Iscoberta istraordinària in sa costa de Cùllieri, in provìntzia de Aristanis. Una pitzinna de oto annos at agatau pro cumbinatzione unu fòssile raru chi si podet datare a 13 milliones de annos oe. Pro iscoprrire e cumprèndere de ite si tratat e prus che totu su valore suo, amus dimandadu a su geòlogu Luigi Sanciu chi istùdiat dae maicantos annos custos repertos de grandu importu pro sa geologia de s’ìsula.

Durante unu trekking organizadu in sa zona dae su geòlogu Luigi Sanciu cun s’assòtziu 3 Zàinos Hiking una pisedda agatat fòssile raru de 13 milliones de annos a como. In pagos faeddos si tratat de un’eritzu de mare raru meda e diferente meda de su chi semus abituados a connòschere, pròpiu pro more de sa raridade sua.

“Oe custos eritzos non sunt prus presentes in su Mare Mediterràneu – at naradu su geòlogo Luigi Sanciu chi at publicadu  sas fotos in sas pàginas sotziales cosa sua – ma sighint a populares mares caentes in diversas àteras latitùdines. In sas duas fotografias  podides fàghere unu cunfrontu intre su fòssile e su discendente “atuale” suo”.

In Sardigna sunt medas sos giassos naturalìsticos, geològicos, paleontològicos e mineralògicos chi sunt istados istudiados e tzensidos; intre sos tantos geositos, medas a dolu mannu non sunt avalorados e a bias nemancu connotos, si no dae sos prepostos de su setore e de sos istudiosos. Est impossibile elencare e descrìere totus sos geositos  interessantes chi podimus agatare in Sardigna, mancari medas de custos tèngiat peri una importàntzia  a livellu natzionale e non solu. Unu de custos est seguramente cussu de Capo Nieddu – Cùllieri (OR)-  pròpiu in sa zona de s’Architu, creadu dae su Rio Salighes. In custu giassu su riu si ghetat in mare diretamente de sas pedra vulcànicas de su Plio-Pleistotzene. A Capo Nieddu si crompet colende dae Santa Caterina de Pittinuri in diretzione de su Country Resort Capo Nieddu, colende in unu caminu isterradu.

“Attività realizzata col contributo della Regione Sardegna — IMPRENTAS 2022-2023. LR 22/2018, art. 22”

Su “Velorail” est unu veìculu a pedales cuntzepidu pro colare in sos binàrios ferruviàrios, oferende un’esperièntzia de turismu priu e sustenìbile pro esplorare paesàgios e òperas de arte fatu fatu de sas lìnias ferruviàrias betzas. Custa faina, presente in Europa e in  àteras partes de su mundu, s’est isvilupada mescamente in Frantza, acanta sunt ativas prus de 64 retes chi cada annu benint impreadas dae unu nùmeru sempre prus mannu de biagiadores.

Durante su Fèstival IT.A.CÀ de su turismu responsàbile in Ogiastra, b’est istada una cunferèntzia dedicada a su Velorail. S’atopu est serbidu pro pònnere a notu su ruolu suo comente atratore turìsticu pro sa zona, sende chi fintzas in Ogiastra  tenimus una rete ferroviaria betza chi non benit prus impreada pro su tràficu passegeris. In sa cunferèntzia s’est fintzas sutaliniada sa complementariedade cun su Treninu Birde e s’importu de su turismu priu in sas zonas internas de sa Sardigna. Sos relatore chi sunt interbènnidos ant discutidu progetos pro favorire s’isvilupu de su Velorail e ant bogadu a pìgiu sa netzessidade de collaborare cun istitutziones e aziendas pro mandare a in antis custu progetu chi permitit siat de avalorare e recuperare unu bene istruturale oramai abbandonadu comente sa rete ferroviària, ma fintzas de lu fàghere in modu lentu e rispetosu pro s’ambiente e sa naturalesa.

Jean Paul AUSTRUY, espertu frantzesu de su setore, at cumpartzidu s’esperièntzia positiva sua e su potentziale de su Velorail in Sardigna, augurende s’impreu suo pro rinnovare su Treninu Birde e creare unu percursu turìsticu ùnicu in Europa.

Però, nointames su suportu legislativu, s’atuatzione de su servìtziu de su Velorail in Itàlia abarrat un’obietivu chi no est realizadu de su totu. Sunt istados aviadas mesas de traballu pro definire regulamentos e aviare lìnias isperimentales, ma est pretzisu atzelerare su protzessu pro ativare su Velorail comenteunu sèberu de turismu sustenìbile.

Francesca Loi, Assessore a su turismu de Lanusè, at concruidu sa cunferèntzia cun s’invitu a s’imbeniente editzione de IT.A.CÀ in su 2024, acanta si previdet de organizare una proa pro permìtere a totus de isperimentare su Velorail comente  mèdiu de trasportu sustenìbile in Ogiastra.

“Attività realizzata col contributo della Regione Sardegna — IMPRENTAS 2022-2023. LR 22/2018, art. 22”