Su traballu, chi regollet sas chircas subra sas bestimentas antigas de Nùgoro, Orgòsolo, Orune, Òsile e Ceràxius, est istadu sighidu dae Agostino Basile, de su Setòre Cultura de su Comunu de Nùgoro.

Custu merie a sas 17.30, in Nùgoro, in s’Auditòrium de sa Biblioteca Satta, b’est istada sa presentada de su libru “Prendas e bestimentas antigas, Vol. 1”. Su traballu est su resurtadu de su laboratòriu fatu dae Sara Mura de Gavoi subra sas bestimentas antigas de Nùgoro, Orgòsolo, Òsile, Orane e Ceraxus, in s’àmbitu de su progetu Ufìtziu limba sarda – Tzitade de Nùgoro de su Comunu, gestidu dae sa sotziedade Suia. Sas fotografias e gràfica de su libru sunt de Andrea Corda e Alexandra Goddi (Intu Agency).

A sa presentada fiant presetes sos relatore Ignazio Sanna pro Ceràxius, Gavino Farina pro Òsile, Giuliana Pittalis pro Orune, Cecilia Collu pro Orgòsolo, e pro Nùgoro Ivan Costa (a su postu de Marcello Ferreli, ausente pro motivos de istùdiu), totus moderados dae Agostino Basile, funtzionàriu setore cultura de su Comunu de Nùgoro e unu de sos màssimos espertos in Sardigna in contu de costùmenes sardos. Sa presentada est istada aberta dae sos saludos istitutzionales de s’Assessore a sa Cultura e Turismu Salvatore Picconi.

Su libru est frutu de unu laboratòriu previstu in su progetu Una limba in caminu, finantziadu dae sa Lege 482/99 e LR 22 de su 2018, gestidu e coordinadu dae sa sotziedade Suia snc. Su Laboratòriu, dedicadu a totu sos tzitadinos residentes in su Comunu de Nùgoro, at collidu una sèrie de notziones importantes e fundamentales subra de s’istòria, sa cultura e sas dinàmicas sotziales e econòmicas de su pòpulu sardu, gràtzias a s’istùdiu fungudu de sas bestimentas e de sas prendas traditzionale de Nùgoro, Orgòsolo, Orune, Òsile e Ceràxius.

Su laboratòriu at tentu comente tema sa Festa de su Redentore e sas biddas chi pro sèberu personale e pro fide leant parte dae 122 annos a s’eventu: sa festa nugoresa pro primore chi rapresentat, pro totu sa Sardigna, un’addòbiu de importu pro medas resones, non petzi pro s’ispiritualidade sua, ma fintzas a sa promotzione turìstica, culturale e sotziale de sa Tzitade.

Su vestiàriu e sas prendas traditzionales, s’aunint e creant unu acàpiu acàpiu pro avalorare sos bestires e sas prendas de Nùgoro e de Orgòsolo, Orune, Òsile e Ceràxius semper presentes in sa Festa de su Redentore, promovende su connoschimentu de sos nùmenes de sas partes chi cumponent sas bestimentas in sa faeddada locale, sas tècnicas de traballadura e de ricamu, sos nùmenes de sas robas e sa provenièntzia issoro, sas dinàmicas sotziales e culturales.

Su progetu at prevìdidu s’imprenta e sa publicatzione in lìnia de unu primu volùmene e punnat a collire, pro sas annualidades imbenientes, sos datos chi pertocant sas bestimentas e a sas prendas traditzionales de totus sas àteras biddas chi costumant a leare parte a sa Festa de su Redentore.

Inoghe a suta si podet compudare sa versione in lìnia de s’òpera

https://costumenesardos.it/

“Attività realizzata col contributo della Regione Sardegna — IMPRENTAS 2022-2023. LR 22/2018, art. 22”

Sa pratzitta de Portu Cherbu at fattu de curnisa a sa tertza edissione de su Longevity Fest, su primu festival a su mundu tottu dedicadu a sa longa vida. S’abbenimentu, chi si est affirmande in manera lestra commente unu fentomu internatzionale po espertos e appassionados de su tema, est bistadu conduidu dae Ambra Pintore e at apparadu una serana ricca de emossiones e temas de calidade.

S’abbertura est bistada intregada a Pedru Mereu, direttore artisticu de su festival, chi at dadu su benennidos a su pubbricu e at introduidu sos momentos divressos de sa serana. In mesu de custos, unu de sos pius de signifficu est bistadu s’intregu de su Longevity Award a Giulio Mogol, tzelebre commente autore. Custu riconnoschimentu, chi rappresentat sabidoria e vivesa, est bistadu intregadu dae su proffessore Gianni Pes , connoscidu po s’iscoperta de sas Blue Zones, sos logos de su mundu inube sas pessones bivent de pius.

Sa serana est andada a daenanti cun sa presentazione de su documentariu “Arzachentos”, affiladu dae su mattessi Mereu. Su film iscumbattat su fenomenu de sa longa vida in Arzachena, fruninde una bista unica supra sas vidas de sos chentenarios de sa bidda e supra su connottu chi favoressit una vida longa e sana. Su documentariu at accattadu s’iscopu cun su pubbricu, po sa capatzidade sua de contare in manera affriscionosa sa cultura e sos segretos de una longa vida.

Daboi, si est tenta una dibatta interessante meda. In su mentres de sa dibatta, est bessida a campu sa volontade de su sindigu de cunviare un’istudiu fungudu supra sa vida longa in su columene suo, affidandesi a s’esperientzia de su proffessore Pes, chi at istudiadu fintzas sos chentenarios de s’Ozzastra, attera Blue Zone importante meda.

S’urtima parte de sa serana at tentu commente tema sa Costa Rica, cun su documentariu “Kentannos” de Victor Cruz, chi iscumbattat sa vida de sos chentenarios de sa penisula de Nicoya, una de sas Blue Zones de su mundu. Custu festival, unicu in sa zenia sua, sighit a essere unu ponte intra connottu, iscientzia e cultura, apparande un’opportunidade po meledare supra commente sa vida longa non siat solu un’accabbu de segudare, ma unu viazzu chi appartennet a sa comunidade, maneras de vida e connessuras umanas fungudas.

Attività realizzata col contributo della Regione Sardegna — IMPRENTAS 2023-2024. LR 22/2018, art. 22