Sa Guida 2024 de su Gambero Rosso tzèlebrat sa Sardigna, cun su bellu de 66 atividades retzensidas, de custas 15 intre sos mègius ristorantes. Custos ristorantes si sunt distintos pro àere otentu sos puntègios prus artos, cun un’atentzione particulare a sas provìntzias de Casteddu e Tàtari. In prus, deghe ristorantes noos e tratorias faghent s’intrada ufitziale issoro in sa Guida de ocannu. Pro sa Sardigna si tratat de una satisfatzione manna!

Intre sas novidades, de seguru tocat a remonare sos reconnoschimentos ispetziales cunferidos a Armidda de Abbasanta, chi sighit a poderare is suos Tre Gamberi, e a COGHINA.eat de Casteddu, chi retzit Tre Cocotte. Su prèmiu ispetziale imbetzes Ferzo Wines “Calidade/Prètziu” est istadu assignadu a Josto de Casteddu, unu ristorante chi est nàschidu in su logu in ue a unu tempus bi fiat sa butega de unu mastru de linna e chi oe est  un’ispàtziu cun su design postindustriale cun coghina a bista.

Sa Guida evidèntziat s’etzetzionale crèschida de sa Sardigna in s’iscena gastronòmica italiana, sutaliniende comente  sas atividades de sa regione si siant distintas pro su primore culinàriu issoro. In prus, si notat una crèschida de sas Tres Forchette, su màssimu reconnoschimentu, cun sete premiados noos, su prus de custos s’agatat in su nord Itàlia, ma cun duas etzetziones a su tzentru e a su sud de sa Penìsula. Sa Guida de su Gambero Rosso oferit una variedade de sèberos culinàrios manna pro totu sos gustos e totus sas bugiacas, donende cura a sa calidade de su màndigu e fintzas a cantu costat.

Sa Diretore editoriale de sa Guida, Laura Mantovano, at postu in evidèntzia s’importu de avalorare sas s realidades de sa ristoratzione de autore in Itàlia, nointames sos disafios econòmicos e sa netzessidade de modellos noos in su setore. Pagu tempus a oe sa coghina italiana candidada a Patrimòniu Culturale Immateriale de s’Unesco, e sa Guida de su Gambero Rosso sighit a reconnòschere e promòvere su primore culinàriu italianu.

“Attività realizzata col contributo della Regione Sardegna — IMPRENTAS 2022-2023. LR 22/2018, art. 22”

Bentu a prus de 100 km/h, prus de 200 interventos de sos vigiles de su fogu in Sardigna in su fine de chida.

Unu fine de chida de tempus malu meda at proadu sa Sardigna, ferta dae bentu forte meda chi ant binchidu sos 100 km/h e dae un’abbiza meteo po arriscu fintzas de nie in sos montes de su tzentru de s’isula. Sa situassione at creadu problemas in tottue e dimandadu un’interventu importante de sos Vigiles de su Fogu, impignados in prus de 200 operassiones de succursu tennicu lestru supra de tottu s’iscrocca de sa Regione.

Sos problemas prus mannos bi sunt bistados mescamente in sas carrelas,inube sa rutta de medas arbures at creadu difficultades a sas macchinas, e in carchi casu, at intzidiadu sa serrada de carchi carrela. Sunt bistados casi 60 sos interventos fattos po che franghere arbures ruttos o chi funt po nde ruere, chi intzippaint carrelas, marciapes e bintradas de sas domos.

A custos si aggiunghent a su nessi 35 interventos po ponnere in siguresa ligados a su distaccu o s’arriscu de rutta de elementos de sos palattos, commente guarnisiones, teulas, insinzas e cartellones po sa pubblicidade,abbuttinados o movidos dae su bentu forte. In medas biddas bi sunt bistados puru dannos e domos privadas o pubbricas, cun sa netzessidade de allaccanare carchi zura po appartare perigulos a sos tzittadinos.

In su mentres, sos cumandos de sos Vigiles de su Fogu de Casteddu, Tattari, Nugoro e Aristanis sighint a controllare prus de 40 dimandas de operassiones chi sunt ancora in daesegus, cun sas isquadras impignadas chentza si frimmare po intervennere in sos logos prus apprettosos e cun arriscos mannos.

Su tempus malu, accumpanzadu dae s’abbizu meteo po bentu forte e nie in sas zuras prus artas, ad dadu unu contribbudu a cumplicare sas operassiones, in manera particulare in sas zuras de sa parte de intro de s’isula, inube sa minimada de sas temperaduras e sas ispentumadas ant fattu divennere prus diffitziles sas tramudas e sos interventos de succursu.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22