S’iscritora annùntziat s’unione tzivile cun Lorenzo: “L’amus fatu ‘in articulo mortis’, oramai non damus prus nudda pro seguru”

Michela Murgia e Lorenzo Terenzi si sunt cojuados  in manera tzivile. S’annùntziu est arribadu dae sas retes sotziales de s’iscritora sarda, chi in Instagram at postu unu vìdeu in ue firmat sos paperis paris cun s’amigu, cumpàngiu, ‘maridu’, cussu chi, cando aiat dadu sa noa de sa maladia sua, aiat definidu “un’òmine, ma podiat èssere peri una fèmina”, cussu  “nùmene legale chi pighet sas detzisiones” cando at a bènnere su momentu. Michela Murgia  difatis tenet unu cancru renale a su de bator istàdios, cun metastasi in sos purmones, in sos ossos, a su cherbeddu. Una maladia debilitante, chi in sos ùrtimos tempos l’at custrinta a rinuntziare a sas essidas pùblicas pro mancàntzia “de tempus e de fortzas”.

S’unione tzivile in sa domo noa est acontèssida calicuna die a oe, comente a ispiegat in su  messàgiu publicadu in su contu suo de Instagram. Su finale de su vìdeu, chi tenet comente a sutafundu su petzu Nobody’s Wife de Anouk, non lassat duda: “No est una festa“, iscriet s’autora de Tre Ciotole.

 “L’amus fatu ‘in articulo mortis‘ ca ogni die b’at una complicatzione fìsica diferente, intro e esso dae s’ispidale e oramai non diamus prus nudda pro seguru“. Ma su tumore no la firmat e issa, a 51 annos, continat a fàghere intèndere sa boghe sua in sas retes sotziales, giughende dae in antis s’aficu sotziale e tzivile suo, de iscritora e ativista.

Sa coja cun su fiorentinu Lorenzo Terenzi est una parte de custu impinnu: “L’amus fatu a malagana: si aeremus tentu un’àteru modu pro nos  garantire sos deretos a pare – narat s’iscritora – non diamus èssere mai ricùrridu mai a unu trastu gasi patriarcale e limitadu comente su matrimòniu“.

Su matrimòniu, a pàrrere suo difatis, “nos òbligat a reduire a sa rapresentatzione de sa còpia un’esperièntzia meda prus rica e forte, ue su nùmeru 2 est s’imbesse de su chi semus“.

 “Nudda augùrios, duncas, ca su ritu chi diamus àere chertu galu no esistet” agiunghet s’autora sarda chi no at mai cuadu s’apògiu suo a sas chistiones de sa comunidade Lgbtq+, acantu b’at fintzas sa recherta de su reconnoschimentu de su matrimòniu egualitàriu.

“Attività realizzata col contributo della Regione Sardegna — IMPRENTAS 2022-2023. LR 22/2018, art. 22”

Nùgoro, ghia de su limbàzu incluisivu in s’amministratzione pùbbriga

Nùgoro faghet unu passu istòrigu cara a s’inclusione e a sa paridade: sa Provìntzia de Nùgoro est divènnida su primu ènte pùbbrigu de sa Sardigna a adotare in manera formale s’impreu de su limbàzu de zenia incluisivu in sas normas e sos regolamentos internos suos.

Sa detzisione, approada a s’unanimidade dae su Cunsìzzu provintziale subra propòsta de sa cunsizzera Lisetta Bidoni e cun s’accotzu de su presidente Giuseppe Ciccolini, punnat a prettare discriminatziones grammatigas e culturales, donande prus visibilidade e reconnoschimentu non solu a sas fèminas, ma fintzas a sas personas LGBTIQ+ e a sas identidades de zenia non cufformes a su binàrismu de su connottu.

S’approatzione de sas normas e de su regolamentu cun limbàzu incluisivu est solu su primu passu: sa Provìntzia at annuntziadu chi s’intentu imbeniente est a ispainare s’impreu de su limbàzu de zenia a totu sos atos amministrativos e a sas comunicatziones istituzionales uffitziales. S’impreu de unu limbàzu incluisivu no est solu simbòligu: refletit e influentzat sas relatziones sotziales, sos appitzigos de podere e sas bogadas a campu in intro de una comunidade, dande unu contribbudu a minimare eleghias e prevensiones cuadas e a favoressere prus sensibilidade culturale e respetu pare-pare.

Cun custa iniziativa, Nùgoro si ponet commente abberipista in Sardigna e fortzis unu mòdellu de sighire pro àteros comunos e provìntzias italianas chi cherent sighire polìticas de sa limba e comunicativas incluisivas.

Est a bìdere comente s’adossione operativa s’at a tradùere in sos atos amministrativos benidores e in sa comunicatzione de donzi die cun sa tzittadinàntzia, ma sa mustra rapresentat unu sinnu beru de atentzione cara a sa diversidade e identidade istituzionale in una iscrocca in ue temas de zenia, deretos tziviles e incluisione sunt in su tzentru de meda de sas chistiones sotziales de oe.

Attività realizzata con il contributo della Regione Sardegna – IMPRENTAS 2024- 2025.LR22/2018, art.22”