Su pitzocu de deghenoe annos Antonio Gargiulo est intro sa coghina de Masterchef Itàlia. Su giòvanu, de orìgine campana ma creschidu e pàschidu in Sardignagiai dae cando fiat minoreddu, at conchinadu sos giùighes cun unu pratu ispetziale. At coghinadu difatis sos culurgiones in abba de casu de berbeghe, parmigianu e tzaparanu. Su nòmene de su pratu? “Assàgiu de s’ìsula Mea”.

Su pitzocu sardu-campanu est un’istudiante de archeologia. At detzisu de fàghere dimanda pro partetzipare a su programma de coghina prus famadu de su momentu sena lu fàghere ischire a su babbu e a sa mama chi no ant mai aprètziadu sa passione sua pro sa coghina. Pròpiu pro custu motivu su giùighe Locatelli l’at cumbintu a imbiare dae sas telecàmeras unu messàgiu indiritzadu a su babbu e a sa mama pro li fàghere cumprèndere chi custa passione sua est importante, e podet dare fintzas resurtados mannos!

A sa coa issu at tentu resone. Difatis   est istadu seletzionadu pro andare diretamente a sas puntadas cumpetitivas de su programa, brinchende totu sos disafios. Est istadu unu de sos mègius de sa classe de Masterchef Itàlia. Comente amus naradu Antonio Gargiulo est sardu de adotzione. Issu est naschidu in Vico Equense ma s’est tramudadu dae piticu a Sardigna pro more de su traballu de su su babbu. Pròpiu in Sardigna s’est apassionadu de coghina. Pro sos tres giùighes coghineris, a sas seletziones de sa noa editzione andadas in direta in su canale de Sky, at coghinadu sos culurgiones in abba de casu de berbeghe, parmigianu e tzaparanu cun ògiu a sa menta e at mutidu su pratu suo “Assàgio de s’ìsula mea”.

S’istòria sua at fatu emotzionare sos giùighes: su giòvanu at contadu de èssere un’istudiante de Archeologia e de no àere tentu su coràgiu de iscoviare a sos babbos su disìgiu de partetzipare a Masterchef. A sa fine, a pustis de su tastu de su pratu, sos giùighes ant naradu: “Tue tenes talentu”. E l’ant cunsignadu su grembiale  biancu pro intrare a sa Masterclass.

“Progetu finantziadu cun s’Avisu Pùblicu IMPRENTAS annualidade 2021-2022”

Regorta differentziada,Sardigna intre sas primas ma serbit unu passu in prus.

Sa Sardigna si cuffirmat intre sas regiones prus attentas a sa conduida de s’arga. In su 2024 sa regorta differentziada est arrivada a su 76,5% e balet su terzu postu in Italia, in daesegus de Emilia Romagna e Veneto.

S’elementu,presentadu dae Legambiente in su mentres de s’Ecoforum de Casteddu, mustrat una situassione positiva.Intames si registrat una minimada pitticca de sos comunes prus virtudosos e de cussos chi resessint a arrivare a prezenias artas meda de regorta. In d’una parte manna de s’isula sunt oramai diffundidas abitudines bonas in s’isseperu de s’arga, signu chi in sos annos est bistadu fattu unu tribagliu importante dae sas amministratziones e sos tzittadinos. Sa regorta gianna pro gianna e un’attentzione prus manna a sos cumportamentos de donzi die ant dadu unu contribbudu pro mezorare sos risurtados.

A su mattessi tempus addurant ancora trempas de mezoramentu. Carchi tzentru no arribat a sos livellos prevedidos e sighint a faghere prus fatiga,comente Tattari, mancari siant arribande cambiamentos chi diant podere battire menzus resurtados giai in sos annos imbenientes. Intre sas tzittades printzipales si annoditant Aristanis e Nugoro, chi cuffirmant prezenias artas e organizassione bona de su servitziu, divenninde puntu de relata fintzas po sas atteras iscroccas.

Su cuadru chi bessit a pizu est cussu de una regione chi at fattu passos in daenantis importantes, ma chi non si podet permittere de si frimmare. Una parte de s’arga sighit difattis a no essere differentziada e custu pesat siat supra de s’ambiente chi supra sos costos pro sas comunidades. Sa bera porfia como no est solu mantennere sos risurtados segudados, ma los rendere prus pariviles in totta sa Sardigna. Bi sunt iscroccas chi andant bene meda e atteras chi addurant in daesegus: minimare custa differentzias at essere de fundamentu pro mezorare deabberu su sistema.

In giogu non bi est solu una prezenia, ma sa manera cun sa cale si abbidat a su tempus benidore. Mezorare sa derettura de s’arga cheret narrere de minimare su corpu supra de s’ambiente, ma fintzas fraigare comunidades prus scientes e responsabbiles. Est unu caminu chi dimandat continuidade e impignu e seperos craros, pro itte sos resurtados alcansados fintzas a como mustrant chi furriare est possibile, ma solu si si andat a daenantis chena si frimmare.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22