su coro.

Attività realizzata col contributo della Regione Sardegna — IMPRENTAS 2023-2024. LR 22/2018, art. 22

Portu Turres, torrat pustis de 8 annos sa protzessione de su connottu e sa benedissione de su mare.

Pustis de un’interrussione durada otto annos, torrat in Portu Turres unu de sos momenstos pius intesos e figurativu de sa Festha Manna: sa protzessione de s’usantzia cun sa tzerimonia de sa benedissione de su mare. Un’affussione cara meda a sa comunidade locale, chi in su tempus
at mustradu unu ligonzu forte intre fide, istoria e identidade de s’iscrocca.

S’abbenimentu religiosu at essere lunis 9 de lampadas, in occasione de su lunis de Pasca Intecosta, candi finit sa missa de su Pontificale. A dare su nuntzu uffitziale est bistadu munsignore Sarbadore Masia, vicariu de sa basiliga de santu Bainzu, chi at comunicadu cun galabera sa torrada de custu ritu cumone.

Sa protzessione at a partire dae sa millenaria basiliga romanica, at a rugrare prata Marconi e carrela Tattari, sighinde in su cursu Vittorio Emanuele fintzas a arrivare a su portu tzivicu, accanta a sa turre Aragonese. Est propriu innoghe chi si at a tennere su momentu conclusivu, cun sa benedissione de su mare, un’attu carrigu de signifficu chi aunit s’ispiritualidade de sa terra cun cussa de su mare, elementos de fundamentu po sa vida e s’istoria de Portu Turres. Sa tzerimonia, suspesa dae su 2017, est dae sempre sa concruida de sa festa religiosa, chi finit cun su cambiu de sas craes intre sos sindicos de Tattari e Portu Turres. Cust’attu, chi si faghet in daenanti de s’artare de sa basiliga, affortigat su sensu de coperatzione e appartennentzia intre sas duas comunidades, rennovande unu connottu chi affundat sas raighinas in sos seculos.

Addìa su balore religiosu, sa torrada de sa protzessione est fintzas unu signale de isperantzia po una comunidade chi, mancari siat ancora attraessande difficultades po more de sa decadentzia industriale, sighit a chircare carrelas novas po s’incomintzua novu e s’isviluppu. Sa cundivisione de custos momentos tottu paris est un’occasione po affortigare sos ligonzos sotziales e abbaidare a su tempus benidore cun cunfiantza mazore.

Attività realizzata col contributo della Regione Sardegna — IMPRENTAS 2024-2025. LR 22/2018, art. 22