Una fèmina de sos Istados Unidos lassat su telefoneddu a sa fìgia e sutzedet unu “dannu mannu”
Lassat su tzellulare a sa fìgia de 5 annos e s’agatat tres mìgia èuros de adèbitos de Amazon: in sos Istados Unidos una mama at ismentigadu de ativare su blocu e sa pitica at ordinadu una meca de gioghitos. Sa fèmina no at carculadu de tènnere in su tzellulare un’aplicatzione chi permitit de fàghere achistos sena dèvere cunfirmare sas cartas de crèditu. Duncas a pustis de unu pagu de tempus sa fèmina de su Massachusetts s’est agatada in su contu suo un’addèbitu de sas ispesas in lìnia de Amazon. Sa summa? Prus de tres mìgia dòllaros, est a nàrrere  prus de 2700 èuros. E chie aiat fatu cussa ispesa manna?

Sa fìgia, una pitzinna de 5 annos. Sa “vìtima” at contadu su fatu a su giornale “Good Morning Amèrica”, contende chi sa chida colada l’est arribbada sa lista de s’ispesa: moto de cross elètrica, diversas parigas de botas de vacàrgiu e una Jeep de giogu.

“A printzìpiu  apo  pensadu chi si trataret de un’imbrollu, duncas so andada deretu a bìdere sa cronologia de sos òrdines de Amazon e apo iscobertu chi aia ordinadu una sèrie de giogos e mi so ammentada de àere dadu su telèfonu a fìgia mea”. E ancora: “Fìamus ghiende in màchina e issa in s’ora fiat faghende òrdine cun su telèfonu meu. A sa fine non l’apo mancu brigada pro su chi at fatu, pro ite sa neghe est istada sa mia chi l’apo lassadu su telefoneddu sena mi nde segurare chi esseret postu su blocu pro sos minores. Seguru ca custa esperièntzia m’at a serbire pro abèrrere sos ogros e pro donare prus atentu, sende chi cando sos pipios tenent a manìgiu sa tecnologia podet sutzèdere finas cosas pagu bellas. A mie, a contos fatos, est peri andada bene, prus pagu a sa busciaca”.

 “Attività realizzata col contributo della Regione Sardegna – IMPRENTAS 2022-2023. LR 22/2018, art. 22”

Pustis de aere tentu sutzessu mannu in su mentres de su giru mondiale chi l’at bida surcare sos mares de 30 Paeses in casi 20 meses, sa nave iscola Amerigo Vespucci de sa Marina Militare italiana est commo interprete de unu novu biazu: su giru de su Mediterraneu, chi at a tennere 18 coladas e si at a concluire in Genova su 10 de lampadas, in occasione de sa Die de sa Marina Militare.

Sa colada 14 de custu biazu, at essere in Casteddu, inube sa nave at essere arribada dae su 19 a su 22 de maju in sa Banchina Ichnusa. S’arrivu suo in sa tzittade printzipale de sa Sardigna si prevedid su sero a tardu de lunis 19 maju,antitzipadu dae unu momentu de ispettaculu in su Gulfu de Casteddu, inube at a naigare in cumpanzia de Luna Rossa, chi at binchidu sa Unicredit Youth America’s Cup.

A accasazare sa Vespucci bi at essere una tzerimonia uffitziale de benennida, cun sa presentzia de sas autoridades tziviles e militares, accumpanzadas dae sa Banda musicale de sa Brigada “Tattari” e dae sa Fanfara de s’Accademia de Livorno, chi ant apparare atteras mustradas po su pubbricu in su mentres de sas dies de posada. S’initziativa de su giru de su Mediterraneu Vespucci est naschida dae una idea de su Ministru de sa Defensa Guido Crosetto, cun s’accottu de su Ministeru de sa Defensa e de atteros 12 Ministeros, cun s’intentu de contare e cundividere s’esperientzia de su giru mondiale, balorizande sas estremadias italianas: dae sa cultura a sa cosa de pappare, dae schirca iscientifica a sa tennologia, passande po sas novidades e s’industria.

Unu momentu de meda signifficu bi at essere martis 20 maju a su Teatru Oriana Fallaci de Othieri, su capitanu de Vascello Zuseppe Lai, chi cumandat  sa nave e chi est naschidu in Othieri, at a rezzire su premiu de archida “Premiu Lions Othieri a sa cultura e s’impignu sotziale”, chi benit dadu dae su 1982 dae su Premiu Logudoro e dae su Lions Club Othieri a personalidades chi si sunt annoditadas po su contribbudu culturale e sotziale insoro.

Attività realizzata col contributo della Regione Sardegna — IMPRENTAS 2024-2025. LR 22/2018, art. 22