Est lòmpidu s’annu nou, unu 2023 càrrigu de isperu e de disafios mannos chi nos abetant. Nos lassamus a palas unu 2022 chi est istadu unu de is prus istragosos de s’istòria moderna.

S’Europa s’est agatada a parare fronte a sa gherra in Ucràina chi at postu in ghenugru s’economia de totu su mundu e mescamente at cajonadu vìtimas meda.

S’Unione Europea e àteras natziones ant corfidu su guvernu de sa Russia cun santziones ecònomicas, pro chircare dae fàghere frimare s’invasione chi at cumandadu su presidente Vladimir Putin.  Pro immoe no est serbidu a nudda, cun sa gherra chi est sìghendu e is prejos de is cosas sunt crèschidos, mescamente s’enertzia, comente s’eletritzidade e su carburante. Tzertu non sunt mancadas puru is ispeculassiones finantziarias.

A nàrrere chi  s’annu “betzu” fiat ispetadu comente cussu de sa ripresa a pustis sa pandemia de su Covid-19, unu nemigu piticu e invisìbile chi at ammustradu totu sa fragilidade de sa Tziviltade umana. Sa vatzinatzione est istadu unu passu importante meda pro parare fronte a sa tzirculatzione de su virus e immuzzare sa populatzione, ma sa gherra in Ucràina at arèschidu sa ricostrutzione ecònomica.

Pro custu rejone est importante meda pro s’Itàlia su Recovery Fund, su fundu pro sa ripresa cun tìtulos europeos comunos pro finantziare sa ripresa de totus is Paisos prus corfidos de sa crisi a pustis de s’epidèmia, e depet donares rispostas subra disafios mannos pro lantzare torra s’economia. Difatis gente meda at pèrdidu su traballu, cun famìlias a arriscu poberesa.

Un’ocasione manna pro su Paisu nostru pro chircare de nde essire cantu prima dae custa  situassione e pro pensare a una natzione prus moderna.

S’isperu est chi su guvernu nou ghiadu de Giorgia Meloni at a èssere sabiu e cun coràgiu at a dimustrare capatzidades mannas pro afrontare is dificultades chi amus a agatare in s’àndala de is meses benentes. Ant a serbire respostas lestras e chi faghent efettu, pro ite ddu mèritat sa populatzione chi at fatu sacrifìtzios in custus ùltimos annos.

“Attività realizzata col contributo della Regione Sardegna – IMPRENTAS 2022-2023. LR 22/2018, art. 22”

Nora, sa tzittade supra de su mare chi contat sas issidas de sa Sardigna.

Intre sos logos archeologicos prus ammaghiantes de s’isula,sa zura archeologica de Nora est una de sas testimonias prus importantes de s’istoria antiga de sa Sardigna. Posta in sa costa sud-occidentale , in s’iscrocca de Pula, Nora est unu logu inube su tempus passadu ispuntat a pagos passos dae su mare, intre ruinas chi contant seculos de tzivilidade e barattos in su Mediterraneu.

Fundada cun meda probabilidade dae sos Fenicios intre su IX e s’VIII seculu A.C.,Nora est cussiderada una de sas tzittades prus antigas de s’isula. Pustis est divennida unu tzentru punicu importante meda e, prus a tardu,romanu, leande unu rolu istrategicu dae su puntu de bista de sos negossios chi de s’amministrassione. Sa posissione sua,supra de una penisula accarada supra su mare, l’at fatta divennere unu portu naturale e unu puntu de collegamentu de fundamentu intre sa Sardigna e sos atteros caminos de su Mediterraneu.

Passizzande intre sos restos de sa tzittade si podent biere in manera crara sas fases istoricas divressas chi sunt furriadas in su tempus.Intre sos elementos prus de ammaghiu bi est su teatru romanu, una de sas conas de su situ, chi fintzas oe benit impittadu in su mentres de s’istiu pro abbenimentos culturales e ispettaculos. Accanta a su teatru bi sunt sos istabilimentos termales, cun logos dedicados a su relax e sa vida sotziale, e parizzas domos decoradas cun musaigos chi testimonzant su livellu de isviluppu apperricadu dae sa tzittade in su tempus de sos romanos.

Sos caminos sticcados,sos restos de sas cresias e sas istrutturas de su portu contant de una tzittade biva e ordiminzada, inube si intrintzaiant attividades de barattu,religiosas e de donzi die.Interessante meda est su cuartieri punicu, chi custoid sas andalas de sa fase prus antiga de su logu. Unu de sos trattos pius ammaghiantes de Nora est s’appitzicu suo cun su mare. Parte de sa tzittade antiga s’isterriat in sa costa e oe carchi istruttura si agattat sutta de su livellu de s’abba, e si biet solu in carchi occasione.

Custu elementu dat unu contribbudu a faghere divennere su situ unigu, inube archeologia e bista naturale si fundent in d’unu ecchilibriu ammaghiante.Sos iscavos, chi sunt ancora faghinde, sighint a torrare materiales e informatziones novas, arricchinde sa connoschentzia de unu logu chi no at ancora iscoviadu sos segretos suos.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22