Chenàbura coladu b’est istada sa finale de su cuncursu musicale in su Canepa de Tàtati: sos binchidores sunt duos dischentes de su Cunservatòriu de Casteddu

Sunt duos istudiantes de su Cunservatòriu “Giovanni Pierluigi da Palestrina” de Casteddu, Davide Pizzo e Filippo Piredda sos chi ant bìnchidu s’editzione nùmeru sete de su Prèmiu musicale “Matteo Sanna/Sa.Tua.Musa.“, ammaniadu dae s’omònimu assòtziu paris cun sos Cunservadores de Tàtari e Casteddu.

Su cuncursu, acasagiadu pro sa primu bia in su Canepa, est riservadu a sos istudiantes de sos duos istitutos, cumpresos sos istràngios de su progetu Erasmus, iscritos a sos cursos de su Dipartimentu de Mùsica d’Insieme. S’iscopu suo est su de premiare sos giòvanos talentos

Chenàbura a merie, su 24 martzu, presentados dae su presidente de su Cunservatòriu Ivano Iai e dae su diretore Mariano Meloni, in sa sala Sassu si sunt esibidos chimbe grupos de mùsica de càmera. Su prèmiu de 1500 èuros sunt istados sos istudiantes casteddajos, chi ant esecutadu sa Viola Sonada da minore n. 1 de Johannes Brahms e s’Allegro apassionadu H.82 de Frank Bridge.

Sa giuria at donadu su prèmiu ispetziale a su cuinteto formadu dae Martina Porcheddu Cristiana Nuvoli Danilo Ogno Riccardo De Ciccio e Alessandro Virdis), de su Cunservatòriu de Tàtari, chi ant sonadu pare a pare flàutu, clarinetu, corru, fagotu, pianoforte.

In sa giuria, presidida dae Candida Manca de s’Assòtziu “Matteo Sanna”, bi fiant Carlo Grandi e Mauro Masala de su Cunservatòriu de Tàtari Luigi Muscio e Elisabetta Dessì de su Cunservatòriu de Casteddu.

«Intre sas initziativas chi dedicamus a s’arte, in totus sas formas suas – at naradu sa presidente – su Prèmiu musicale est un’apuntamentu annuale importante meda. Su talentu de sos artistas chi si formant in sos duos Cunservadores pro nois est un’istìmulu a portare dae in antis custu progetu, pro ite semus cumbintos chi s’arte e mescamente sa mùsica siat su limbàgiu universale chi nos acùrtziat a sos giòvanos».

 “Attività realizzata col contributo della Regione Sardegna – IMPRENTAS 2022-2023. LR 22/2018, art. 22”

Ispidale de Santu Bainzu firmu a su palu:ritardos chi iscobiant unu sistema chentza disignu.

S’abertura de s’ispedale nou de Santu Bainzu Monreale patit unu rinviu novu e, segundu sas istimas prus reghentes, s’ispidale no at a èssere operativu a innantis de su 2027. Una data ancora a tesu, mescamente si  si cunsiderat chi s’istùdiu de possibilidade est de sa segunda metade de sos annos Duamìzza e chi su cantieri, cumintzadu in su 2022, est bistadu prenu de abbaccamentos, firmadas e torradas a cumintzare chi ant fattu su percursu isvariadu meda.

Su ritardu de su cantieri ponet in lughe una difficultade prus manna: sa Sardigna bivet dae annos sa mancàntzia de una progetatzione sanidària firma e coerente. S’Ìsula non tenet unu pranu azzorronadu e abberu orientadu a sos bisònzos de sas comunidades, pro itte s’ùrtimu Pianu sanidàriu regionale est de su 2007. In su mentres, si sunt sighidas refformas e cuntra refformas, acuntzentramentos e cummissariamentos chi non ant resòrvidu sos problemas istruturales de s’assentu sanidàriu regionale.

A cumplicare de prus  su cuadru est sa crèschida de su campu privadu, in manera particulare si biet in sos tzentros prus populados, in ue ant pigadu forma poliambolatòrios modernos e istruturas chirùrgicas novas capatzes de apparare servìtzios lestros. In parallelu, sa salude pùbrica fadigat semper prus a garantire sas prestassiones netzessàrias, cun su perìgulu beru de allargare sa distantzia intre chie podet atzèdere a curas deretas agguantande costos privados e chie imbetzes est costrintu a si cunfrontare cun listas de isettu, tempos longos e mancàntzias organizativas.

In su Campidanu Mesanu, logu chi isettat unu ispidale novu dae belle vinti annos, custa dèbilesa est evidente meda: sa meighina de s’iscrocca s’est afortigada a pagu a pagu, medas bàrdias mèigas ant serradu o minimadu sos òrarios, sos mèigos de base non bastant e sos servìtzios netzessàrios benint dados cun difficultade. Comunidades intreas s’agatant a bìvere gai in d’una cunditzione de emergèntzia donzi die.

Attività realizzata con il contributo della Regione Sardegna – IMPRENTAS 2024- 2025.LR22/2018, art.22”