In su 2023, sa noa de s’omossessualidade in su mundu de su fùbbalu diat pàrrere oramai una chistione normale e bene atzetada. Nointames, sas istatìsticas de sos calciadores decrarados omosessuales rivelant una realidade diversa: sunt pagu e nudda, agigu su 0%.

In su martzu de su 2023, Jakub Jankto, calciadore de sa Tzèchia connotu pro sas esperièntzias suas in Itàlia cun Ascoli, Udinese e Sampdoria, aiat annuntziadu a su mundu de èssere omosessuale cun una decraratzione balente: “Chèrgio bìvere sa vida mea  lìberu. Sena timoria. Sena pregiudìtzios. Sena violèntzia. Ma cun amore. So omosessuale e non mi chèrgio prus cuare”. Su vìdeu acanta rivelaiat sa beridade sua fiat istadu cumpartzidu in sas retzas sotziales e aiat tocadu milliones de persones in totu su mundu.

Custu balentiosu passu at fatu de Jakub Jankto su primu calciadore in manera aberta omosessuale a giogare in sa Sèrie A italiana de fùbbalu. Una pedra miliare chi rivelat cantu b’apat galu de fàghere pro rèndere su fùbbalu un’ambiente inclusivu e familiare pro totus, in manera indipendente dae s’orientamentu .

Su caminu cara a su reconnoschimentu de s’omosessualidade in su fùbbalu est istada matanosa e a s’ispissu signada dae episòdios tràgicos. Justin Fashanu, calciadore britànnicu de orìgines nigerianas, fiat istadu su primu a essite a campu in su 1990, ma sa detzisione balentiosa sua fiat istadu acollida cun disamistade e pregiudìtzios. Custa farta de atzetatzione l’aiat giutu a su disisperu, acabbende sa vida sua cun su suitzìdiu in su 1998.

Pro meda tempus, s’omosessualidade in su fùbbalu est istada unu tabù, e medas esponentes importantes ant impreadu limbàgios chi ofendent in contu de su tema. S’esèmpiu de Jankto est importante ca mustrat s’importàntzia de gherrare custas atitudines e creare un’ambiente de respetu e atzetatzione.

Su coràgiu de Jakub Jankto non podet èssere sutavalutadu, mescamente in unu mundu de su fùbbalu galu prenu de istereòtipos e discriminatziones.  Nointames sos progressos, sos disafios abarrant. Sos cummentos in sas retes sotziales a pustis de s’annùntziu de Jankto dimustrant chi b’at galu meda caminu de percùrrere pro lòmpere a sa normalidade e a s’atzetatzione cumpleta. Ma su fatu chi su Casteddu apat seberadu Jankto pro sas abilidades tècnicas suas, sena cunsiderare sa sessualidade sua, est unu signale importante de cambiamentu culturale in su fùbbalu italianu.

“Attività realizzata col contributo della Regione Sardegna — IMPRENTAS 2022-2023. LR 22/2018, art. 22”

Sas isulas de sa Sardigna pius famadas , cantas e cales sunt.

Sas “isulas de s’isula” Carloforte, sant’Antiogu, Sa Madalena, Caprera, Sant’Istevene, Spargi, Budelli e Razzoli, costoini donzuna un’identidade distinta, intritzande nadura e connottu chi faghent divennere unica tottu s’iscrocca de sa Sardigna.

Carloforte e santAntiogu, attesu dae sa costa sud occidentale,frommant s’arcipelago de su Sulcis. Sant’Antiogu est s’isula sarda pius manna, collegada a sa terra dae unu terrinu artifiziale. Inoghe bivent impare mare e istoria: colonia antiga de sos Fenicios, pustis de Cartagine e romana,cunservat testimonzas archeologicas de valore mannu, in mesu de sas calet bi sunt sas necropolis e su thopet.Pagu pius attesu bi est Carloforte, s’unica tzittade de s’isula de santu Predu, fundada in su seculu VXIII dae familias de sa Liguria chi arribaiant dae Tabarca, in Tunisia. Sa limba tabarchina, faeddada a dies de oe est una de sas cosas pius faschinosas de s’isula,imparis a sa coghina, dominada dae su tonnu e dae sas retzettas de mare.

Ispostandesi in su nord de s’isula, a cara de sa costa gadduresa, si abberit s’arcipelago de sa Madalena, unu beru paradisu naturale reconnoschidu comente Parcu Natzionale. S’isula printzipale, sa Madalena, accasazzat sa bidda chi giughet su mattessi numene, cun d’unu portu istoricu e unu tzentru de carreleddas chi contant su passadu ligadu a sos marineris.

A pagos minutos de navigassione si agatat Caprera, ligada a sa memoria de Zuseppe Garibaldi, chi inoghe at passadu sos urtimos annos de sa vida sua. Caprera est puru una zura de valore mannu po s’ambiente, cun andalas chi che leant a sas plajas pitticcas e logos in sos cales sa bista che bogat s’alenu. Intre sas atteras isulas de s’arcipelago si distinghent Sant’Istevene, Santa Maria, Spargi e Razzoli, donzuna cun su carattere sou. Budelli, connoschida in tottu su mundu po sa plaja Rosa est frigura de sa dilighesa e rispettu de s’ambiente: s’intrada a dies de oe est regulada po diffendere s’ambiente.

“Attività realizzata con il contributo della Regione Sardegna – IMPRENTAS 2024- 2025.LR22/2018, art.22”