Su compudu de importu de s’A.S.L. n°3 de Nugoro, at dae pagu alcansadu unu finantziamentu importante dae sa Regione Sardigna, peri S’Azienda Regionale de sa Salude, po casi 10 miliones de euros. De custa summa, casi 7 miliones sunt bistados giai finantziados, marcande unu passu in daenanti importante meda, in sa modernidade e su potentziamentu de sas macchinas de sos ispidales e de s’iscrocca laccanarza.

Custa initziativa punnat a rennoare e afforticare s’offerta de sa sanidade locale, po mesu de s’accabbamentu e s’ammanizu de sa retza sociosanitaria de s’iscrocca, e puru su annoamentu de sas macchinas meigas de s’ispidale. In mesu de sas primas initziativas chi ant retzidu su finantziamentu, si annodittada su potentziamentu de s’ecografia de urtimu ingendru in 7 tzentros de sanidade de medas partes, in mesu de sas cales bi sunt Bitzi, Macumere,Orosei e atteras.

Su annoamentu de sas macchinas de sos ispidales, si at a cuncentrare puru supra de sas noas tzentrales de remirare sas partes crae, commente Torpore,Rianimassione,De su coro e de su Sistema nervosu e Utic, chi ant a retzire unu angiografo digitale de urtimu ingendru, mezzorande meda meda sas proceduras de cardiologia interventistica.

Ma s’azzorronarentu non si frimat inoche. Sos arroglios po sas operassiones de Nugoro e de Santu Camillu de Sorgono, ant a retzire benefissios dae sos noas mesas po sas operassiones e colunnas laparoscopicas 3D, mezzorande sa calidade de sas operassiones chi siant de urgentzia oppuru ordiminzadas. Custu mustrat unu passu in addaenanti importante meda po s’Ispidale santu Camillu, chi at bidu una torrada a bida in su campu de sa silugiania prozettada in sos urtimos meses.

Est naturale chi, in d’unu cuntestu de annoamentu de sa tecnologia, non podiat mancare s’attentzione a sa setzione de Diagnostica po figuras. Sa Radiologia de su Santu Frantziscu commo disponnede de unu tomografu nou assiale computerizzadu chi est abile po faghere esamenes lestros, usande s’intelligentzia artifissiale, po minimare sas doses de radiatziones e dare sa calidade zusta de sas figuras. Custu cheret narrere risurtados pius precisos e tempos de baludatziones curtzos, chi est fundamentale cando bi est un’apprettu.

Resuminde, s’A.S.L. n°3 de Nugoro, si est movinde cun determinu, po unu tempus benidore prus avantzadu e prus balente in su campu de sa sanidade, gratzias a imbestimentos punnados e chi sunt de continu a sa cherta de novidades de sa tecnica.

Attività realizzata col contributo della Regione Sardegna — IMPRENTAS 2023- 2024. LR 22/2018, art. 22

Pinnettos sardos, furriadorzos antigos chi contant sa vida de sos pastores.

Sos pinnettos, sunt intre sas testimonias prus beras de sa Sardigna de campagna e contant una manera de bivere ligada in manera funguda a sa pastoria e s’iscrocca. Ispartos mescamente in sas zuras de intro de s’isula, in manera particulare comente s’Ozzastra, beniant fraigados dae sos pastores comente furriadorzos in su mentres chi passaiant tempus meda in campagna imparis cun sos masones. S’istruttura insoro est simple ma zeniosa:tenent una forma tunda cun d’una base fatta cun pedras e una copertura fatta de rampos e frastamazas intritzadas, a s’ispissu de ghiniperu, impittande solu materiales naturales chi si agattaiant in cussu logu.

Intro, su logu est essentziale ma funtzionale, chi bastaiat pro si amparare dae su frittu,dae su bentu e s’abba,coghinare e costoire sos istrumentos de tribagliu,chena mai essere pensados comente domos abbarrantes ma comente puntos de accottu ligados a sa vida pastorale.

Custos fraigos naschent dae una connoschentzia funguda de s’ambiente e de sos medios suos, inube nudda capitat pro casu: su seperu de sos materiales,sa forma,s’orientamentu, tottu rispondet a esigentzias pratigas e a sa netzessidade de si adattare a cundissiones a s’ispissu diffitziles.Sos pinnettos sunt duncas non solu unu furriadorzu fisicu,ma fintzas unu esempru beru de ecchilibriu intre omine e natura, fraigados chena trastoccare sa bista ma intregandesi intre issa in manera perfetta.

Ancora oe sunt presentes in medas zuras de sa Sardigna, calicunu cusservadu bene, atteros sinzados dae su tempus, e sighint a contare un’istoria fatta de tribagliu, sacriffissiu e vida de donzi die attesu dae sas biddas.In sos urtimos annos est creschida s’attentzione a banda de sa tutela e balorizzassione insoro, cun interventos de recuberu e insertu in caminos naturalisticos e culturales, signu de unu rennoadu attuamentu de su balore insoro istoricu e de s’identidade.

Sos pinnettos non sunt solu fraigos de su passadu, ma conas de una cultura chi at ischidu resistire e si adattare in sos seculos.Costoire custa istrutturas cheret narrere de mantennere biva sa memoria de unu mundu chi at formadu s’identidade de sa Sardigna e chi fintzas oe podet indittare meda.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22