Sa prima borta in s’istòria, sa setzione de sos Pensionados de Coldiretti Nùgoro-Ogliastra at a èssere ghiada dae un’òmine. A pigare su timone est Giuliano Atzeni, 63 annos, bènnidu dae Nurri, giai presidente de sa setzione locale e rapresentante de una famìlia istòrica de allevadores e fantinos. Giuliano est su babbu de Andrea, cunsideradu unu de sos mègius fantinos a livellu internatzionale e binchidore de cumpetitziones importantes de fama mundiale, puru su tziu de Giovanni ‘Tittia’ Atzeni, noe bias binchidore de su Pàliu de Siena. Comente vitzepresidentes sunt istados elègidos Graziella Mulas de Ulìana e Maria Secci de Durgali.

Atzeni s’impinnat a rapresentare totus sos 101 comunos de sa betza provìntzia de Nùgoro e totu sos setores produtivos comente esponente de Coldiretti Pensionados, bènnidu dae su Sarcidanu e dae sa Barbàgia de Seulu. At a èssere su portaboghe de su movimentu de sos giubilados in prena sinergia e collaboratzione istrinta cun totu su cussìgiu. “Torro gràtzias a totus pro s’aficu chi m’ant acordadu. Disìgio espressare unu ringratziamentu ispetziale a sa presidente uscente, Graziella Mulas, a su cussìgiu e a su diretore Epaca, Tonino Paniziutti”, afirmat Atzeni.

Durante sas eletziones, paris cun Murgia, est istadu rinnovadu fintzas su Cussìgiu, assentadu dae 17 membros rapresentantes de totu sas zonas istòricas de sa provìntzia. Sunt istados elègidos fintzas sos 5 revisores.

Sa Federpensionati Coldiretti, aderit a sa Cunfederatzione Natzionale Coldiretti, e ispirat s’atzione pròpia a s’istòria e a sos printzìpios de s’iscola cristianu sotziale. Est una lìbera Organizatzione de categoria, sena finalidade de lucru, e si proponet de rapresentare, tutelare e amparare sos giubilados Coldiretti, ma issos ebbia. Sa Federpensionati Coldiretti rapresentat, difatis, fintzas sos giubilados de totu sas categorias de traballadores chi gravitano in su mundu agrìculu e rurale. In particulare favorit su ruolu ativu de sos betzos, avalorende sas cumpetèntzias e esperièntzias de issos achiridas, in unu cunfrontu intergeneratzionale. Federpensionati Coldiretti est presente in totu Itàlia in sas sedes de s’organizatzione.

“Attività realizzata col contributo della Regione Sardegna — IMPRENTAS 2022-2023. LR 22/2018, art. 22”

Sa Dea Mama: una de sas divinidades prus antigas de sa Sardigna.

Sa Dea Mama est una de sas friguras prus antigas e ammaghiantes de s’istoria de sa Sardigna. Si trattat de una divinidade feminina chi pro sas populassiones de sos tempos antigos mustraiat sa vida, sa naschida e sa saliosidade. Sos archeologos ant acciappidu medas istatueddas chi la mustrant in paritzos sitos de s’isulas, sinzu chi custa frigura teniat unu rolu importante meda in sa religione e sa cultura de sas comunidades antigas. Custos oggettos antigos sunt de mizza e mizza annos faghet, meda prima de sa tzivilidade nuragica.

Sas istatueddas de sa Dea Mama sunt casi semper pitticcas e fattas de terra cotta o in pedra. In casi tottus sas istatuas su corpus femininu est meda evidentziadu, cun tittas, bentre e costazos evidentziados. Custas formas non fuint unu particulare artisticu simple, ma teniant unu signifficu forte meda. Serbiant difattis a mustrare sa capatzidade de sa femina de dare sa vida. Pro sas populassiones antigas sa femina fuit bida comente una frigura sacra pro itte mustraiat sa naschida, sa creschida e s’andare a daenantis de sa comunidade.

In cussu tempus sa vida de sas pessonas fuit ligada a s’istrinta cun sa nadura. Sas comunidades biviant mescamente de laurantza e pesadura e dippendiant de su tottu dae sa saliosidade de sa terra.Si sos campos produiant pagu o si sos animales non proliffigaint, sa vida de sas biddas fuit in perigulu. Po custu motivu, sa saliosidade fuit cussiderada un’elementu de fundamentu e sa Dea Mama mustraiat propriu custa fortza de sa nadura capatze de ingendrare e nudrire sa vida.

Est probabbile chin sas istatueddas benzerent impittadas in su mentres de ritos religiosos o tzerimonias ligadas a sos mamentos prus importantes de sa vida de sa comunidade, comente sa semenadura, su regortu o sa naschida de sos pitzinnos. Pro mesu de custos ritos sas populassiones dimandaiant affianzu, bundantzia de sos regortos e primorosidade po sas biddas.

Sa Dea Mama fuit duncas bida comente una frigura amparadora chi garantiat s’ecchilibriu e su benessere. Intre sos oggettos prus connoschidos bi est sa Dea Mama de Turriga, un’istatuedda in terracotta de su terzu millenniu A.C. Sa frigura est bistada fatta sezzida cun sas manos supra de su bentre, unu gestu chi mustrat in manera crara su tema de sa maternidade e de s’ingendra de sa vida.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22