Trintaghimbe annos, ballerinu giai dae cando fiat pagu prus de piseddu, unu pitzocu cun su ballu in su sàmbene. Semus chistionende de Moreno Porcu, su mastru nou de su programma Ballando sotto le stelle.

Est gasi, b’at unu bucone de Sardigna in su programma de Milly Carlucci. Semuse alleghende de Moreno Porcu, chi benit dae Uda.

B’at fintzas unu cantu de Sardigna in su programma televisivu de sa tva ammiraglia de sa  Rai.  In s’ispetàculu de talentos Ballende cun sos isteddos (tìtulu originale in italianu Ballando sotto le stelle) presentadu dae sa famada Milly Carlucci. Unu de sos mastros de dantza difatis est Moreno Porcu, 35 annos, sardu de Uda. Ballerinu giai dae cando fiat giòvanu meda, pro issu su de pòdere leare parte a su programma televisivu iscopridore de talentos est unu bisu chi si realizat: dae sa tzitade de Uda difatis nche l’at fata a lòmpere a sa fortunada trasmissione natzionale, acanta a insegnare totus sas trassas e segretos de sa dantza a sos personàgios famados chi s’ant a disafiare  in dae in antis sas telecàmeras e a milliones de ispetadores.

A donare custa noa est istadu issu etotu in unu messàgiu in sos canales sotziales cosa sua: “In fines potzo pònnere publicamente custa noa. Ocannu apo a fàghere parte de Ballando sotto le stelle comente professionista e apo a pòdere insegnare a ballare a unu de sos personàgios famados chi ant a partetzipare a custa editzione èpica de su programa. No isto in su bestire, apo a traballare a ànima betada in custu  progetu ispetziale chi m’at a bìdere dantzare cun su coro ogni passu.  Ditza bona a mie e a totu s’iscuadra e unu ringratziamentu ispetziale a Milly”.

Sa cosa segura est chi totu sa Sardigna e totu sa tzitade de Uda, de seguru, l’ant a sighire cun passione! Una satisatzione manna pro issu e peri pro totu sos sardos! In ora bona siat!

“Progetto finanziato con l’Avviso Pubblico IMPRENTAS annualità 2021-2022”

Bentu a prus de 100 km/h, prus de 200 interventos de sos vigiles de su fogu in Sardigna in su fine de chida.

Unu fine de chida de tempus malu meda at proadu sa Sardigna, ferta dae bentu forte meda chi ant binchidu sos 100 km/h e dae un’abbiza meteo po arriscu fintzas de nie in sos montes de su tzentru de s’isula. Sa situassione at creadu problemas in tottue e dimandadu un’interventu importante de sos Vigiles de su Fogu, impignados in prus de 200 operassiones de succursu tennicu lestru supra de tottu s’iscrocca de sa Regione.

Sos problemas prus mannos bi sunt bistados mescamente in sas carrelas,inube sa rutta de medas arbures at creadu difficultades a sas macchinas, e in carchi casu, at intzidiadu sa serrada de carchi carrela. Sunt bistados casi 60 sos interventos fattos po che franghere arbures ruttos o chi funt po nde ruere, chi intzippaint carrelas, marciapes e bintradas de sas domos.

A custos si aggiunghent a su nessi 35 interventos po ponnere in siguresa ligados a su distaccu o s’arriscu de rutta de elementos de sos palattos, commente guarnisiones, teulas, insinzas e cartellones po sa pubblicidade,abbuttinados o movidos dae su bentu forte. In medas biddas bi sunt bistados puru dannos e domos privadas o pubbricas, cun sa netzessidade de allaccanare carchi zura po appartare perigulos a sos tzittadinos.

In su mentres, sos cumandos de sos Vigiles de su Fogu de Casteddu, Tattari, Nugoro e Aristanis sighint a controllare prus de 40 dimandas de operassiones chi sunt ancora in daesegus, cun sas isquadras impignadas chentza si frimmare po intervennere in sos logos prus apprettosos e cun arriscos mannos.

Su tempus malu, accumpanzadu dae s’abbizu meteo po bentu forte e nie in sas zuras prus artas, ad dadu unu contribbudu a cumplicare sas operassiones, in manera particulare in sas zuras de sa parte de intro de s’isula, inube sa minimada de sas temperaduras e sas ispentumadas ant fattu divennere prus diffitziles sas tramudas e sos interventos de succursu.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22