In belle totu sas festas e sas sagras chi si faghent in Sardigna, ma fitnzas in sas cojas o in sos ispuntinos, s’istentu preferidu est semper sa murra, unu giogu antigu meda chi s’agatat peri in àteras natziones de su Mediterràneu e de mundu, comente in Catalugna, in Còrsica e in Friuli, tantis pro nde numenare calicunu.

Difatis su nùmene de su giogu càmbiat a segunda de sa natzione: si narat morra, murra, mourre, mourra, moura, mora more, mórre, lakhmos, atep, micatio, mukharaja, chai moi, italian fingers game e gosi sighende.
Dae su 2003, difatis, s’Assòtziu Sòciu po su giocu de sa murra, organizat unu campionadu internatzionale  de murra mutidu “Atòbiu de sos murradores de su Mediterràneu”, a su cale leant parte giogadores de prus de 20 delegatziones. Su primu atòbiu b’est istadu in Orthullè.

Si pensat chi sa murra  si giogaret fintzas in s’Antigu Egitu. Tempus faghet difatis, sos archeòlogos aiant agatadu de sas pinturas a s’internu de sa tumba de un’artu dignitàriu, chi rapresentaiant duas persones chi ingrugiainat sas manos comente si faghet cun sa murra. Su giogu est famadu meda a livellu regionale peri in Itàlia, comente in Badde de Aosta, Piemonte, Trentinu, Savòia e Marche.

Non totus l’ischint, ma custu giogu populare fiat istadu decraradu illegale in su 1931 durante su fascismu, pro ite fiat cunsideradu unu giogu de azardu e prus che totu unu giogu acanta podiant nàschere medas brigas e iscravatòriu.

Oe puru sa murra non si diat pòdere giogare in sos logos pùblicos, in base a s’artìculu 110 de su Testu Ùnicu pro sas Leges in matèria de Pùblica Seguridade. In veridade nemos si chèsciat e s’autoridade serrat un’ogru, a su puntu chi esistet sa Federatzione de su Giogu de sa Murra e comente amus  naradu cada annu si faghet medas torneos e campionados de murra in totu su Mediterràneu.

“Attività realizzata col contributo della Regione Sardegna – IMPRENTAS 2022-2023. LR 22/2018, art. 22”

Casteddu, oras cardas supra su mercadu: Caprile, Piccoli e Adopo sunt in pagu ecchilibriu. Arribat Angelozzi.

Dies de ammacchiu in domo Casteddu, inube si detzidit su tempus benidore de tres giogadores importantes de s’istagione passada: Caprile, Piccoli e Adopo. Su club ruju blau at tempus fintzas a cras po los riscattare, ma su carrigu accolomicu de s’operassione- de casi 24 miliones de euros,imponnet cunsideros attentos e assiones pretzisas.

Su porteri Caprile, in manera particulare, est un’occasione de mercadu: si podet riscattare po 8 miliones dae su Napoli, e at bidu su balore suo artziare in artu pustis de un’annu bellu meda. Paritzas sotziedades, fintzas de Serie A, sunt sighinde cun interessu comente at andare sa chistione.

Pius cumplicada sa situassione cun s’Atalanta po Piccoli e Adopo, chi tenent unu balore de 12 e 4 miliones. Su Casteddu, chi at cumpresu su balore de sos duos giogadores ma fintzas  sos problemas de su bilanciu suo, at a chircare fintzas a s’urtimu de alcansare cundissiones de vantaggiu.

Po su momentu, si bient movimentos puru intre prestidos e giogadores chi torrant in Sardigna. Scuffet at a torrare a su Napoli e Radunovic a su Bari, ma ambos non sunt in sos disignos tennicos: su primu diat podere andare a su Modena, inube depet andare fintzas Di Pardo, chi est accanta a su riscattu dae parte de sos grogu blau. Dae s’attera parte, si isettat sa ghirada de Idrissi, chi diat podere agattare logu supra sa fasca manca pustis de s’adiosu de Augello. No est peroe s’unicu nomene po cussu rolu: piaghet puru Cacace de s’Empoli.

Novidades sunt po arribare fintzas in sa dirigentzia: Guido Angelozzi, appena saludadu su Frosinone, est prontu a divennere su direttore isportivu novu de su Casteddu.A su logu suo at a bessire Nereo Bonato. Cun issu diat podere arribare fintzas duos zovanos interessantes: su foranu de attaccu Kvernadze e s’attaccante Ambrosino, cust’urtimu de propriedade de su Napoli e chi at sinzadu in s’urtima partida de s’Under 21.

Attività realizzata col contributo della Regione Sardegna — IMPRENTAS 2024-2025. LR 22/2018, art. 22