S’artista esordit in su dopiàgiu cun su rieditzione de su clàssicu Disney. “No est istadu unu traballu ma una grandu oportunidade chi mi prenat de orgòlliu”

“Apo tentu semper unu cuntatu cun s’abba forte meda, dae pipiu artziaia subra de sos iscòglios e cantaia sas cantzones de su cartone. M’intendo unu pagu Sebastian e cussu est su cartone chi apo semper amadu”. Mahmood, a pustis des’esibitzione a s’Eurovision Song Contest comente  superòspite, prestat sa boghe a s’editzione italiana (e a sa colunna sonora) de La sirenetta Disney, rivisitatzione  de su clàssicu de animatzione, regia de Rob Marshall, dae su 24 maju in sas salas italianas.

“Cando intendo sa boghe mea in sas anteprimas mi paret assurdu – at ispiegadu su cantante a sa presentada de su film – no est istadu petzi unu traballu, m’est istada fintzas regalada sa possibilidade de lu fàghere. Mi so postu a fàghere una cosa noa, non aia mai dopiadu. So orgolliosu, a minore totu sos istios chi andaia cun mama mea a Sardigna, in su mare chircaia a Atlantide. Pro mene est unu traguardu mannu meda custa collaboratzione cun Disney, sa presentada de Londra l’apo bìvida in manera ditzosa ma fintzas responsàbile. So ligadu a sa colunna sonora de Hercules, ue b’at Alex Baroni in su dopiàgiu. A issu so acsapiadu meda”.

Bintinoe discos de plàtinu e 7 discos de oro in Itàlia, 6 discos de plàtinu e 3 discos de oro a s’èsteru e belle 2,7 milliardos de diretas totales, Mahmood intrat gasi in unu mundu totu nou, su de sas colunnas sonoras pro sos films. Sas mùsicas de sas cantzones de La sirenetta (sa colunna sonora est disponìbile in sas prataformas digitales) sunt fatas dae Alan Menken, cun sos testos de Howard Ashman e sos testos noos de Lin-Manuel Miranda.

“Ant iscritu tres cantzones noas ispantosas pro custu film, est meravigiosu – at naradu su regista e produtore Rob Marshall – apo semper bòlidu traballare cun Alan, ma in calicunu modu sas caminos nostros non si fiant mai obiados.

Pro fortuna, custa borta imbetzes est sutzèdidu, e est istadu bellu meda a collaborare cun issu, non petzi pro sa colunna sonora noa, ma fintzas pro custos magnìficos petzos noos “.

“Attività realizzata col contributo della Regione Sardegna — IMPRENTAS 2022-2023. LR 22/2018, art. 22”

Tzinema sardu, arribat su film”Bandidos e Balentes de Fabio Manuel Mulas

Si sunt faghinde sas represas de su film “Bandidos e Balentes”, su disignu tzinematografficu novu de su regista sardu Fabio Manuel Mulas, chi at a bessire intre pagu tempus. Su film contat un’istoria ambientada in sa Sardigna de su passadu e s’ispirat a sos contos e mudas ligadas a su fenomenu de sos bandidos in s’isula.

Mulas est unu regista e autore sardu chi dae annos tribagliat in su mundu de su tzinema indipendente. In sos tribaglios suos dat attentzione particulare a s’istoria, a sa cultura e su connottu de sa Sardigna. Sa tiza battit supra s’ischermu unu mundu fattu de connottu, gherras e vida in sas zuras internas de sa Sardigna.

Sas mudas sunt ambientadas in sos annos Chimbanta e mustrant comente sa vida de sas pessonas esseret signada dae vindittas e cunfrontos diffitziles intre familias e bandidos. A su tzentru de s’istoria bi sunt pessonas divressas sas vidas de sas cales cambiant propriu pro more de custu clima de tesone e violentzia.

Su film cheret contare non solu su bandizadu ma fintzas sa cultura e sas bistas de s’isula. Sos montes de intro, sas biddas e sas campagnas de sa Sardigna faghent de irfundu a sas mudas de sos attores e mustrant una terra antiga e forte, ligada in manera funguda a su connottu suo.

In su “cast” medas piccioccos sardos, calicunu a sa prima esperientzia, ma fintzas s’attora sarda Caterina Murino, nodida a livellu internatzionale pro sos rolos suos in su tzinema e sa televisione. Sa partetzipassione sua est unu balore in prus po su disignu e at a dare unu contribbudu e faghere biere de prus su film. Sar represas sunt appassionande paritzos logos de s’isula e sunt attirande s’attentzione de appassionados de tzinema e curiosos.

S’intentu de su regista est de contare una pagina de s’istoria sarda pro mesu de unu limbazu tzinematografficu capatze de aunire assione, dramma e connottu. Cun s’essida chi si prevedit in sos meses imbenientes,”Bandidos e balentes” puntat a che leare supra de s’ischermu mannu un’istoria ligada a sa Sardigna in manera funguda, balorizzande s’iscrocca e sas raighinas culturales suas. Su film est fintzas un’occasione pro faghere connoschere a su pubbricu una parte importante de sa memoria istorica de s’isula pro mesu de su tzinema.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22