Est sardu su binu biancu prus caru de s’istòria. Semus alleghende de su ConcaEntosa, unu binu chi tenet un’istòria totu sua de contare. Apartenet a unu fìgiu de arte, Emanuele Ragnedda de 39 annos, fìgiu de  Mario Ragnedda chi aiat fundadu (e nd’est abarradu mere finas a s’annu coladu) sa cantina sìmbulu de su Vermentinu de Gallura, Capichera.

Semper in sa cantina de famìlia, Emanuele at mòvidu sos primos passos, acumprende cun seriedade totu sos ruolos: dae s’operaju a su dirigente de su setore èsteru. Prima de sa personalidade forte sua sua e s’ispìritu rebellu, contant sos istùdios in Milanu e in Londra, sos annos colados in Argentina e in sos Istados Unidos.

In su 2016, cando aiat pagu prus de trinta annos, e fintzas a pustis de unu percursu interiore intre partèntzias e torradas dae sa terra istimada sua, sa Sardigna, acò chi est lòmpida sa detzisione balentiosa de lassare s’azienda de famìlia pro si pònnere a prodùere un’interpretatzione personale de Vermentinu “dinàmicu, elètricu, sena ischemas” cambiende prospetivas a 360°. Pro fàghere custu revolutzionat totu. Difatis afidat sos sete ètaros de bìngia de su cumprensòriu de Palau, cara a sa Còrsica, lassados dae su mannoi Andrea, a sa professionalidade de s’enòlogu Piero Tzella, dischente de su maistru mannu Giacomo Tachis, chi at fatu meda pro su binu in Sardigna.

Tra totus sos binos, su prus importante est Isola dei Nuraghi “Disco Volante” 2021: un’òpera masta cun nuscos de silimba, figu morisca, acumpangiados dae  notas minerales . In buca est balente e echilibradu a su tempus matessi, salinu a su puntu de amentare sa càpara. Vinificadu comente in atzàrgiu ebbia, èvocat in su nùmene originale seberadu dae Emanuele, una  pedra manna millenària presente in sa bìngia. Su prètziu de s’ampulla est de 1.300 èuros, su prètziu prus artu de s’istòria pro unu binu biancu italianu. (S’annada 2020 in internèt s’agatat a 880 èuros). E Emanuele, intervistadu dae sos giornalistas chi l’ant dimandadu pro ite custu prètziu at naradu: “Si pagat sa dignidade de sa Sardigna, sena perunu cumpromissu”.

“Attività realizzata col contributo della Regione Sardegna — IMPRENTAS 2022-2023. LR 22/2018, art. 22”

Sartiglia 2026 : connottu, caddos e contierras supra sa siguresa.

Sa Sartiglia de Aristanis torrat a colorare sas carrelas de sa tzittade cun sa sua ispettaculare cursa medievale cun sos caddos, unu de sos abbenimentos  prus ammaghiantes de su Carrasegare sardu. Setzidores caratzados a caddu si disaffiant in sa cursa a s’istedda e in sas parizas, mustrande abilidade e corazzu e muttinde appassionados de folklore e turistas dae tottu s’isula e dae fora. S’ispettaculu, cun raighinas de seculos, mustrat s’identidade culturale aristanesa, ma s’edissione de cust’annu est accumpanzada dae dibattas e contierras ligadas a sa siguresa.

Sas dispostas novas prenettant affianzos comente cascos e gorpettes po sos setzidores, ma sos ordiminzadores narant chi custos obbrigos arriscant de cumpromittere sa parte de su connottu e bisiva de sa Sartiglia, intre costumenes istoricos e caratzas tipicas.

S’amministratzione comunale at avantzadu interpretatziones chi diant permittire de faghere s’abbenimentu chentza revertire sas leghias antigas, mentres sa chistione est bistada discutida fintzas a livellu istitutzionale pro accrarare sas regulas. Sa cosa addurat cristallitzada, cun cussos chi sustentant su connottu chi dimandant de mantennere frimma s’identidade de sa manifestassione e cussos chi sunt interessados a tutelare sos setzidores e sos animales.

Sos Gremios istoricos, assotzios chi mustrant sos Gremios ligados a sa Sartiglia, ant ghettadu appellos po diffendere sa manifestassione in sa forma sua originale. Mancari sas tesones, sos ammanizos andant a daenanti intre proas, bestiduras e costumenes, dae sa frigura de Eleonora de Arborea fintzas a sos isseperos de sas parizas. Sa tzittade bivit unu fermentu chi aunit braga e murighinzu, mentres sa comunidade chircat de abbilantzare rispettu po su conntottu e attentzione a sas regulas novas de siguresa.

Sa Sartiglia addurat gai una frigura de istoria, comunidade e floklore, e sas contierras de cust’annu reflettint s’isfida chidrina de cunciliare su rispettu de su connottu antigu cun sas esigentzias de sa siguresa moderna. Abbenimentos comente sa Sartiglia non sunt solu ispettaculos, ma beros e proprios istrumentos de memoria de tottus e identidade culturale.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22