A banda sa passione pro s’isport e pro garas, sos pilotas internatzionales de su Rally Terra Sarda ant finas un’àtera passione, cussa de sa coghina. Difatis. Gràtzias a s’ispetàculu organizadu dae Mirtò, su Fèstival internatzionale de sa murta, durante s’ùrtima editzione de su Rally Terra Sarda, ant tentu modu de si pònnere fintzas a fàghere sos culurgiones e a còghere petza a orrostu.

S’eventu, promòvidu dae Porto Cervo racing de su 7 a su 9 de santugaine at bidu sa partetzipatzione de 97 echipàgios chi ant fatu una gara ispetaculare meda, e in s’ùrtima die, gràtzias a sos organizadores, ant tentu peri s’ocasione de partetzipare a na sèrie de eventos de vàriu argumentu, comente sa cultura,  s’archeologia e s’enogastronomia.

S’eventu pru importante meda, pro ite at interessadu unu nùmeru mannu de ecuipàgios, est istadu cussu chi s’est tentu chenàbura a sero in su bidditzolu Mirtò, acanta b’est istadu s’ispetàculu de coghina, cun sa presèntzia de sos prus importantes pilotas chi si sunt disafiados in sos percursos difìtziles meda de su Rally Terra Sarda. Sos pilotas e sos ecuipàgios ant abrontadu sos culurgiones ogiastrinos e in prus ant bidu comente si bestis sa petza de copieddu pro la còghere in s’ispidu.

Ant partetzipadu totus,  sa còpia de sos duos Spitalier de su Mèssicu finas a su su neozelandesu Hayden Paddon, pro arribbare a sa còpia de sos isvìtzeros Ballinari e Giovenale. Est istadu unu eventu de grandu importu e chi at donadu meda visibilidade a su territòriu, dae sa Gallura e de sa Costa Smeralda.

Difatis b’aiat  fintzas echipàgios chi nde sunt bènnidos dae sa Croàtzia, dae sa Danimarca, dae s’Irlanda, dae sa Bretagna Manna, dae s’Ungheria e dae s’Argentina.

Sa cumpetitzione est istada sighida dae medas  televisiones chi beniant dae totu su mundu. A s’acabbu, gràtzias a sos sommelier de Mirtò b’at àpidu finas un  degustatzione de sos binos de sa cantina de Antonello Melis, acumpangiados dae sas seadas de sos “Sapori d’Ogliastra” de su produtore lanuseinu Vito Arra. Fintzas pro isso est istada un’ocasione pro fàghere connòschere sos produtos issoro e su territòriu.

“Progetu finantziadu cun s’Avisu Pùblicu IMPRENTAS annualidade 2021-2022”

“Su Nenniri”, s’antigu connottu sardu chi abbisat sa Pasca.

Cun s’arribu de sa Pasca, in biddas meda de sa Sardigna torrat unu de sos connottos prus antigos e ammaghiantes de s’isula:”su Nenniri”. Si tratta de chimizones de ranu o atteros semenes creschidos a s’iscuru, chi affigurant sa torrada a bida e s’isperantzia, ligados a sos ritos de sa Chida Santa. S’ammanitzu incuminzat parizzas dies prima de Pasca, sos semenes benint postos a brotare in bottos pitticcos, a s’ispissu prattos o canisteddos,cuzigados e attesu dae sa lughe. In custa manera creschent fines,craros e delicados, leande unu colore giallu chisinathu tipicu meda.

Sa forma insoro chidrina e s’aera casi de “sufferentzia” crischiant comente iscromba su sacriffitziu e sa morte de Cristus. In su mentres de sa Chida Santa,”is nenniris” che benint leados in cresia e impittados pro adornare sas tumbas, sos artares pro su Giovia Santu. In carchi bidda benint postos cun contivizu particulare impare a frores,qandelas e pannos, creande bistas simples ma prenas de signifficu.Est unu zestu chi aunit fede e connottu populare, chi andat dae ingendra a ingendra.

In comunidades meda, mescamente in sas biddas prus pitticcas, s’ammaniada de sos nenniri est fintzas unu mamentu de cundivisione.A s’ispissu sunt sas feminas e sos bezzos a si nde occupare, impare cun zovanos, chi gai imparant su balore de custos ritos antigos. Custu connottu tenet raighinas attesu meda, mancari ligadas fintzas a ritos de sa laurantza prima de Cristu, chi tzelebraiant su cursu de sa natura e sa torrada a bida pustis de s’jerru.Cun su tempus, custos signifficos si sunt intritzados cun sa religione cristiana, dande vida a una cosa chi oe mustrat impare morte e torrada a bida.

“Su nenniri” non est solu unu elementu de decoradura, ma unu signu fungudu de sa cultura sarda. In d’unu mundu chi cambiat a sa lestra, custos connottos sighint a bivere gratzias a sa memoria de sas comunidades e a su disizu de no perdere sas raighinas insoro.Cun sa Pasca chi est accanta, cussos chimizones divennint gai unu nuntzu simple ma forte:pustis de donzi tempus buggiu, sa vida agatta semper sa manera de torrare a naschere.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22