Unu betzu de 71 annos, primu casu de colera in Sardigna de s’epidèmia de su 1973, est ricoveradu dae belle una chida in Casteddu in su repartu de Maladias infetivas de s’ispidale Santìssima Trinidade. Sas cunditziones suas sunt istàbiles e non presentat prus sìntomos.

Sa situatzione est in su repartu de s’Asl de Casteddu de acordu cun sa de Seddori, dae ue benit su malàidu. A comintzu fiat andadu a si fàghere bisitare dae una guàrdia mèdica de Àrbus (Sud Sardigna) pro istorbos gastrointestinales. At a èssere atuadu unu protocollu de tratzamentu, a contivìgiu de su servìtziu de Igiene pùblica, pro individuare sa cadena de contàgiu in su territòriu de provenièntzia de s’òmine. Cando est arribbadu a su repartu de Maladias infetivas, su pensionadu non fiat grave, sende chi aiat sìntomos lèbios dae diversos meses, paris cun una patologia crònica de s’istentina. “Est bastada una terapia reidratante prus un’antibiotica”, at naradu su primàriu Goffredo Angioni. “Sas cunditziones suas sunt megioradas, duncas dae su puntu de bista clìnicu su malàidu istat mègius. Fortzias at èssere dimìtidu in custas dies”. Su vibrione de su colera est istadu individuadu petzi sa chida colada, a pustis de sos esàmenes fatos a su malàidu.

In generale su perìodu de incubatzione de sa maladia est cùrtzia, “duas-chimbe dies”, ispiegat Angioni. “Su sìntomu clàssicu est sa diarrea; s’arribbat fintzas a 30-40 iscàrrigas a sa die, fintzas de prus, cun emissione de cantidades piticas casa ora”, agiunghet su primàriu de Maladias Infetivas. “Posca faghet a tènnere fintzas calicunu episòdiu de vòmitu, ma in generale non si tenet calentura”.

Su colera podet èssere fintzas asintomàticu. “In sos Paisos ue est endèmicu – comente Ìndia e Sud-est asiàticu – tres casos subra de bator non sunt sintomàticos”, sighit Angioni, chi ammentat sas cunditziones chi podent àere contribuidu a s’essida a campu torra de sa maladia. Unu fatore est su calore.

“Attività realizzata col contributo della Regione Sardegna — IMPRENTAS 2022-2023. LR 22/2018, art. 22”

Ozzastra terra de istoria: sos printzipales sitos archeologicos de bisitare intre nuraghes,biddas antigas e monumentos de sa tzivilidade nuragica.

S’Ozzastra est una de sas zuras de sa Sardigna prus riccas de istoria antiga. In cust’iscrocca si agattant sitos archeologicos meda chi contant sa vida de sas populassiones chi istaiant in s’isula mizza e mizza de annos faghet.

Intre montes, campedas e campagnas si podent biere nuraghes, tumbas de tzigantes, tumbas antigas irfossadas in sa rocca e restos de biddas. Bisitare custos logos est commente faghere unu biazu in su passadu e connoschere menzus s’istoria de sa Sardigna e de sas tzivilidades chi ant bividu s’isula prima de s’arrivu de sos romanos.

Unu de sos sitos prus connoschidos est su Nuraghe Ruinas, chi si agattat in s’iscrocca de Arzana. Custu nuraghe est unu de sos prus artos de sa Sardigna e si agattat in d’una posissione crara dae sa cale si podent biere sos montes de su Gennargentu. In s’iscrocca de Triei si agattat sa Tumba de sos Tzigantes de Osono, unu de sos monumentos de interru prus importantes de s’Ozzastra. Un’atteru situ interessante meda si agattat in s’iscrocca de Bari Sardo, inube bi est su Nuraghe Sellersu. In s’iscrocca de Cardedu si agattat invetzes sa Necropoli de Monte Arista, una zura in sa cale sunt bistadas agattadas tumbas meda irfossadas in sa rocca.

Intre sos sitos prus importantes de s’Ozzastra bi est fintzas su cumplessu archeologicu de s’Ortali’e su Monti, in s’iscrocca de Tortolì. Si trattat de unu de sos sitos prus bisitados de sa zura e accansat monumentos divressos intre sos cales unu nuraghe mannu, una tumba de sos tzigantes e restos de biddas antigas. Importante meda est fintzas su situ archeologicu de s’Arcu ‘ e is Forros, in s’iscrocca de Villagrande Strisaili. Custu logu fuit una bidda nuragica manna chi in passadu teniat fintzas unu rolu religiosu e de negossiu. Sos archeologos ant agattadu restos de cresias, magasinos e buttegas po tribagliare sos metallos.

S’Ozzastra est duncas un terra ricca de testimonzas archeologicas chi permittint de iscoperrere s’istoria prus antiga de sa Sardigna. Sos nuraghes, sas tumbas e sas biddas antigas sunt unu patrimoniu pretziosu meda chi contat s’issida de s’isula. Bisitare custos logos cheret narrere connoschere menzus su tempus passadu.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22