S’istafeta asula de sa 4X100 cunfirmat sa fortza de sos atletas asulos, a pustis de s’oro de sos Giogos de Tòkyo, godàngiant fintzas  su pòdiu mundiale de Budapèst a palas de sos atletas de sos Istados Unidos, ghiados dae Noah Lyles, a su de tres oros a pustis de cussos bintos in sas garas de sprint individuale.

E, torra, sos americanos ant arriscadu de pèrdere su testimòngiu, ma sunt istados sarbados dae Lyles chi at evitadu su vantàgiu de Roberto Rigali, Marcell Jacobs, Lorenzo Patta e Filippo Tortu.  Su tempus finale issoro est istadu de  37.62 (tres tzentèsimos mègius de su tempus fatu in bateria), a palas de sos americanos cun 37.38 e in antis de sa Giamàica, chi at conchistadu su brinzu cun 37.76 mancare tènneret un’iscuadra chi a livellu personale fiat meda mègius de sos asulos.  S’Itàlia de sa velotzidade torrat duncas in su pòdiu a 40 annos dae su mundiale de Helsinki de su 1983, cando Stefano Tilli, Carlo Simionato, Pierfrancesco Pavoni e Pietro Mennea fiant resèssidos a bìnchere sa medalla de prata semper a palas de sos Istados Unidos rapresentados dae Calvin Smith e Carl Lewis, apanigiadu “su fìgiu de su bentu”.

Fatu fatu a su terzu postu de sos òmines est lòmpidu peri su de cuàteru postos de sas fèminas, cun  Dosso, Kaddari, Bongiorni e Pavesi chi in su finale ant cunfirmadu sa positzione de sas semifinales.

A palas de sos Usa, de sa Giamàica e de su Regnu Unidu, sas asulas ant otentu unu resurtadu chi de prus non si podiat pedire, bidos sos cuncurrentes.  Pro s’atlètica italiana est unu resurtadu sena pretzedentes in sas istafetas.

Difatis est sa prima bia chi s’iscuadra asula s’est  cualificada in su 4×100 òmines e 4×400 òmines e fèminas faghende poker, gràtzias a sa dopieta de is istdetas asulas in sas semifinales de sa  4×400 metros.

“Attività realizzata col contributo della Regione Sardegna — IMPRENTAS 2022-2023. LR 22/2018, art. 22”

Referendum supra sa zustissia, itte prevedit sa refforma supra sa cale ant a votare sos italianos.

Su 22 e 23 martu sos italianos ant essere giammados a votare pro detzidere si cambiare carchi parte de sa Costituzione in sa parte de su funtzionamentu de sa magistradura.Supra s’ischeda elettorale bi at essere una dimanda meda cumplicada pro itte bi sunt solu sos numeros de sos articulos de sa Costituzione chi ant essere cambiados, chena ispiegare in manera simple cale sunt sas novidades chi si prevedint.

Su referendum no est pro problemas medas chistionados de sa zustissia italiana, comente sos protzessos longos meda o sa mancantzia de pessonale in sos tribbunales. Su votu si cuntzentrat imbetzes supra s’ordiminzassione de sa magistradura e supra sas regulas de su tribagliu de sos magistrados. Sa refforma prevedit tres cambiamentos printzipales e importantes.

Bidimolos. Su primu est s’ispitzigu intre zuighes e pubbricos ministeros. Oe bintrant in sa magistradura cun su mattessi cuncursu e faghent parte de su mattessi assentu. Cun sa refforma sos duos caminos diant essere divididos in manera deffinitiva. Segundu chie agguantat su cambiamentu custa divisione diat faghere divennere su zuighe prus indipendente in su mamentu in su cale devet dezidere si una pessona est innozente o affartada. Chie est contrariu, invetzes, pensat chi su sistema de oe affiantzet giai ecchilibriu e chi ispitzigare de su tottu  sos duos rolos potat creare difficultades novas.

Su segundu puntu est pro su Cunsizzu Superiore de sa Magistradura, s’organu chi si occupat de sas carrieras de sos magistrados. Sa refforma prevedid de lu ispitzigare in duos: unu dedicadu a sos zuighes e unu a sos pubbricos ministeros. Sos partetzipantes diant essere seperados cun d’unu sorteamentu e non prus cun d’una elessione. S’urtimu cambiamentu est pro su sistema chi dezidit pro sas penalidades a sos magistrados. Sa refforma prevedit sa creassione de unu organismu novu chi si diat occupare propriu solu de custos protzedimentos.

Cun su referendum sos tzittadinos ant deppere seperare si mantennere sas regulas de como o faghere custos cambios in su funtzionamentu de sa magistradura italiana. In sas urtimas chidas custas votassiones ant tentu azzesu su cunfruntu politicu e sas animas de sos partidos.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22