Su 26 de santugaine at a rapresentare una data significativa pro sa comunidade de Ulàssai, ca signat s’inghitzu de su primu laboratòriu de animatzione e Living Lab in s’àmbitu de su progetu “Ulàssai: ue sa natura adobiat s’arte.” Custu progetu, finantziadu dae s’Unione Europea a traessu de su programa NextGenerationEU – PNRR – Lìnia A, est su nùmeru 36 de una sèrie de interventos pro rigenerare sa cultura, sa sotziedade e s’economia de Ulàssai.

Su progetu “Ulàssai: ue sa natura adobiat s’arte” (in italianu Ulassai: dove la natura incontra l’arte) cumprendet 39 interventos mirados a megiorare sa fruibilidade de sos servìtzios presentes in sa bidda.

Su 26 de santugaine 2023 a sas oras 17:00 acanta sa Sala Cunvegnos Helmar Schenk in bia de Iligi ‘e Coco n°9, at a cumintzare su primu addòbiu informativu dedicadu a s’Interventu n°39, mutidu PRINTZIPIARE (intraprendere), chi punnat a sustentare s’imprenditoria locale. Custu addòbiu marcat s’abertura de una sèrie de Partecipatory Labs, pro informare sa comunidade e totus sos interessados a su bandu de 400.000 èuros destinados a agiuare sas impresas chi esistint giai e cussas de costitutzione noa. Sa presentada de custu bandu at a acontèssere a s’agabbu de su tziclu de Living Labs.

Sos Living Labs, rapresentados dae s’Interventu n°36, mirant a ativare laboratòrios e addòbios pro promòvere sa partetzipatzione tzìvica in sa progetatzione, gestione e evolutzione de sos interventos, e peri pro definire sas destinatziones de impreu e progetare solutziones innovativas pro sa valorizatzione de su patrimòniu culturale e ambientale.

Custu interventu s’articulat in bator tziclos de laboratòrios partetzipativos, unu  cada annu dae su 2023 a su 2026. Cada tziclu cumprendet:

Addòbios Informativos e de Mapadura (Participatory Labs): Custos addòbios ant a serbire a sensibilizare sos tzitadinos subra  su progetu e a individuare sos bisòngios e prioridades issoro. In prus, ant a frunire agiornamentos subra sos interventos in corsu e subra de su Progetu Pilota.

Addòbios de Coprogetatzione (Living Labs): Custos addòbios ant a interessare sa comunidade de Ulàssai in protzessos partetzipativos mirados a sos interventos prevìdidos dae su Progetu Pilota. Ant a contribuire a garantire s’evolutzione, sa cuntestualizatzione e sa sustenibilidade in su tempus de sos interventos.

Su sìndigu, Ing. Giovanni Soru, ispiegat chi sos Living Labs ant a èssere basados subra de temàticas ispetzìficas, a sas cales ant a èssere collegados sos interventos. Sas printzipales temàticas de sos Living Labs ant a pertocare sa cultura, s’ambiente, sa sotziedade, sas Smart City  (tzitades intelligentes) e sas Impresas.

 “Attività realizzata col contributo della Regione Sardegna — IMPRENTAS 2022-2023. LR 22/2018, art. 22”

Su decretu Energia a unu passu dae su emmo  allisat sa carrela a s’imbestida de su bentu; Sardigna chentza amparu.

Su decretu Energia est accanta a s’approazione deffinitiva. Pustis de su via libera de su Senadu, su provvidimentu at arribare in pagu tempus a
sa Camera po s’urtimu passazzu de su parlamentu chi at a cussentire s’approazione. Unu camminu chi est faghinde preoccupare meda sa Sardigna
inube creschet sa timoria de un’accreschimentu chentza controllu de sos impiantos de su sole e de su bentu, chentza chi bi siant tutellas po s’iscrocca.

Su decretu, naschidu po apprettare sa colada energetica e minimare sa dipedentzia dae su fossile benit bidu commente un’istrumentu chi minimat su rolu de sas Regiones e de sos entes locales favoressinde Operadores Energeticos mannos natzionales e internatzionales. Sa Sardigna, gratzias a sas calidades de s’ambiente e de su tempus benit cussiderada una de sas iscroccas prus disizzadas po imbestimentos novos e propriu po custu arriscat de tennere sos problemas prus mannos.

Sas regulas novas prevedint protzeduras prus fatziles po s’autorissasione e una minimada de sos controllos locales. Custu diat podere cussentire sa fraigada de impiantos fintzas in logos cun balore mannu de sa bista de sa laurantza cun effettos devastantes supra s’iscrocca e sas comunidades.

In custu cuntestu si affortigat s’impignu de comitados tzivicos, amministradores locales e assotzios chi dimandant istrumentos de amparu prus balidos. A su tzentru de sa dibatta bi est sa proposta de una lezze regionale Pratobello chi puntat a introduire lacanas craras e criterios chi istringhent de prus po fraigare impiantos po su sole e su bentu in s’Isula.

In sas dies imbenientes cun s’accostiare de su votu a sa Camera si prevedint initziativas novas e protestas pubbricas. Su cunfrontu si giogat intre s’esigentzia natzionale de apprettare sa transizione energetica e sa dimanda de prevedire unu disignu chi tenzat contu de sa particularidade de sa Sardigna e de sa tutella de su patrimoniu naturale e culturale suo.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22