Su traballu, chi regollet sas chircas subra sas bestimentas antigas de Nùgoro, Orgòsolo, Orune, Òsile e Ceràxius, est istadu sighidu dae Agostino Basile, de su Setòre Cultura de su Comunu de Nùgoro.

Custu merie a sas 17.30, in Nùgoro, in s’Auditòrium de sa Biblioteca Satta, b’est istada sa presentada de su libru “Prendas e bestimentas antigas, Vol. 1”. Su traballu est su resurtadu de su laboratòriu fatu dae Sara Mura de Gavoi subra sas bestimentas antigas de Nùgoro, Orgòsolo, Òsile, Orane e Ceraxus, in s’àmbitu de su progetu Ufìtziu limba sarda – Tzitade de Nùgoro de su Comunu, gestidu dae sa sotziedade Suia. Sas fotografias e gràfica de su libru sunt de Andrea Corda e Alexandra Goddi (Intu Agency).

A sa presentada fiant presetes sos relatore Ignazio Sanna pro Ceràxius, Gavino Farina pro Òsile, Giuliana Pittalis pro Orune, Cecilia Collu pro Orgòsolo, e pro Nùgoro Ivan Costa (a su postu de Marcello Ferreli, ausente pro motivos de istùdiu), totus moderados dae Agostino Basile, funtzionàriu setore cultura de su Comunu de Nùgoro e unu de sos màssimos espertos in Sardigna in contu de costùmenes sardos. Sa presentada est istada aberta dae sos saludos istitutzionales de s’Assessore a sa Cultura e Turismu Salvatore Picconi.

Su libru est frutu de unu laboratòriu previstu in su progetu Una limba in caminu, finantziadu dae sa Lege 482/99 e LR 22 de su 2018, gestidu e coordinadu dae sa sotziedade Suia snc. Su Laboratòriu, dedicadu a totu sos tzitadinos residentes in su Comunu de Nùgoro, at collidu una sèrie de notziones importantes e fundamentales subra de s’istòria, sa cultura e sas dinàmicas sotziales e econòmicas de su pòpulu sardu, gràtzias a s’istùdiu fungudu de sas bestimentas e de sas prendas traditzionale de Nùgoro, Orgòsolo, Orune, Òsile e Ceràxius.

Su laboratòriu at tentu comente tema sa Festa de su Redentore e sas biddas chi pro sèberu personale e pro fide leant parte dae 122 annos a s’eventu: sa festa nugoresa pro primore chi rapresentat, pro totu sa Sardigna, un’addòbiu de importu pro medas resones, non petzi pro s’ispiritualidade sua, ma fintzas a sa promotzione turìstica, culturale e sotziale de sa Tzitade.

Su vestiàriu e sas prendas traditzionales, s’aunint e creant unu acàpiu acàpiu pro avalorare sos bestires e sas prendas de Nùgoro e de Orgòsolo, Orune, Òsile e Ceràxius semper presentes in sa Festa de su Redentore, promovende su connoschimentu de sos nùmenes de sas partes chi cumponent sas bestimentas in sa faeddada locale, sas tècnicas de traballadura e de ricamu, sos nùmenes de sas robas e sa provenièntzia issoro, sas dinàmicas sotziales e culturales.

Su progetu at prevìdidu s’imprenta e sa publicatzione in lìnia de unu primu volùmene e punnat a collire, pro sas annualidades imbenientes, sos datos chi pertocant sas bestimentas e a sas prendas traditzionales de totus sas àteras biddas chi costumant a leare parte a sa Festa de su Redentore.

Inoghe a suta si podet compudare sa versione in lìnia de s’òpera

https://costumenesardos.it/

“Attività realizzata col contributo della Regione Sardegna — IMPRENTAS 2022-2023. LR 22/2018, art. 22”

Dae sa presone a su tzinema:s’istoria de Beniamino Zuncheddu divennit unu film.

S’istoria de Beniamino Zuncheddu, unu de sos casos prus graves de faddinu zudissiariu in Italia, at a divennere a sa lestra unu film.Un’istoria longa e prena de dolore chi at sinzadu in manera funguda sa vida de un’omine, adduradu in presone pro prus de trint’annos mancari eppat semper nadu de essere innotzente. Zuncheddu, ex pastore sardu, fuit bistadu arrestadu in su 1991 accusadu de una mattansa in Sinnai, in sa cale fuint bistadas bocchidas tres pessonas e un’attera fuit addurata ferta in manera grae.

In cussu tempus fuit pagu prus che unu piccioccu, ma fuit bistadu cundennadu a sa presone a vida pro mesu de elementos chi in su tempus si sunt iscobiados chena nissuna fidantzia. Pro prus de trint’annos at bividu in daesegus de sas travessas,perdinde sos annos prus importantes de sa vida sua,attesu dae sa famiglia, dae sos affettos e dae cale si siat possibilidade de si fraigare unu tempus benidore. Una vida suspesa, sinzada dae s’isettu e s’isperantzia de podere dimustrare
s’innocentzia sua. Solu in su 2024, pustis de una battalla legale longa, fatta de ricursos e controllos de su protzessu, est arribada s’assolutzione deffinitiva chi at reconnoschidu chi no aiat cummittidu su fattu, torrandeli sa libertade.

Una detzisione chi at atzesu s’attentzione supra s’accadessidu e supra sas responsabbilidades de unu sistema chi, in custu casu, at faddidu in manera grae.Como cust’istoria arribat a su tzinema cun d’unu film chi at a contare non solu su casu personale suo,ma fintzas su pesu umanu e sotziale de una cundenna male
fatta.Sas ripresas si prevedint in Sardigna e su disignu puntat a faghere connoschere a unu pubbricu prus mannu una muda chi at corpadu in manera funguda su pubbricu.

Su film at a contare sa sufferentzia,sa soledade e sa fortza de chie sighit a battallare fintzas cando tottu paret perdidu,poninde a su tzentru sa dignidade de una pessona chi non at mai tzessadu de si decrarare innotzente. A su mattessi tempus,at essere fintzas una manera pro meledare supra cantu siat importante su
tribagliu de sa zustissia e supra cantu siat chidrinu su compidu de atzertare sa veridade.

Cussa de Beniamino Zuncheddu est un’istoria chi andat addia de su casu singulu.Est sa dimustrassione de cantu pottant essere graes sas cusseguentzias de unu errore e de cantu siat diffitzile remediare a su tempus perdidu.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22