Aya, cando sos sucurridores l’ant agatata, fiat galu pitzigada a su cordone de su bìddigu de sa mama. Fiat in mesu a sas ruinas de  sa tzitade de Jinderes, in Sìria, disastrada dae su  terremotu chi at corfidu Turchia e Sìria tra domìnigu 5 e lunis 6 de freàrgiu.

L’ant mutida Aya, chi cheret nàrrere “miràculu, sinnu de deus”. Sa pipia est abarrada suta sos còigios de sa domo ruta pro in prus de deghe oras a pustis chi sa mama est morta paris cun su babbu e sos bator frades. S’ùnicu a si sarbare de cussa famìlia est istadu su tziu de su su babbu, Salah a su-Badran, chi l’at donadu cussu nùmene prenu de isperu.

S’ispidale de Afrin, in sa provìntzia de Alepu, a pustis de sa noa de s’agatamentu de sa pipia, est istadu prenu de mutidas de gente chi la cheret adotare.. “Pro s’ora no apo a permìtere a nemos de l’adotare. Finas a sa torrada de sos parentes suos, l’apo a tratare comente una fìgia mia”, at naradu su diretore de s’ispidale Khalid Attiah. Segundu su chi iscriet BBC, remonende sas fontes de s’ispidale, sa pitzinna  como istat bene, mancari sas oras chi est abarrada carragiada suta sas ruinas de sa domo sua, a costadu de sa mama partera. Sa fìgia diat èssere naschida calicuna ora prima, deretu sucùrrida in s’ispidale de Afrin.

“A pustis de su terremoto in cussa zona de sa Sìria sunt abarradas a camba petzi su 10% de sas domos”, at decraradu Salah a su-Badran a s’agèntzia de imprenta Ap. Sas vìtimas de su sisma, tra Sìria e Turchia, sighint a aumentare. Immoe su contu est lòmpidu a  21.719, ma si pensat ca su nùmeru at a sighire a aumentare, mescamente in sa parte siriana, acanta sos sucursos sunt lòmpidos in ritardu meda, pro more de sa presèntzia sos rebellos chi controllant calicuna de sas provìntzias corfidas dae su terremotu.

“Attività realizzata col contributo della Regione Sardegna – IMPRENTAS 2022-2023. LR 22/2018, art. 22”

“Su Nenniri”, s’antigu connottu sardu chi abbisat sa Pasca.

Cun s’arribu de sa Pasca, in biddas meda de sa Sardigna torrat unu de sos connottos prus antigos e ammaghiantes de s’isula:”su Nenniri”. Si tratta de chimizones de ranu o atteros semenes creschidos a s’iscuru, chi affigurant sa torrada a bida e s’isperantzia, ligados a sos ritos de sa Chida Santa. S’ammanitzu incuminzat parizzas dies prima de Pasca, sos semenes benint postos a brotare in bottos pitticcos, a s’ispissu prattos o canisteddos,cuzigados e attesu dae sa lughe. In custa manera creschent fines,craros e delicados, leande unu colore giallu chisinathu tipicu meda.

Sa forma insoro chidrina e s’aera casi de “sufferentzia” crischiant comente iscromba su sacriffitziu e sa morte de Cristus. In su mentres de sa Chida Santa,”is nenniris” che benint leados in cresia e impittados pro adornare sas tumbas, sos artares pro su Giovia Santu. In carchi bidda benint postos cun contivizu particulare impare a frores,qandelas e pannos, creande bistas simples ma prenas de signifficu.Est unu zestu chi aunit fede e connottu populare, chi andat dae ingendra a ingendra.

In comunidades meda, mescamente in sas biddas prus pitticcas, s’ammaniada de sos nenniri est fintzas unu mamentu de cundivisione.A s’ispissu sunt sas feminas e sos bezzos a si nde occupare, impare cun zovanos, chi gai imparant su balore de custos ritos antigos. Custu connottu tenet raighinas attesu meda, mancari ligadas fintzas a ritos de sa laurantza prima de Cristu, chi tzelebraiant su cursu de sa natura e sa torrada a bida pustis de s’jerru.Cun su tempus, custos signifficos si sunt intritzados cun sa religione cristiana, dande vida a una cosa chi oe mustrat impare morte e torrada a bida.

“Su nenniri” non est solu unu elementu de decoradura, ma unu signu fungudu de sa cultura sarda. In d’unu mundu chi cambiat a sa lestra, custos connottos sighint a bivere gratzias a sa memoria de sas comunidades e a su disizu de no perdere sas raighinas insoro.Cun sa Pasca chi est accanta, cussos chimizones divennint gai unu nuntzu simple ma forte:pustis de donzi tempus buggiu, sa vida agatta semper sa manera de torrare a naschere.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22