Sa A.S.L. de s’Ozzastra, at postu in evidentzia, chi po commo non bi est nissunu allarme po s’influentzia in custu logu, mancari in custa urtimas dies, si siana intesas paritzas notissias diffundidas dae sos giornales, sas televisiones e sas radios chi faeddaiana de unu aumentu mannu de custu problema.

Sa A.S.L. at cunfirmadu chi po commo bi sunu solu duas personas chi sunu cuberradas in su repartu de Terapia Intensiva e chi tenene sa prummonite chi est bistada causada dae unu virus de s’infuentzia, connoschidu commente tipu A, e atteras tres sunu cuberradas in su repartu de Meighina.

Sos tzittadinos, sunt bistados invitados dae sos espertos a faghere attentzione meda, teninde in cunsideru sos signales de s’influentzia commente sa rinorrea, sa sanzina, su tussiu, sa frebba, su de s’intendere male,sa francusina. Carchi orta si podet verificare finzas difficultade de s’alenu, chi toccat de cunsiderare commente chi sonede unu allarme, mescamente cando s’infetzione leada sa parte pius bassa de s’alenu faghinde arrivare sa prummonite de s’influentzia.

Sa A.S.L. de s’Ozzastra hat postu in evidentzia chi su vatzinu po s’influentzia, po commo est s’unica manera chi potat funtzionare po faghere sa preventzione de s’influentzia e po evitare chi arrivede sa forma pius grave.

Si cunsizzada de si faghere su vatzinu in cale si siada momentu, mancari s’istagione de s’influentzia siada giai andada a daenanti. Po faghere preventzione e frimmare sa diffusione de su virus, est cunsizzadu de pigare praticas de s’alenu bonas e de si sammunare dogna fiscia, sas manos, mescamente a poi de essere bistados in logos inue bi est meda zente e essende a cuntattu cun atteras personas.

Si ammentat puru, chi sa vatzinazione est cunsizzada a chie tenet una edade de pius de sessantachimbe annos, a cusssos chi benin cunsiderados chidrinos, sas feminas raidas, o chi eppana appena illirtidu, sos chi sunu in ispidale dae parizzu tempus, chi tenene maladias cronigas, maladias de su coro e de s’alenu, problemas a su sistema francu e finzas carchi categoria de tribagliadores, in mesu de sos cales de siguru sos chi tribagliana in sos ispidales, sas fortzas de s’ordine, sos vigiles de su fogu, sos pastores e cussos chi tribagliana cun sos animales, e finzas sos chi dana su sambene.

Po sos vatzinos, sa A.S.L. de s’Ozzastra at pretzisadu chi est possibile de si los faghere dae su duttore de famiglia, oppuru in sos centros vatzinales de s’ A.S.L., cun orarios cuncordados in Tortoilli su merculisi, in Jertzu sa gioggia e in Lanusè sa chenapura.

De sicuru un manera bona meda, cussa chi passat po sa prevensione, po tennere sutta de cuntrollu s’influentzia e calare sa pressione supra de sos ispidales e sos duttores de base.

Attività realizzata col contributo della Regione Sardegna — IMPRENTAS 2023-2024. LR 22/2018, art. 22

Pinnettos sardos, furriadorzos antigos chi contant sa vida de sos pastores.

Sos pinnettos, sunt intre sas testimonias prus beras de sa Sardigna de campagna e contant una manera de bivere ligada in manera funguda a sa pastoria e s’iscrocca. Ispartos mescamente in sas zuras de intro de s’isula, in manera particulare comente s’Ozzastra, beniant fraigados dae sos pastores comente furriadorzos in su mentres chi passaiant tempus meda in campagna imparis cun sos masones. S’istruttura insoro est simple ma zeniosa:tenent una forma tunda cun d’una base fatta cun pedras e una copertura fatta de rampos e frastamazas intritzadas, a s’ispissu de ghiniperu, impittande solu materiales naturales chi si agattaiant in cussu logu.

Intro, su logu est essentziale ma funtzionale, chi bastaiat pro si amparare dae su frittu,dae su bentu e s’abba,coghinare e costoire sos istrumentos de tribagliu,chena mai essere pensados comente domos abbarrantes ma comente puntos de accottu ligados a sa vida pastorale.

Custos fraigos naschent dae una connoschentzia funguda de s’ambiente e de sos medios suos, inube nudda capitat pro casu: su seperu de sos materiales,sa forma,s’orientamentu, tottu rispondet a esigentzias pratigas e a sa netzessidade de si adattare a cundissiones a s’ispissu diffitziles.Sos pinnettos sunt duncas non solu unu furriadorzu fisicu,ma fintzas unu esempru beru de ecchilibriu intre omine e natura, fraigados chena trastoccare sa bista ma intregandesi intre issa in manera perfetta.

Ancora oe sunt presentes in medas zuras de sa Sardigna, calicunu cusservadu bene, atteros sinzados dae su tempus, e sighint a contare un’istoria fatta de tribagliu, sacriffissiu e vida de donzi die attesu dae sas biddas.In sos urtimos annos est creschida s’attentzione a banda de sa tutela e balorizzassione insoro, cun interventos de recuberu e insertu in caminos naturalisticos e culturales, signu de unu rennoadu attuamentu de su balore insoro istoricu e de s’identidade.

Sos pinnettos non sunt solu fraigos de su passadu, ma conas de una cultura chi at ischidu resistire e si adattare in sos seculos.Costoire custa istrutturas cheret narrere de mantennere biva sa memoria de unu mundu chi at formadu s’identidade de sa Sardigna e chi fintzas oe podet indittare meda.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22