Su giòvanu tenet àteros bator microchip sutacutàneos, unu de custos pro abèrrere sas ghennas de domo.

Unu pistocu de trintachimbe annos de Rodengo Saiano (Brèscia), Mattia Coffetti, chi traballat in s’àmbitu de sa seguridade informàtica, est su primu italianu a s’èssere fatu impiantare suta de sa pedde unu microchip pro pagare. “Dd’ativu tràmite un’aplicatzione de su telefoneddu. Est simpre de impreare”, at contadu. S’òmine tenet àteros 4 dispositivos eletrònicos incravados suta de sa pedde.

Comente si podet lèghere in s’editzione locale de Il Corriere della Sera, Confetti s’est fatu insertare su primu microchip in su 2019. “Su primu chi apo installadu, su prus ùtile, est unu chip Nfc-rfid chi serbit pro abèrrere sas ghennas, opuru unu portale. Ma fintzas pro registrare sos datos mèdicos, sa carta de identidade, sa tèssera de su traballu e cumpartzire, pro esèmpiu, LinkedIn”, at decraradu su pitzocu.

Pro su chi pertocat sos àteros microchip, Mattia at ispiegadu chi “su segundu est un’aparatu chi podet èssere impreadu pro s’autentificatzione de sos datos bancàrios. Su de tres est unu magnete chi atraet sos metallos e permitet de caturare sos toronìllios in modu de non los pèrdere mentras si faghet calicunu traballu; su de bator est unu led e si l’acùrtzias a unu cavu elètricu s’illùminat”.

Su reperimentu de sos microchip est simpre. “Los còmporo in Internèt e posca b’at tzentros autorizados chi collàborant cun sas aziendas chi los bendent e ti los impiantant. Comente unu piercing – at agiuntu su giòvanu -. Su costu? Dae sos 80 a sos 100 èuros. Imbetzes, cussu pro iscambiare dados e abèrrere portas a inghìriu de 150 èuros e s’ùrtimu chi apo installadu, overas pro fàghere sos pagamentos, 200 èuros”.

“M’aùguro chi custas integratziones òmine-tecnologia potzant èssere galu prus a su servìtziu de sa colletividade e de sa salude. Mi diat pràghere chi resessende a mapare su cherbeddu nostru resesseremus  a risòlvere maladias neurodegenerativas, comente  Parkinson e Alzheimer, cun trastos e modalidades de atzione a ampru raju”, at concruidu Mattia.

“Attività realizzata col contributo della Regione Sardegna — IMPRENTAS 2022-2023. LR 22/2018, art. 22”

Regorta differentziada,Sardigna intre sas primas ma serbit unu passu in prus.

Sa Sardigna si cuffirmat intre sas regiones prus attentas a sa conduida de s’arga. In su 2024 sa regorta differentziada est arrivada a su 76,5% e balet su terzu postu in Italia, in daesegus de Emilia Romagna e Veneto.

S’elementu,presentadu dae Legambiente in su mentres de s’Ecoforum de Casteddu, mustrat una situassione positiva.Intames si registrat una minimada pitticca de sos comunes prus virtudosos e de cussos chi resessint a arrivare a prezenias artas meda de regorta. In d’una parte manna de s’isula sunt oramai diffundidas abitudines bonas in s’isseperu de s’arga, signu chi in sos annos est bistadu fattu unu tribagliu importante dae sas amministratziones e sos tzittadinos. Sa regorta gianna pro gianna e un’attentzione prus manna a sos cumportamentos de donzi die ant dadu unu contribbudu pro mezorare sos risurtados.

A su mattessi tempus addurant ancora trempas de mezoramentu. Carchi tzentru no arribat a sos livellos prevedidos e sighint a faghere prus fatiga,comente Tattari, mancari siant arribande cambiamentos chi diant podere battire menzus resurtados giai in sos annos imbenientes. Intre sas tzittades printzipales si annoditant Aristanis e Nugoro, chi cuffirmant prezenias artas e organizassione bona de su servitziu, divenninde puntu de relata fintzas po sas atteras iscroccas.

Su cuadru chi bessit a pizu est cussu de una regione chi at fattu passos in daenantis importantes, ma chi non si podet permittere de si frimmare. Una parte de s’arga sighit difattis a no essere differentziada e custu pesat siat supra de s’ambiente chi supra sos costos pro sas comunidades. Sa bera porfia como no est solu mantennere sos risurtados segudados, ma los rendere prus pariviles in totta sa Sardigna. Bi sunt iscroccas chi andant bene meda e atteras chi addurant in daesegus: minimare custa differentzias at essere de fundamentu pro mezorare deabberu su sistema.

In giogu non bi est solu una prezenia, ma sa manera cun sa cale si abbidat a su tempus benidore. Mezorare sa derettura de s’arga cheret narrere de minimare su corpu supra de s’ambiente, ma fintzas fraigare comunidades prus scientes e responsabbiles. Est unu caminu chi dimandat continuidade e impignu e seperos craros, pro itte sos resurtados alcansados fintzas a como mustrant chi furriare est possibile, ma solu si si andat a daenantis chena si frimmare.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22