S’ogetu ispatziale est su CZ-5B (2022-143B), razu tzinesu Longa Marcia 5B, s’istàdiu tzentrale de su razu chi at afiladu Mengtian, su de tres mòdulos de s’Istatzione Ispatziale Tzinesa, su  31 santugaine 2022 coladu. Sa rete de sensores SST de s’UE est osservende s’ogetu e sos radar suos ant restrintu sa ventana de torrada a su 4-5 de santandria. S’ogetu CZ-5B tenet una massa dae sas 17 a sas 23 tonnelladas e una mannària de belle 30 m, su chi lu rendet unu “de sos cantos” prus mannos mai torrados a sa terra e duncas mèritat un’atentu mannu. Sos sensores chi contribuint a su SST de s’UE sunt osservende s’ogetu e sos tzentros operativos sunt esecutende anàlisis pro prodùere sa mègius istima possìbile pro su logu e s’ora previstos pro sa torrada.

S’atuale ventana de su 4 de Santandria 2022 a ora de sas 13:08 UTC tenet unu màrgine de pretzisione de 4 oras e at a sighire a si restrìnghere cun su colare de su tempus in modu de èssere seguros de cantu at a calare. Difatis fintzas s’Itàlia diat èssere interessada comente  possìbile zona. Cun probabilidade meda at a sighire fintzas unu comunicadu de sa Protetzione Tzivile comente est istadu pro s’àtera torrada incontrollada de calicunu de mese a oe.

In sa sede de su Dipartimentu de sa Protetzione tzivile, s‘est atopada sa mesa tècnica chi at a sighire sas operatziones de torrada lìbera in atmosfera de su segundu istàdiu de s’iscudidore tzinesu Prc-cz5b. S’addòbiu a pustis de sas informatziones donadas dae s’Agèntzia ispatziale italiana (Asi) in base a sas cales su segundu istàdiu de su vetore est istadu lassadu in un’òrbita bassa. Subra de sa base de sas informatziones disponìbiles, sas trajetorias, ant a interessare su territòriu natzionale, e in particulare sas Regiones tzentru-meridionales, Sardigna cumpresa.

 “Progetu finantziadu cun s’Avisu Pùblicu IMPRENTAS annualidade 2021-2022”

S’iscioperu de is benzinajos chi fiat declaradu dae su 24 sero a giòbia 26 de ghennàrgiu, est istadu frimadu  mércuris.

Is sindacaus de categoria ant cambiadu idea pro non fàghere dannu meda a is tzitadinos, in particolare a is automobilistas.

Pro ite diat àere istadu tropu a beru, abarrare serrados 48 oras de sighida, fintzas is autoservìtzios, in totu sa rete ordinària e in is autostradas, cun diferentziatzione orària intre rete ordinària e autostradale.

S’initziativa de is sindacados de is benzinajos fiat istada detzisa pro more chi su guvernu, imbetzes de abèrrere unu cunfrontu pro chistionare de is problemas beros de su setore, at sighidu a cuare is responsabilidades suas, faeddende de ‘trasparèntzia’ e ‘zonas de umbra’.

Tzertu, mancare s’iscioperu est brincadu, is benzinajos no ant ismentigadu ca pro more de custu modu de su guvernu est colada s’idea chi is benzinajos ant ispeculadu subra su prètziu de su carburante. Una cosa chi is siglas sindacales negadu semper cun fortza.

In riferimentu a custa protesta, sa presidente de su Consìgiu Giorgia Meloni, no at cambiadu idea, narende chi su guvernu no at mai pensadu de fàghere provedimentos pro incurpare sa categoria de is benzinajos, ma pro reconnòschere su balore de is gestores onestos. At agiuntu peri chi is controllos subra sa mèdia de su prètziu de su carburante no ant provadu chi is prètzios nche sunt essidos in s’àera e chi ddoe sunt istadas pagas ispeculatziones. Pro custu s’esecutivu no at a torrare in segus e at a poderare sa s’òbligu de publicare su prètziu mèdiu, definende•ddu una detzisione sàbia. Duncas candu at ischidu dae sa fine de s’iscioperu, est istada cuntenta meda e at abertu a unu cunfrontu nou cun is benzinajos.

Pro custa detzisione, at àpidu unu pesu manu sa proposta chi sa Codacons aiat presentadu un’espostu a sa magistradura contra sa serrada in is dies coladas, ipotizende su reatu de “interrutzione de servìtziu pùblicu”, ispiegadu chi sa s’interrutzione de su servìtziu pro 48 oras, fiat una cosa grave meda, chi non podiat èssere cunsideradu comente un’isciòperu de categoria ebbia.

De sa matessi idea Assoutenti, chi aiat pedidu a is prefeturas e a su Garante pro is isciòperos de blocare sa protesta pretzetende is benzinajos e oblighende is distribudores a abarrare abertos, pròpiu immoe diat èssere sitadu unu machine, cun tempus malu chi est corpende totu s’Itàlia.

Duncas, pro is duos assòtzios de is consumadores est andadu bene chi s’iscioperu no est lòmpidu a duas dies.

Amus a bìdere ita at a capitare in is chidas benentes.

“Attività realizzata col contributo della Regione Sardegna – IMPRENTAS 2022-2023. LR 22/2018, art. 22”