Tragèdia custu mangianu, pagu prima de sas 9, in Gàiru, acanta unu pensionadu de 72 annos, Bruno Scattu, est mortu istrecadu dae unu cantzellu in bia Preda Longa. Su personale mèdicu de su 118, lòmpidu in deretura acantu est sutzèdidu s’intzidente cun un’ambulantza, no at pòdidu fàghere àteru chi cunstatare su detzessu de s’òmine. Su pensionadu digatis est mortu pro tràuma crànicu causadu dae su cantzellu iscurrevole.

Dae Casteddu fiat fintzas partidu un’elicòteru de s’Areus, cun sos mèigos de su 118 chi a pustis de sa noa de su detzessu est torradu a sa base sua. In sa domo de bia Perda Longa sunt arribbados fintzas sos Carabineris, chi ant fatu totu sas indàgines e leadu sos rilevamentos pro acrarire sa dinàmica de s’intzidente.

S’operaju gairesu est istadu ammentadu fintzas de su primu tzitadinu de sa bidda de sa Badde de su Pardu Sergio Lorrai: “Meda disgràtzias e lutos medas nos ant corpidu in custu 2022. Oe nos lassat Bruno, in modu tràgicu. Sa bighinàntzia  mea e nostra a sos familiares e a sos amigos. Nos devimus fàghere fortza, comente aComunidade, nde tenimus bisòngiu.

Custu tipu de intzidentes si repitent cun meda frecuèntzia e sunt causados dae cantzellos montados male meda, cun meda giogu, sena blocos de seguridade opuru modificados o lassados sena manutentzione a nche los papare sa ruina. In base a una reghente chirca de setore  subra de su tema de sas “automatziones” s’est iscobertu che in sos condomìnios italianos sunt prusaprestu preocupantes sos nùmeros relativos a sos intzidentes causados dae sos cantzellos automàticos e manuales.

Bastat intèndere sos telegiornales o lèghere calicunu cuotidianu pro s’abbigiare chi su fenòmenu est in crèschida. Difatis, si registrant semper prus intzidentes causados dae sos cantzellos automàticos. Serbit prus manutentzione e prus controllos. Ma ite narat sa lege? Oramai de calicunu annu (1996) cantzellos e portales automàticos, segundu da diretiva europea 98/37/CE (ex 89/392/CEE) est a nàrrere sa gasi narada “Diretiva Màchinas” acollida in Itàlia cun su DPR N°459 de su 1996, narat chi automatizare unu cantzellu non significat prus “aplicare unu motore”, ma creare una “màchina”. Su “produtore” tenet sa cumpleta responsabilidade e devet realizare una màchina segura; su propietàriu depet impreare sa màchina cun totu sas precautziones, comente  prescrìvidu in su librete de sos inditos, e sighire sa mantenidura.

“Progetu finantziadu cun s’Avisu Pùblicu IMPRENTAS annualidade 2021-2022”

Casteddu, frimmada una nave cargo po abusos graves: 42 sos problemas accattados.

Eris, su Nucleu Port State Control de sa Capitaneria de Portu de Casteddu at dispostu unu provvidimentu de frimmu amministrativu de una nave “general cargo” chi tenet sa bandera de Palau. S’unidade, cun d’una cabida de 8.195 tn., una longaria de casi 120 metros e fatta 39 annos faghet, fit arrivada su 13 de Aprile passadu a su Portu Canale de Casteddu po faghere operassiones de traffigu.

Su controllu est bistadu fattu po more de sas attividades de ispetzione chi si faghent comente prevedint sas Cumbenias Internatzionales chi regulant sa sicuresa de sa navigassione, sas conditziones de vida e de tribagliu supra sa nave e sa defensa de s’ambiente de su mare. Custas ispetziones serbint po garantire chi sas naves mercantiles chi faghent trafficos internatzionales remirent sas regulas de sicuresa.

S’ispetzione meda devuccada fatta supra sa nave at mustradu problemas meda, in manera particulare po s’ammaniada de s’echipaggiu in sa conduida de sos apprettos, sa prevensione e su cuntrastu de sos fogos, tambene sa sicuresa de tottu sa nave. In tottu, sunt bistados atzertados 42 problemas, de sos cales 24 gai graves de zustifigare sa frimmada de sa nave.

Sa nave no at a podere dassare su Portu de Casteddu fintzas a cando non ant essere postas a postu tottu sa cunditziones de siguresa dimandadas e no at essere fattu un’atteru compudu dae parte de su Nucleu Port State Control. Dae s’incumintzu de s’annu, sunt giai 35 sas naves istranzas compidadas
in su portu de Casteddu: chimbe de custas sunt bistadas frimmadas po problemas graves meda ligados a sa siguresa de sa navigassione, mentres atteras 26 ant tentu problemas pius pitticcos.

Sos compudos ant a sighire in sos meses intrantes, cun s’intentu de prettare sa circulassione de unidades “sub standard”, chi sunt unu perigulu seriu no solu po sa siguresa in mare, ma fintzas po s’ambiente e po sa tutela de su personale imbarcadu.

Attività realizzata col contributo della Regione Sardegna — IMPRENTAS 2024-2025. LR 22/2018, art. 22