Carolina Vinci est arribbada segunda a Miss Itàlia, s’iscetru de sa prus bella de Itàlia est andadu a  Miss Làtziu e Miss Elegàntzia, Lavinia Abate, deghe oto annos. Mòvida dae Porto Cervo, sa Miss Sardigna at conchistadu fintzas sa fàscia de Miss Tzìnema, fatu fatu a  issa s’est classificada a su de tres postos Virgìnia Cadderis, Miss Emilia Romagna.

Sa serada finale est istada trasmìtida in direta e est istada sa mere de domo Patrizia Mirigliani a incoronare sa reina noa de bellesa, paris cun su presidente de sa giuria, s’atore Massimo Boldi. Sa serada est istada conduida dae su giornalista televisivu Salvo Sottile s’est tenta in Roma, a su Crowne Plaza Hotel.

Cuntenta manna Carolina Vinci, originària de Porto Cherbu, pro èssere arribbada finalista a su cuncursu de bellesa Miss Itàlia. Giai prima de su resurtadu finale aiat mustradu totu su brègiu suo pro custu traguardu importante: “So istraca meda ma cuntenta e emotzionada. Pro mene sunt istadas dies de fadiore a livellu fìsicu e mentale.

A ogna contu sunt istadas dies meravigiosas. Apo tentu s’ocasione de connòscere medas amigas sardas chi fiant cun megus in custa aventura ispetziale. Medas de issas non sunt coladas in sa seletzione, ma deo lis àuguro de sighire semper a crèere in sos bisos issoro, ca si unu creet in sos bisos a sa coa podet lòmpere a su traguardu”.

Carolina bivet dae paritzos annos in Roma, in ue s’est laureada in  s’Acadèmia de recitatzione de teatru. Divènnere miss Itàlia fiat diat àere donadu medas possibilidades in prus, ma issa non si betat a terra. Difatis at a sighire  in sa carriera de atoressa – narat Vinci -, cuddu pro cale apo istudiadu in sos annos. Difatis pro issa, peri si Miss Itàlia podiat èssere una tapa importante cheret fàghere carriera in su mundu de su tzìnema”.

“Progetu finantziadu cun s’Avisu Pùblicu IMPRENTAS annualidade 2021-2022”

Pinnettos sardos, furriadorzos antigos chi contant sa vida de sos pastores.

Sos pinnettos, sunt intre sas testimonias prus beras de sa Sardigna de campagna e contant una manera de bivere ligada in manera funguda a sa pastoria e s’iscrocca. Ispartos mescamente in sas zuras de intro de s’isula, in manera particulare comente s’Ozzastra, beniant fraigados dae sos pastores comente furriadorzos in su mentres chi passaiant tempus meda in campagna imparis cun sos masones. S’istruttura insoro est simple ma zeniosa:tenent una forma tunda cun d’una base fatta cun pedras e una copertura fatta de rampos e frastamazas intritzadas, a s’ispissu de ghiniperu, impittande solu materiales naturales chi si agattaiant in cussu logu.

Intro, su logu est essentziale ma funtzionale, chi bastaiat pro si amparare dae su frittu,dae su bentu e s’abba,coghinare e costoire sos istrumentos de tribagliu,chena mai essere pensados comente domos abbarrantes ma comente puntos de accottu ligados a sa vida pastorale.

Custos fraigos naschent dae una connoschentzia funguda de s’ambiente e de sos medios suos, inube nudda capitat pro casu: su seperu de sos materiales,sa forma,s’orientamentu, tottu rispondet a esigentzias pratigas e a sa netzessidade de si adattare a cundissiones a s’ispissu diffitziles.Sos pinnettos sunt duncas non solu unu furriadorzu fisicu,ma fintzas unu esempru beru de ecchilibriu intre omine e natura, fraigados chena trastoccare sa bista ma intregandesi intre issa in manera perfetta.

Ancora oe sunt presentes in medas zuras de sa Sardigna, calicunu cusservadu bene, atteros sinzados dae su tempus, e sighint a contare un’istoria fatta de tribagliu, sacriffissiu e vida de donzi die attesu dae sas biddas.In sos urtimos annos est creschida s’attentzione a banda de sa tutela e balorizzassione insoro, cun interventos de recuberu e insertu in caminos naturalisticos e culturales, signu de unu rennoadu attuamentu de su balore insoro istoricu e de s’identidade.

Sos pinnettos non sunt solu fraigos de su passadu, ma conas de una cultura chi at ischidu resistire e si adattare in sos seculos.Costoire custa istrutturas cheret narrere de mantennere biva sa memoria de unu mundu chi at formadu s’identidade de sa Sardigna e chi fintzas oe podet indittare meda.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22