Laura Pausini a su tzentru de is polèmicas pro ite no at bòlidu cantare, durante una puntada de sa trasmissione, El Hormiguero, populare quiz de sa tv ispagnola, Bella Ciao, s’innu de sa Resistèntzia partigiana e de sa lota a su fascismu connotu meda fintzas in Ispagna gràtzias a sa sèrie La Casa di Carta.

“Est una cantzone polìtica meda e deo non chèrgio cantare cantzones polìticas”, at naradu sa cantante chi pro custa resone est istada prena de crìticas in is retes sotziales, comente “ti dias dèvere birgongiare” e “”Bella Ciao “pro semper!!!” “Si cunsìderat Bella Ciao comente una cantzone polìtica, comente de parte, essende petzi antifascista e antinazista ma de totu is partes polìticas chi aiant pigadu parte a sa Resistèntzia dae is comunistas a is catòlicos a is liberales, ddi cunsìgio unu ripassu de is bases de sa Costitutzione italiana”, iscriet unu sighidore suo in Facebook.

Un’àteru imbetzes at iscritu: “M’at fatu birgongiare a betu, cun su refudu suo a cantare sa cantzone Bella Ciao. Custu cheret nàrrere chi non connòschet is raighinas de sa terra sua. Sa cantzone tenet un’istòria e una prima versione chi fiat su càntigu de is mondinas, isfrutadas e maletratadas. Bella Ciao est su càntigu chi donat sa boghe a is oprimidos. At pèrdidu una bona ocasione, làstima”.

Sa cantante, a pustis de is chistiones, at rispostu cun unu messàgiu in su profilu twitter de su giassu ispagnolu 20minutos: “Non canto cantzones polìticas, nen de dereta nen de manca. Canto su chi penso de sa vida dae 30 annos. Chi su fascismu siat una birgòngia manna est palisi a totus. Non chèrgio chi nemos m’impreet pro fàghere propaganda polìtica”.

In sa retza calicunu dd’at peri fatu sa parte, narende chi ognunu est lìbetu de fàghere su chi bolet, e chi si Laura Pausini aeret cantadu sa cantzone, tando dda diant àere criticada de àtera manera.

“Progetto finanziato con l’Avviso Pubblico IMPRENTAS annualità 2021-2022”

Passizeris italianos inciassados in Dubai: si chircant bolos po los faghere torrare.

Sunt 563 sos italianos chi si acciappant ancora supra de sa Msc Crociere frimma in su portu de Dubai. Intre issos bi est una truma pitticca de deghe pessonas chi arribant dae Casteddu. Sa cumpanzia est chircande de ordiminzare sa torrada in Italia su prima possibbile, tribagliande po agattare bolos disponibbiles chi pottant faghere torrare a domo tottus sos passizeris.

Po custu motivu sunt bistadas cuntattadas medas cumpanzias aereas internatzionales. S’intentu est de agattare postos supra bolos de linea po permittere a sos passezeris de dassare Dubai e torrare in sos paisos insoro. Intamen sa situassione no est simple e dimandat tempus, pro itte sos collegamentos aereos in cussa zura sunt torrande a incuminzare e sos postos non sunt meda.

Secundu cantu comunicadu dae sa cumpanzia, supra sa nave sa situassione est tranchilla.Sos passezeris istant bene e sighint a rezzire novidades supra su chi est sutzedinde e s’iscumbattu  de ordiminzare sa torrada. In su mentres podent impittare tottu sos servitzios chi bi sunt in sa nave. S’assistentzia a sos passezeris sighit a essere garantida. Sas difficultades printzipales sunt propriu so s’ordimizzasione de sos bolos.

Carchi cumpanzia aerea at pigadu sos collegamentos in sa zura, ma est favoressende sos passezeris chi aiant giai prenotadu sos bolos prima de sos atteros. Custu cheret narrere chi chie teniat prenotassiones fattas dae pagu deppet isettare prus tempus po agattare unu postu disponibbile. Pro custu motivu sa torrada de tottus sos crocieristas dimandat prus dies de su chi si prenettaiat.

Po chircare de essere prus fusidos, sa cumpanzia est baludande fintzas attera solutziones possibbiles. Intre custas bi est s’idea de ordiminzare bolos ispeciales dedicados a sos passezeris de sa nave. Custos bolos diant podere partire non solu dae Dubai, ma fintzas dae atteros aereoportos accanta. In su mentres si sighit a tribagliare imparis cun sas autoridades. S’intentu est de garantire una torrada limpia e sigura po tottu sos passezeris.

In sas dies imbenientes si at a cumprendere menzus cando ant a podere partire sos primos bolos e cando sos biazzadores ant a resessire a torrare a domo.

 Attività realizzata col contributo della Regione Sardegna — IMPRENTAS 2025-2026. LR 22/2018, art. 22