Custu est su chi nd’est essidu a campu dae s’istatìstica de The Wom, de su grupu Mondadori mèdia, chi sèberat su museu a chelu abertu prus significativos de Itàlia

Intre sos cummentos prus bregiosos de su resurtadu b’at sa fìgia de su mastru, Maria Sciola, chi at naradu cun grandu emotzione: “Ite cuntentesa custu reconnoschimentu. Ma mi chèrgio firmare un’iscuta a pessare. E si nois esseremus istados de cuddos erederis chi gosant de su patrimòniu de su babbu artista solu in privadu? Sutzedet e est legìtimu, ma non est custu su casu. M’emotziono a pessare cantu babbu nostru siat orgolliosu in su bìdere chi sos tres fìgios suos si sunt unidos cun passione, dedizione e isfortzu econòmicu e emotivu pro avalorare s’òpera sua. Pinuccio Sciola e su Giardinu sonoru suo sunt patrimoniu de totu sa Sardigna”.

Pro realizare sa classìfica sunt istados analizados prus de 1.000 museos in totu Itàlia e, posca, sunt istados ordinados in cada regione in base a su nùmeru de retzensiones retzidas in Google. Dae sas òperas de Michelangelo e Raffaello a sos modellos prus icònicos de s’iscuderia Ferrari, sos museos prus populares de Itàlia ammustrant sa grandu variedade de s’oferta culturale de s’Itàlia.

Custa sa lista de sos museos prus populare de ogni regione

Abrutzu: Museu Pelino de s’Arte e de sa Tecnologia Confettiera (958 retzensiones)

Basilicata: Museu Archeològicu Natzionale de Metaponto (1161 retzensiones)

Calàbria: Museu Archeològicu Natzionale de Règiu Calàbria (8791 retzensiones)

Campània: Museu Archeològicu Natzionale de Nàpule (22591 retzensiones)

Emìlia-Romagna: Museu Ferrari (20868 retzensiones)

Friuli-Venètzia Giùlia: Museu Revoltella (2014 retzensiones)

Làtziu: Galleria Borghese (17194 retzensiones)

Ligùria: Galata Museu de su Mare (7006 retzensiones)

Lombardia: Pinacoteca de Brera (21755 retzensiones)

Marche: Museu Casa Leopardi (7819 retzensiones)

Molise: Museu Natzionale de su Paleolìticu de Isernia (695 retzensiones)

Piemonte: Museu Natzionale de su Tzìnema (39305 retzensiones)

Pùglia: Museu Paleontològicu de sos Dinosàuros (1239 retzensiones)

Sardigna: Pinuccio Sciola Museum – Giardinu Sonoru (918 retzensiones)

Sitzìlia: Museu Archeològicu Regionale Paolo Orsi (1672 retzensiones)

Toscana: Galleria de sos Uffizi (57187 retzensiones)

Trentinu-Südtirol: Musr – Museu de sas Iscièntzias (17213 retzensiones)

Umbria: Galleria Natzionale de s’Umbria (1268 retzensiones)

Valle de Aosta: Mare – Museu Archeològicu Regionale (541 retzensiones)

Vènetu: Colletzione Peggy Guggenheim (9432 retzensiones)

“Progetto finanziato con l’Avviso Pubblico IMPRENTAS annualità 2021-2022”

A s’iscoberta de su logu archeològicu prus bellu de Tortolie

Su logu archeològicu de S’Ortali ’e su Monti, postu in s’iscrocca de Tortolie, in Ozzastra, est unu de sos cumplessos preistòricos e protostòricos prus importantes e mènzus cunservados de sa Sardigna. Postu intre duos rilievos a pagos chilòmetros dae su mare, in sa carrela chi che leat a sa plaja de Orrì, su logu apparat unu viazzu raru in mesu a millènnios de istòria, arregande testimoniàntzias chi partint dae su Neolìticu e arribant a s’edade de su Brunzu.

Inoghe si podet ammirare una domus de janas chi benit dae su Neolìticu reghente, iscavada in sa roca e destinada a s’interru cumone, duos menhir abbarrados chi faghent pensare a s’antiga presentzia de un’alliniamentu megalìticu e unu tzìrculu de pedra de casi 12 metros de diàmetru, ligadu a ritos o pràticas de comunidade de s’edade de su Ramene.

De importu particulare est sa tumba de sos Zigantes, architetura funerària tipica de sa tziviltade nuràgica, cun unu passaditzu longu de interru, incornissadu dae s’esedra, chi contat sas usàntzias antigas ligadas a su cultu de sos mortos. Su coro de su cumplessu est però su nuraghe S’Ortali ’e su Monti, una istruttura manna de pedra fraigada forzis in su 1500 a.C., formada dae unu bastione tzentrale e dae unu bastione elliticu cun turres a costazzos, un’òpera chi testimonzat sas capatzidades de fraigu e organizatzione de sos nuràgicos.

In giru a su nuraghe s’istèndiant sa bidda e zuras de tribagliu diferentes, intre de sas cales bi fuint logos de manizu e mescamente, silos pro sa cunservatzione de sos tzereales, elementos chi mustrant s’importu de sa lauranza in sa vida de donzi die de sas comunidades de cussa edade. Bìsitare S’Ortali ’e su Monti cheret nàrrere a s’infùndere in d’una bista ancora intrea, in ue sa presentzia de s’òmine antigu faeddat cun sa natura a inghìriu e apparat unu cuadru claru de comente sas populatziones preistòricas isseberaiant e modellaiant sos logos in ue bìvere.

“Attività realizzata con il contributo della Regione Sardegna – IMPRENTAS 2024- 2025.LR22/2018, art.22”