S’ingenneri Bustianu Maccioni de Nùgoro, connotu meda in tzitade, su 4 de santandria at a lòmpere 104 annos, e su mese coladu at rinnovadu sa patente de guida.

Bator fìgios totus foras de Nùgoro, tres nebodes, e una neta  a Londra. Sa  mugere Elena est mancada bìndighi annos a oe, ma issu, mancari solu, s’est fatu fortza e at sighidu a bìvere comente semper, faghende totu sos cumendos de ogna die. Pròpiu pro custu motivu sa màchina li faghet fartza e est una cosa chi non bi cheret rinuntziare, mancare s’edade.

S’istòria sua est istada contada peri in su giornali  Corriere della Sera, gràtzias a sa pinna de sa  giornalista sarda Elvira Serra. Difatis no est cosa de ogna die a bìdere unu ultratzentenàriu de 104 annos guidende sa màchina. Peri si calicunu pentzet chi siat perigulosu, issu faghet ischire chi at fatu totu is bisitas chi serbint, comente cussa oculìstica e cardiològica e est essidu idòneu.

Guida una betza Seschentos bianca chi tenet dae paritzos annos: “Est importante meda pro mene – at naradu a sa giornalista Elvira Serra – pro ite rapresentat s’indipendèntzia mea”.

At superadu s’esàmene sena problemas, sende ca a issu l’est semper pràgidu a istudiare. In Nùgoro s’est diplomadu a sas Magistrales e a su scientìficu. Posca si fiat  iscritu a Matemàtica in Casteddu, gràtzias a su dinare regollidu dende ripetitziones. Mancari dd’essent mutidu pro sa gherra si fiat laureadu in Matemàtica e in Ingegneria. In Casteddu b’aiat petzi minerària, non tzivile: s’ùrtimu annu l’aiat fatu a Pisa.

Comente  ingenieri tzivile Maccioni at fatu traballos importantes meda, comente unu bucone de sa 131 dae Nùgoro a Marreri. Custu traballu però no l’at impedidu de insegnare matemàtica e topografia.

Duncas, in totu duos diplomas e una làurea, pro custu pro issu a si rinnovare torra sa patente, mancare betzu mannu, est istadu unu giogu.

“Progetto finanziato con l’Avviso Pubblico IMPRENTAS annualità 2021-2022”

Tribulìa in sa plaja in Casteddu: piccioccu de seighi annos agattadu mortu pustis de una festa a denotte.

Un festa in atta ‘e mare est finida in sa manera pius drammatiga. Est ancora imboddicada in su misteru sa morte de Mariano Olla, 16 annos, naschidu in Casteddu, ma chi dae carchi annu bistaiat in Sestu, su corpus de su cale est bistadu acciappidu a s’arbeschida de dominiga 15 de lampadas in sa plaja intre su portu de Su Siccu e sa passizzada scalu de Sant’Elia.

A iscoperrere su corpus, a deghe metros dae sa riva, sunt bistados piscadores e zente chi faghiat su bagnu in cussu logu. In presse meda sunt arrivados sos Viglies de su Fogu po su recuberu de su corpus, sighidu dae s’arribu de sa politzia e de su 118, chi ant potidu solu cunfirmare chi su zovanu fit mortu. Su piccioccu teniat ancora sas iscarpas e sos pantalones curtzos, ma non teniat sa maglia. No presentaiat sinzos de violentzia.

Secundu sos primos pensamentos, intre su notte bi diat essere bistada una festa propriu in cussa plaja pitticca e franta, pagu attesu dae su coro de sa “movida” de sos zovanos de su portu turisticu de Su Siccu. Addurat peroe de accrarare si Mariano esserat deabberu intre sos partetzipantes a sa festa e, si custu est beru, itte potat essere capitadu in sas oras imbenientes.

Sa plaja in sa cale est bistadu agattadu su corpus, una limba de rena pitticca in daesegus de su molu de su portu, si podet segudare dae una caminera de terra chi partit dae su parchizu Coro, su mattessi impittadu dae sos tiffosos po sas partidas a sa Unipol Domus, s’Istadiu de su Casteddu. A curtzu si agattant puru s’istadiu bezzu e su Lazzaretto. Sa Politzia at fattu partire sas scruccullas po accrarare sos motivos de sa morte. Sunt gia bistados iscurtados sos familiares de su piccioccu e si est chircande de torrare a fraigare sas urtimas oras de sa vida sua.

Unu puntu de fundamentu de s’iscrucculla at essere de cumprendere si su piccioccu si siat istesiadu a sa sola, si si siat intesu male, o si bi siant bistados elementos de arriscu in sa serana. At essere importante sa resessia de lotomia.

Attività realizzata col contributo della Regione Sardegna — IMPRENTAS 2024-2025. LR 22/2018, art. 22