Su giòvanu de 24 annos, si fiat donadu a sa mata a pustis de sa cundenna. Giraiat sena impedì pro totu sa Sardigna ma si connetiat a su profilu suo de sa rete sotziale prus famada.

«So unu latitante, hahaha… ». Una balentia iscrita in Facebook acumpangiada dae chimbe caras cun sisitos de disafiu a sos carabineris: gasi s’est traitu a solu G.F., giòvanu pregiudicadu de Otieri, chi s’est donadu a isbandiare a pustis de una cundenna a 4 annos e 9 meses. Sos carabineris però non paschent paddas e lu ant sighidu in sa retza e ant iscobertu chi fiat in Terranoa e l’ant arrestadu.

Pro èssere prus craru in su profilu suo de facebook aiat dadu peri àteras informatzione: «Nomìngiu Totò Riina». Balentone e arcullentes finas dae piseddu G.F., 24 annos, fiat inserradu in unu càrtzere minorile cando in su 2016 aiat iscutu àteros detentos e unu cumpàngiu de tzella. Calicuna chida a oe sa Corte de apellu de Casteddu l’at cundennadu e sa pena chi est devènnida esecutiva. Fiat fintzas acusadu de àere chircadu de evàdere e pro cundùndere sas chircas de àere postu fogu a matalafos e mòbiles. Imbetzes de si presentare in càrtzere pro iscontare sa pena, s’est dadu  a s’isbandiòngiu.

Non fiat atacadu a Otieri, s’iscostiaiat intre vàrias localidades de sa Sardigna, fiat resèssidua iscampare a sos carabineris prus de una borta. Però s’est frigadu a solu. Difatis no aiat mai rinuntziadu a s’irresistìbile richiamu de sas retes sotziales. Sos ùrtimos messàgios sunt istados intertzetados e sos carabineris ant cumintzadu a restrìnghere su campu de sas chircas individuende in Terranoa sas tzellas dae ue moviant telefonadas e messàgios.

Sa zona est istada inghiriada; su sero de su 18 maju G.F. est essidu de domo pro andare a sa bia tzentrale de Vittorio Veneto e inoghe est istadu sighidu dae una màchina de sa giustìtzia in burghesu. S’est firmadu dae in antis una butega, su maresciallu cumandante s’istatzione de sos carabineris de Otieri l’at mutidu e issu s’est giradu e postu sos ferros.

“Attività realizzata col contributo della Regione Sardegna — IMPRENTAS 2022-2023. LR 22/2018, art. 22”

Pinnettos sardos, furriadorzos antigos chi contant sa vida de sos pastores.

Sos pinnettos, sunt intre sas testimonias prus beras de sa Sardigna de campagna e contant una manera de bivere ligada in manera funguda a sa pastoria e s’iscrocca. Ispartos mescamente in sas zuras de intro de s’isula, in manera particulare comente s’Ozzastra, beniant fraigados dae sos pastores comente furriadorzos in su mentres chi passaiant tempus meda in campagna imparis cun sos masones. S’istruttura insoro est simple ma zeniosa:tenent una forma tunda cun d’una base fatta cun pedras e una copertura fatta de rampos e frastamazas intritzadas, a s’ispissu de ghiniperu, impittande solu materiales naturales chi si agattaiant in cussu logu.

Intro, su logu est essentziale ma funtzionale, chi bastaiat pro si amparare dae su frittu,dae su bentu e s’abba,coghinare e costoire sos istrumentos de tribagliu,chena mai essere pensados comente domos abbarrantes ma comente puntos de accottu ligados a sa vida pastorale.

Custos fraigos naschent dae una connoschentzia funguda de s’ambiente e de sos medios suos, inube nudda capitat pro casu: su seperu de sos materiales,sa forma,s’orientamentu, tottu rispondet a esigentzias pratigas e a sa netzessidade de si adattare a cundissiones a s’ispissu diffitziles.Sos pinnettos sunt duncas non solu unu furriadorzu fisicu,ma fintzas unu esempru beru de ecchilibriu intre omine e natura, fraigados chena trastoccare sa bista ma intregandesi intre issa in manera perfetta.

Ancora oe sunt presentes in medas zuras de sa Sardigna, calicunu cusservadu bene, atteros sinzados dae su tempus, e sighint a contare un’istoria fatta de tribagliu, sacriffissiu e vida de donzi die attesu dae sas biddas.In sos urtimos annos est creschida s’attentzione a banda de sa tutela e balorizzassione insoro, cun interventos de recuberu e insertu in caminos naturalisticos e culturales, signu de unu rennoadu attuamentu de su balore insoro istoricu e de s’identidade.

Sos pinnettos non sunt solu fraigos de su passadu, ma conas de una cultura chi at ischidu resistire e si adattare in sos seculos.Costoire custa istrutturas cheret narrere de mantennere biva sa memoria de unu mundu chi at formadu s’identidade de sa Sardigna e chi fintzas oe podet indittare meda.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22