In fines est istada inaugurada in Nora sa mustra de sas òperas de Pinuccio Sciola! Finas a su 31 de santugaine, s’àrea archeològica at a acasagiare s’espositzione intitulada “Pietra su Pietra, memoria litica nel tempo”. Custu progetu, pessadu dae sa Fundatzione Pula Cultura e finantziadu dae su Comunu, in collaboratzione cun sa Fundatzione Sciola, est istadu presentadu custu mangianu durante una cunferèntzia de imprenta.

Ma ite acàpiat Pinuccio Sciola a sa tzitade de Nora? Nora acollit sas òperas de Sciola in unu logu ideale pro s’iscultura, ricu de evocatziones antigas de s’artista, ue sa pedra est istada su materiale fundamentale pro su fàbricu de sas tziviltades chi nos ant lassadu rastros importantes de unu passadu millenàriu. Nora est unu de sos sitos archeològicos prus nòdidos e importantes de sa Sardigna, cun un’istòria maestosa. Fundada comente  tzentru fenìtziu e posca devènnida una tzitade pùnica e romana, tenet finas rastros de presèntzia nuràgica chi atestant una frecuentatzione giai in s’Edade de su Brunzu. Sas òperas de Sciola presentadas in custa mustra cumpartzint s’iscoperta e sa promotzione de sas orìgines antropològicas, culturales, artìsticas e naturales de sa Sardigna. Pro s’artista, sa Sardigna rapresentat s’iscultura prus bella in su coro de su Mediterràneu, unu logu de traditziones artìsticas seculares. S’ìsula e su patrimòniu archeològicu suo duncasunt s su puntu de partèntzia pro su fàbricu de un’identidade in ue tempus coladu e presente s’aunint.

Durante sa cunferèntzia de imprenta sunt intervènnidos su sìndigu de Pula Walter Cabasino, su Diretore Generale de s’Assessoradu regionale de sa Cultura Renato Serra, Chiara Pilo pro sa Soprintendenza Archeològica Tzitade Metropolitana de Casteddu e sas Provìntzias de Aristanis e Sud Sardigna, Maria Sciola e Giulia Pilloni pro sa Fundatzione Sciola, sighidos dae sos interventos de sa Presidente de sa Fundatzione Pinuccio Sciola.

“Attività realizzata col contributo della Regione Sardegna — IMPRENTAS 2022-2023. LR 22/2018, art. 22”

Gramsci e Lussu: duos sardos mannos chi ant sinzadu s’istoria de s’Italia.

Sa Sardigna at dadu sa vida a duas de sas figuras pius influentes de su Noighentos italianu: Antoni Gramsci e Emilio Lussu. Divressos po temperamentu, ma postos impare dae s’impignu tzivile, dae sa passione po sa zustissia sotziale e dae una annaghidura funguda cun sas raighinas isulanas proprias, Gramsci e Lussu ant sinzadu s’istoria politica e culturale de s’Italia, dassande un’eredidade chi est biva e presente puru a dies de oe. Naschidu in Ales in su 1891, Antoni Gramsci est bistadu unu de sos pius mannos istudiosos de su seculu XX.

Fundadore de su Partidu Comunista de Italia in su 1921 e autore de sos tzelebres Cuadernos dae sa Presone, Gramsci at isfroscadu unu pensamentu politicu cumplicadu e originale, tzentradu supra s’idea de dominassione culturale e s’importantzia de s’educatzione de sas massas. Sas ideas suas, trempidas in parte in su mentres de sa presonia longa sutta de su Fascismu, ant influentzadu in manera funguda, non solu sa politica italiana, ma fintzas su pensamentu ratzionale, sotziologicu e formativu a livellu internatzionale.

Mancari attesu dae sa Sardigna po una parte manna de sa vida sua, Gramsci at semper tentu unu ligonzu forte cun sa terra sua.A pagos annos de distantzia, in su 1890, naschiat in Armungia Emilio Lussu, figura de signifficu de s’antifascismu e de su repubblicanesimu italianu. Graduadu in leze e uffitziale in sa prima gherra mondiale, Lussu aiat contadu s’esperientzia de su fronte in su liberu “Un anno sull’altipiano”, memorias de sa gherra.

Fundadore de su Partidu Sardu de Atzione e pustis esponnente importante de su movimentu antifascista “Giustizia e Libertà”, Lussu fit bistadu obbrigadu a su disterru in su mentres chi bi fit Mussolini. Pustis de sa rutta de su fascismu, aiat partetzipadu a torrare a fraigare demograticamente s’Italia. Sa bista sua politica teniat unu sensu fungudu de zustissia sotziale. Gramsci e Lussu, mancari arribberant dae esperientzias divressas ant ambos dadu unu contribbudu a fraigare un’Italia pius cabosa, critiga e democratiga.

Attività realizzata col contributo della Regione Sardegna — IMPRENTAS 2024-2025. LR 22/2018, art. 22