In Paule, a unu caddu est istadu diagnosticada sa Calentura de su Nilo, ma b’at bonas noas pro s’animale. S’Asl de Aristanis at comunicadu chi s’animale, mancari apat isvilupadu sìntomos neurològicos, como ammustrende sinnos de megioru. Sa situatzione est suta controllu, comente at cunfirmadu Enrico Vacca, responsàbile de su setore de sa Sanidade Animale de s’Asl 5 de Aristanis. Vaca at fintzas sutaliniadu s’importu de su vatzinu pro prevènnere su contàgiu de sos animales dae banda de su virus de sa West Nile e at naradu peri chi virus non podet èssere trasmìtidu dae s’animale a s’òmine; sa trasmissione acontesset petzi cun su tzìntzalu.

Su contàgiu de su caddu est istadu signaladu a s’Istitutu Zooprofilàticu de sa Sardigna, chi at informadu s’Asl 5 de Aristanis. In risposta, su Dipartimentu de Preventzione de s’azienda sanitària aristanesa at propostu a su Comunu de Paule de emanare un’ordinàntzia sindacale pro ativare medidas de preventzione lestras e de controllu pro evitare s’ispàinu de su virus tra sos animales e, de cunsighèntzia, a  sas persones. S’ordinàntzia est istada firmada dae su sìndigu e pùblicada in su giassu istitutzionale de su Comunu.

Custu no est su primu casu de Calentura de su Nilo in sa zona. In austu, un’òmine de 72 annos de Siamanna est resurtadu positivu a su virus e est totora ricoveradu in s’ispidale de Sàssari. In su mese de trìulas, fiant istadas agatadas unas cantas tzìntualas positivas in Torregrande e duos corragas  mortas dae unu cassadore in su matessi territòriu de Solarussa. S’annu a in antis, in s’àrea aristanesa, si fiant averguados oto casos de contàgiu umanu de West Nile, de custos a dolu mannu bator aiant causadu sa morte de sos infetados.

S’Azienda Sanitària, a traessu de sa Diretzione e su Dipartimentu de Preventzione, est atuende una campagna de sensibilizatzione interessende mèdicos, pediatras, poliambulatòrios e comunidades sòtziu-assistentziales pro informare sos tzitadinos subra  sas precautziones chi tocat a  adotare contra sas pitzuladuras de su tzìntzalu. Informatziones prus a sa minuda subra de sa Calentura de su Nilo e subra de sas medidas preventivas sunt disponìbiles suta su situ ìnternet de s’Asl 5 de Aristanis.

“Attività realizzata col contributo della Regione Sardegna — IMPRENTAS 2022-2023. LR 22/2018, art. 22”

Nora, sa tzittade supra de su mare chi contat sas issidas de sa Sardigna.

Intre sos logos archeologicos prus ammaghiantes de s’isula,sa zura archeologica de Nora est una de sas testimonias prus importantes de s’istoria antiga de sa Sardigna. Posta in sa costa sud-occidentale , in s’iscrocca de Pula, Nora est unu logu inube su tempus passadu ispuntat a pagos passos dae su mare, intre ruinas chi contant seculos de tzivilidade e barattos in su Mediterraneu.

Fundada cun meda probabilidade dae sos Fenicios intre su IX e s’VIII seculu A.C.,Nora est cussiderada una de sas tzittades prus antigas de s’isula. Pustis est divennida unu tzentru punicu importante meda e, prus a tardu,romanu, leande unu rolu istrategicu dae su puntu de bista de sos negossios chi de s’amministrassione. Sa posissione sua,supra de una penisula accarada supra su mare, l’at fatta divennere unu portu naturale e unu puntu de collegamentu de fundamentu intre sa Sardigna e sos atteros caminos de su Mediterraneu.

Passizzande intre sos restos de sa tzittade si podent biere in manera crara sas fases istoricas divressas chi sunt furriadas in su tempus.Intre sos elementos prus de ammaghiu bi est su teatru romanu, una de sas conas de su situ, chi fintzas oe benit impittadu in su mentres de s’istiu pro abbenimentos culturales e ispettaculos. Accanta a su teatru bi sunt sos istabilimentos termales, cun logos dedicados a su relax e sa vida sotziale, e parizzas domos decoradas cun musaigos chi testimonzant su livellu de isviluppu apperricadu dae sa tzittade in su tempus de sos romanos.

Sos caminos sticcados,sos restos de sas cresias e sas istrutturas de su portu contant de una tzittade biva e ordiminzada, inube si intrintzaiant attividades de barattu,religiosas e de donzi die.Interessante meda est su cuartieri punicu, chi custoid sas andalas de sa fase prus antiga de su logu. Unu de sos trattos pius ammaghiantes de Nora est s’appitzicu suo cun su mare. Parte de sa tzittade antiga s’isterriat in sa costa e oe carchi istruttura si agattat sutta de su livellu de s’abba, e si biet solu in carchi occasione.

Custu elementu dat unu contribbudu a faghere divennere su situ unigu, inube archeologia e bista naturale si fundent in d’unu ecchilibriu ammaghiante.Sos iscavos, chi sunt ancora faghinde, sighint a torrare materiales e informatziones novas, arricchinde sa connoschentzia de unu logu chi no at ancora iscoviadu sos segretos suos.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22