Custu contu lompet dae sos Istados Unidos acanta  un’òmine aiat pedidu a sa cumpàngia de no iscòviare nudda a nemos de sa bìnchida manna, ma issa at trogadu totu mutende a su telèfonu sos babbos de issu. Su binchidore de sa loteria l’at denuntziada pedende·li 100 mìgia dòllaros.

Su binchidore de unu de sos prèmios de sa loteria prus mannos de sos Istados Unidos, prus a mancu 1.35 milliardos de dòllaros, at fatu de totu pro no iscoviare a nemos custa bìnchida manna e pro tènnere su segretu su prus tempus  possìbile, sena lu nàrrere nemancu a su babbu e a sa mama. Ma calicuna cosa però no est andada comente issu pensaiat. Difatis no aiat pensadu a sa ex cumpàngia sua chi a iscusi de issu at naradu a sos  ex ghènneros chi su fìgiu fiat milliardàriu. Issu tando l’at fatu càusa  in tribunale. Mancu a lu nàrrere, s’stòria arribbat dae sos Istados Unidos, est a nàrrere dae su Maine,  ue su fortunadu binchidore de sa loteria Mega Millions at denuntziadu a sa mamma de sa fìgia de àere iscoviadu de sa bìnchida a sos babbos suos. Difatis s’òmine aiat fatu firmare a s’ex pubidda un’acòrdiu acanta poniat a giura de non nàrrere a nemos de sa bìnchida fortunosa.  Sa fèmina però no est abarrada in su faeddu e pro cussu s’ex cumpàngiu at presentadu càusa a su tribunale de Portland,  pedende li unu risartzimentu de 100 mìgia dòllaros.

S’identidade sua fiat abarrada acuada pro prus de unu mese, finas a freàrgiu cando s’est presentadu pro retirare su prèmiu, su de bator prèmios prus mannu in s’istòria de sos Istados Unidos, e at iscobertu chi sa cumpàngia betza no aiat poderadu su segretu. Issu aiat seberadu de abarrare anònimu e de nde fàghere retirare sa summa dae una sotziedade imbetzes de lu retzire a derramas in una pariga de annos.

Pro fàghere in custa manera at dèpidu renuntziare a una parte de su dinare, ma s’iscopu fiat su de non fàghere connòschere a nemos s’identidade sua, mancu a sos babbos.  Mèrcuris coladu unu giùighe at acollidu sa recherta de s’òmine de andare a in antis cun sa càusa poderende però semper s’anonimadu, cun su pseudònimu de “John Doe”.  Fintzas sa fèmina at dèvidu acure s’identidade sua, impreende su s’annomìngiu de, “Sara Smith”.

“Attività realizzata col contributo della Regione Sardegna — IMPRENTAS 2022-2023. LR 22/2018, art. 22”

Provìntzias sardas ancora invisìbiles pro s’Istadu: entes operativos ma sena èssere reconnotos a manera ufitziale

Sas Provìntzias noas de Sardigna – Sulcis-Igresienti, Gaddura, Campidanu de Mesu e Ogiastra – sunt oramai una realidade amministrativa cuncreta, cun organismos votados, personale in servìtziu e operatividade cumpleta in su territòriu. Nointames, pro s’Istadu tzentrale, custas istitutziones sighint a no esistire a manera crara. Una cunditzione chi est causende discumbènios, istentos e dannos econòmicos mannos.

Sa chistione l’at pesada su PD cun un’interrogatzione parlamentare chi ponet in evidèntzia s’irregularidade: sa Regione Sardigna at finidu dae ora totu sas protzeduras chi serbint a reconnòschere sas Provìntzias noas, mandende a sos ministèrios cumpetentes sos documentos ufitziales. Nointames, su Guvernu no at ancora assignadu sos còdighes identificativos chi serbint, ne at agiornadu sos database natzionales.

Faltende custos reconnoschimentos formales, b’at efetos graes. Sas Provìntzias noas non podent aprovare sos bilàntzios triennales, non tenent intrada a sos trasferimentos istatales e non podent esigire sos tributos chi lis ispetant. Custu blocu amministrativu, a su chi si vàlutat, càusat una pèrdida de 12 milliones de èuros (prus o mancu) a s’annu, in prus de rallentare sa distributzione de servìtzios essentziales pro sa gente e pro sas impresas.

Su de no èssere iscritas in sos registros ufitziales de s’Istadu, in prus, non permitit de impreare su dinari de su PNRR e de su Fundu de Isvilupu e Coesione. Sos progetos giai prontos arriscant duncas de abarrare firmos ca bi mancat ebbia su còdighe de s’ente, chi est una cosa chi resurtat sena resone pro territòrios chi ant giai comintzadu sas atividades amministrativas issoro.

Pro su PD, custu est su sìmbulu de sa paràlisi de su Guvernu a cara a s’autonomia sarda. Sas Provìntzias sunt operativas, reconnotas dae sa Regione e dae sa gente, ma sighint a èssere invisìbiles pro s’Istadu, comente chi non s’agatent.

“Attività realizzata con il contributo della Regione Sardegna – IMPRENTAS 2024- 2025.LR22/2018, art.22”